06/11/2026
REAGIM PUBLIK I MONUNI SH.P.K.
Ju na besoni kafshët tuaja çdo ditë. Këtij besimi i përgjigjemi me informacionin e plotë për njoftimin e Agjencisë së Ushqimit dhe Veterinarisë (AUV) të 1 nëntorit.
Së pari, shprehim shqetësimin dhe kundërshtimin tonë lidhur me mënyrën e trajtimit të rastit dhe përmbajtjen e komunikatës publike të AUV-së, e cila, sipas vlerësimit tonë, nuk pasqyron në mënyrë të plotë rrethanat, dokumentacionin përkatës dhe masat e ndërmarra nga kompania.
Janë dy raste të ndara, të njoftuara bashkë. Ngarkesa e misrit nga Kroacia u ndal në kufi dhe nuk hyri kurrë në treg. Lotin e ushqimit për viça, jo për lopë qumështore, e kemi tërhequr nga qarkullimi. Asnjëri nga të dy rastet nuk prek produktet që arrijnë në tryezën tuaj, as qumështin, as mishin.
Lidhur me importin e misrit nga Kroacia.
Kanë qenë dy ngarkesa nga Kroacia të shoqëruara me dokumentacion të plotë, përfshirë raportet e analizave të laboratorit të akredituar kroat Inspecto d.o.o., të kryera para nisjes, që e tregonin misrin në rregull në të gjitha parametrat (dokumentet janë në komentin e parë). Kontrolli në kufi është procedurë standarde dhe ne e mirëpresim, sepse mban të njëjtin nivel që e mbajmë edhe vetë. Këtë herë, megjithëse vinin nga i njëjti vend, nga i njëjti dërgues dhe të ngarkuara njëri pas tjetrit njëra ngarkesë rezultoi brenda kufijve të lejuar, ndërsa tjetra mbi kufirin e përcaktuar. Ngarkesa e refuzuar nuk u zhdoganua dhe më 19 tetor u kthye te sh*tësi në Kroaci. Nuk ishte pjesë e asnjë produkti tonë. Shqetësimi ynë lind nga fakti se analiza fillestare dhe superanaliza kanë matur parametra të ndryshëm, aflatoksinën B1 dhe aflatoksinat totale, duke ngritur pikëpyetje mbi krahasueshmërinë e rezultateve. Pavarësisht kërkesave tona të përsëritura, raportet e plota laboratorike nuk na janë vënë në dispozicion, dhe kjo e ka kufizuar mundësinë tonë për një verifikim të pavarur dhe për një sqarim të saktë me furnitorin.
Sa i përket ushqimit për viça.
AUV-ja testoi edhe disa nga produktet tona, dhe të gjitha ishin në rregull përveç një loti prej 2.000 kg të ushqimit për viça, ku analiza laboratorike konstatoi tejkalim të kufirit të lejuar të aflatoksinës B1. Ditën që morëm rezultatin, më 8 tetor, e ndaluam produktin. I gjithë loti është i izoluar dhe i mbajtur jashtë tregut, dhe kemi kërkuar që asgjësimi i tij të bëhet nën mbikëqyrjen e AUV-së. Ushqimi në fjalë është i prodhuar për viça, jo për lopë qumështore, prandaj nuk ka të bëjë me qumështin. Në mish aflatoksina nuk grumbullohet: organizmi i kafshës e zbërthen dhe e nxjerr jashtë brenda pak ditësh (Instituti Gjerman për Vlerësimin e Rrezikut, BfR). Dhe sipas Manualit Veterinar Merck, viçat përballojnë nivele dhjetë herë më të larta se ai i këtij loti. Në këto rrethana, aflatoksina nuk kishte asnjë rrugë për të shkaktuar rrezik. Burimet i gjeni në komente.
Vlerësojmë se mënyra e hartimit dhe publikimit të komunikatës së AUV-së, veçanërisht theksimi i rrezikut kancerogjen pa një shpjegim të mjaftueshëm të rrethanave konkrete dhe nivelit të ekspozimit, është joproporcionale dhe krijon alarm të panevojshëm në opinionin publik. Konsiderojmë se një institucion publik ka përgjegjësi që informacionin ta paraqesë me saktësi shkencore, objektivitet dhe kontekst të plotë. Mospasqyrimi i masave të menjëhershme të ndërmarra nga MONUNI krijon pasiguri te publiku dhe një perceptim të njëanshëm të rastit, duke rrezikuar të cenojë padrejtësisht besimin dhe reputacionin që kompania jonë ka ndërtuar përgjatë 30 viteve.
Fermerët nga e gjithë Kosova na besojnë që nga viti 1996, me ta jemi rritur edhe ne. Për vite si Fauna dhe që nga viti 2020 ribrenduar si MONUNI, me shumë nga të njëjtët njerëz. Standardin për të cilin na besojnë, ne e kërkojmë edhe nga furnitorët tanë. Kujdesi ynë për ta nuk ka ndryshuar që nga dita e parë, dhe nuk ndryshon as sot. Këtu do të jemi edhe nesër, për fermerët dhe për kafshët e tyre.
Nëse diçka nuk ju është e qartë, ose thjesht doni të flisni me dikë nga ne, shkruani këtu në komente ose na dërgoni një mesazh; po të na lini numrin, ju telefonojmë vetë. Çdo pyetje është e mirëseardhur.
MONUNI SH.P.K.
Gjilan, 6 nëntor 2026