06/11/2020
ياريت يا جماعة ناخد بالنا من شوية حاجات بسيطة واحنا داخلين على فترة حرجة كلها مشاكل فى التربية .
مش هيبقى أسعار و أمراض كمان..
و ياااريت محدش يغتر بالفترة اللى فاتت إنه طلع أوزان عالية ، مع أقل نافق ،
ياريت تقعد مع نفسك و تفتكر إيه الفيروس اللى حضرتك متعود تشوفه و بيصيب فراخك كل سنة فى الفترة ما بين شهر 12 حتى آخر شهر 3 .. و ركز في البرنامج بتاع التحصينات عليه .. يعني ركز على الفيروس ده بالذات .. و خد بالك من شوية حاجات بسيطة
🔴 لو إنت متعود على التكتيم على الفراخ و بتستمر فى التكتيم مع تذبذب حراري هتلاحظ ان غالبا بتبدأ بميكوبلازما في نهاية الأسبوع التالت و يدخل بعدها مباشرة فيروس النيوكاسل في نهاية الأسبوع الرابع ، لأن التكتيم بيقلل الاكسجين جداً فى المكان و تزيد رطوبة الفرشة و تزود نسبة الأمونيا نتيجة تعفن الفرشة و ده بيطلع غاز بيعمل على تآكل الخلايا المبطنة للمجارى التنفسية اللى تعتبر حائط صد ضد الامراض التنفسية كلها ..
🔴 أما بقى لو حضرتك متعود على التهوية العالية او الزايدة عن اللزوم و مُصِر عليها هتلاحظ ان الزائر الرخم لمزرعتك هو فيروس الـ( IB ) لأن فى الغالب الفراخ عندك بيمر عليها تيارات هوا باردة وده أخطر شيئ وسبب قوى للاصابة بفيروس الـ( IB ) .. علشان كده لازم تركب شفاطات و تتعلم التهوية بالحد الأدنى..
🔴 اما لو حضرتك من النوع اللى بيدفى الفراخ كويس جدا بالليل ويقفل بوعي ،لكن يصحى الصبح بدرى يلاقى ريحة العنبر وحشة يروح فاتح الشبابيك فجأة علشان يهوى للفراخ، هتلاحظ فى الغالب ان احتمال الاصابة عندك تكون بالانفلونزا نتيجة الفرق الكبير فى درجة الحرارة بصورة مفاجئة .
🔴 الخلاصة
١ - إلتزم بدرجات الحرارة المطلوبة دون تذبذب..
٢-إلتزم بالحد الأدنى من التهوية.
______________________________________________
ياريت بلاش تثق فى الأمان الحيوى ثقة مطلقة بقدر ما تثق في الرعاية الجيدة ، لأن للأسف مش هتقدر تمنع الفيروسات من دخول مزرعتك لأنها قادرة على المرور من ثقوب ورقة البفرة (بجد والله مش هزار ) وموجودة فى كل إنش على ظهر هذا الكوكب منتظرة سلوكك المتناقض و رعايتك السيئة علشان تضرب
