20/01/2026
مذمتی بیان
نوشکی پولٹری ڈیلرز ایسوسی ایشن کی جانب سے ہم اس امر کی شدید الفاظ میں مذمت کرتے ہیں کہ ضلع چاغی سے تعلق رکھنے والی مرغی لے جانے والی گاڑی کو بلاجواز پولیس نوشکی انتظامیہ کی جانب سے گزشتہ تقریباً نو (9) گھنٹوں سے روکے رکھا گیا ہے۔ شدید سردی کے باعث گاڑی میں موجود مرغیاں مر رہی ہیں، جس سے نہ صرف پولٹری فارم مالکان کو بھاری مالی نقصان کا سامنا ہے بلکہ یہ عمل سراسر ناانصافی، اختیارات کے ناجائز استعمال اور عوامی روزگار پر ضرب کے مترادف ہے۔
ہم سوال کرتے ہیں کہ آخر کس قانون اور کس جواز کے تحت ایک قانونی اور جائز کاروباری سرگرمی کو اس طرح روکا گیا؟ اگر فوری طور پر اس غیر ذمہ دارانہ رویے کا نوٹس نہ لیا گیا تو نقصانات کی تمام تر ذمہ داری نوشکی انتظامیہ اور متعلقہ پولیس پر عائد ہوگی۔
ہم کمشنر رخشان ڈویژن سے پُرزور مطالبہ کرتے ہیں کہ وہ اس سنگین معاملے کا فوری نوٹس لیں، گاڑی کو بلا تاخیر روانہ کرنے کے احکامات جاری کریں اور ذمہ دار اہلکاروں کے خلاف کارروائی عمل میں لائی جائے۔
واضح کیا جاتا ہے کہ نوشکی پولٹری ڈیلرز، چاغی کے پولٹری فارم مالکان کے ساتھ شانہ بشانہ کھڑے ہیں۔ اگر اس ناانصافی کا سلسلہ جاری رہا تو کسی بھی قسم کے احتجاج یا دیگر سخت فیصلوں کی صورت میں ہم اپنے ساتھیوں کو تنہا نہیں چھوڑیں گے، اور اس طرح کے اقدامات کو کسی صورت برداشت نہیں کیا جائے گا۔
ہم امید کرتے ہیں کہ اعلیٰ حکام فوری مداخلت کرتے ہوئے انصاف فراہم کریں گے اور کاروباری طبقے کو مزید نقصان سے بچائیں گے۔
جاری کردہ:
نوشکی پولٹری ڈیلرز ایسوسی ایشن
