30/05/2025
Magnanakaw ng Manok sa Central Luzon, Arestado sa San Ildefonso, Bulacan.
CAMP JULIAN OLIVAS, Pampanga. --
Arestado ang dalawang armadong magnanakaw ng panabong na manok sa checkpoint ng pulisya sa San Ildefonso, Bulacan.
Sa ulat na nakarating kay Brig. Gen. Jean Fajardo, Central Luzon police director, kinilala ang dalawa na si Charles, 41 taong gulang, residente ng Sta. Rita, Olongapo City at alyas Eduard, 32 taong gulang, residente ng New Cabalan, Olongapo City.
Ayon kay Col. Franklin Estoro acting provincial director ng Bulacan lumalabas sa inisyal na imbestigasyon na ang may-ari ng isang gamefarm sa Purok 6, Sitio Busitik, Barangay Umpucan, San Ildefonso, Bulacan ay nag-ulat sa lokal na pulisya na bandang 5:30 ng umaga noong Huwebes ay nagising sila sa tahol ng kanilang mga a*o at napansin ang isang puting van na gumagala sa labas ng kanilang manukan.
Pagkaraan ay natuklasan nilang nawawala ang ilan sa kanilang mga panlabang manok.
Agad na naglabas ng flash alarm para sa nasabing sasakyan ang lokal na pulisya at sa mga namamahala sa mga checkpoints.
Bandang alas-7:50 ng umaga ng araw ding iyon, pinababa ng mga tauhan na namamahala sa isang checkpoint sa Barangay Maasim, bayan ng San Ildefonso ang isang puting van na tumutugma sa ibinigay na paglalarawan na iniulat sa lokal na pulisya.
Sa visual search, nakita ng mga checkpoint personnel ang isang Mexican box na naglalaman ng 10 fighting c**k sa loob ng van.
Sa karagdagang inspeksyon ng sasakyan, nakita ng mga operatiba ng pulisya sa plain view ang isang Smith & Wesson Springfield caliber .38 revolver sa likod ng front passenger seat, at isang hand gr***de sa likod ng driver's seat at agad na inaresto ang mga suspek.
Ang police visibility at checkpoints na iniutos ni Brig.Gen. Fajardo sa rehiyon ay malaking tulong upang maaresto ang mga magnanakaw, dagdag ng isang opisyal ng pulisya.
