16/12/2024
Ei trist oppdatering frå oss idag:
Me i Vossaponni har den siste veka måtta ta ei vanskeleg avgjersle, og la vår fine Gotlandsruss Vekselsbankens Bless på 19 år få trava over regnbogebrua.
Ho hadde eit uhell for rundt 2 veker sidan, der ho sklei i uteområdet på utegangen under leik med dei andre ponniane, og vart halt og tydeleg smertepåverka. Ho vart sett på bokskvile på ein lokal stall ilag med Bron og fekk fleire veterinærvisittar. Også eit frå Bergen kor veterinæren Maria Lindborg hadde med røntgen apparat.
Ved analyse av røntgenbileta vart det oppdaga at ho hadde fleire brot i hasen, og alternativet vart enten ein større operasjon med transport til Austlandet og lang opptreningstid,- utan nokon form for garanti om ein vellukka operasjon og med stort sannsyn for at ho alltid ville vera halt og dermed aldri heilt bra igjen,- eller å la ho få sleppa og vandra til dei evige grøne enger.
Etter nøye overveiing landa me diverre på det siste alternativet.
Me ynskjer derfor å dele våre gode minner med dykk fylgjarar om Bless si tid hjå oss.
Me var så heldige at Vekselbanken ville støtta oss med ein ponni i 2020. Vekselbankens Bless kom til oss med transport ifrå Trøndelag ein sommardag i 2020, som ein særs god kjøreponni.
Ho hadde over 70 starter i ponnitravløp bak seg, og mange gode plasseringar.
Ho vart født i Sverige i 2005 og hadde gode år i Østersund, før ho kom over grensa til Steinkjer i 2013.
Her fortsatte ho å imponera på travbanen. Ho var 15 år når ho kom til oss i 2020.
Ho var ein lettkøyrd og villig ponni, og lett å bli glad i og borna og ungdommane syns det var stor stas å få køyra ho og ri ho.
I 2021 deltok ho også på Noregs største hesteutstilling som gjekk av stabelen på Voss kor me stilte ut to av våre ponniar.
Vekselbankens Bless med Mathilde Bakketun Kyte som kusk og utstillar og dei fekk 2. premie både på utstilling og køyreprøven. Køyreprøven hadde eit snitt på 7,8 av 10 moglege poeng. Mathilde fekk premie som beste junior på køyreprøven.
Vekselbankens Bless fekk også 1.kvalitet og var med i kampen om å verta dagens hest.
Dei siste månadane såg me diverre at ho var ferdig med ponniskulelivet, og me hadde derfor tenkt å selge ho vidare til nokon som kunne ha ho som ein einmannsponni.
Slik skulle det diverre ikkje gå.
Ho var kanskje til tider litt sær, men ho var flink å gje tydelege teikn når det var noko ho ikkje likte.
Ho var den ponnien som kanskje var enklast å lesa og forstå når det var noko ville eller ikkje ville.
Mange born og unge lærte hestens språk godt å kjenna i møte med ho.
Hennar fine, underdanige og snille vesen og gode auge gjorde at ho fekk ein stor plass i hjartet til mange av oss.
Tusen takk til alle de som har delt mange gode minner og opplevingar med Vekselbankens Bless opp igjennom åra ❤️
Tusen takk til Voss Veksel- og Landmandsbank ASAsom gav oss Bless ❤️
Tusen takk til Hestavangen Dyreklinikk, Veterinær Maria Lindborg og alle de som bidrog til godt stell av Bless på hennar siste dagar og som var med å gje ho ei verdig avslutting på livet ❤️
Og tusen takk til Bless, for vennskapet og alle gode minner!
Me vil sakna ho mykje! ❤
Håper ho no spring lett og ledig og glad igjen på dei evige og grøne enger. ❤️
