06/06/2026
👍
"Гар хаздаг, юм мэрдэг нохойг яах вэ?"
Таны хүсэн хүлээсэн, тоглоом шиг л гарын аясаар байна гэж төсөөлсөн гөлөг анх илэх үеэс л гар хазаж, гэртээ авчирсны дараа яг л Журассик Паркийн махчин динозавр шиг😈 таныг хойноос чинь элдэн хөөж гар, хөл хазаж, замдаа тааралдсан бүхнээ хазаж, мэрж эхэлдэг. Энэ нь хэвийн үзэгдэл. Хүн гараараа бүх зүйлийг барьж танилцдаг шиг гөлөг амаараа эд юмстай танилцана.
Гэвч энэ үйлдлийг өөгшүүлж болохгүй. Гөлөгнүүд хоорондоо тоглож байхдаа нэг нь чанга хазангуут орилж тоглохоо больдог. Хэсэг хугацааны дараа дахиад л тоглож байгаа харагдана. Дахин чанга хазахад хазуулсан нэг нь зугтаж тоглохоо болиход хазсан гөлөг чанга хазвал тоглохоо болихыг ойлгодог. Яг үүнтэй адил та гөлөгтэйгээ тоглож байхдаа гар хазаж эхлэнгүүт 'Боль!' гэж чанга хэл, 10-20 секунд орхиод, дахиж тоглохдоо хазангуут дахин хэлж 10-20 секунд холд. Үргэлжлүүлэн тоглохдоо дахин чанга хазтал нь тоглож, гөлөг удаан тоглохын тулд хазахгүй байх ёстойг ойлготол энэ үйлдлээ хийгээрэй. Гөлгөндөө сонирхолтой олон тоглоом авч өгч, хүний гар хөлөөр биш тоглоомоор тоглох ёстойг ойлгуулаарай.
Чангаар хэлээд ч үр дүнгээ өгөхгүй байгаа чихгүй толгойнуудад🙉зориулж хазаад байгаа гар, хөлөндөө гашуун амттай зүйл (зориулалтын цацлага, түрхлэг) түрхэж болно. Нохой хүнтэй адил чихэрлэг, шорвог, исгэлэн болон гашуун амт мэдэрдэг. Нохой гашуун амтанд дургүй байдаг ч цөөхөн нэг нь харин ч эсрэгээрээ дуртай байдаг. Гашуун амттай зүйлээ маш багыг аманд нь түрэж үзэхэд нохой чинь толгойгоо сэгсэрч, шүлс нь гоожиж байвал дургүй байна гэсэн үг. Хазаж, мэрэхээс сэргийлсэн гашуун цацдаг шингэнийг гэртээ хийж болно. 2 аяга лимоны шүүс, 1 аяга цагаан цуу шүршдэг саванд хийж сайтар сэгсрэхэд л бэлэн болно. Шингэнээ тавилганы хөл, ирмэг гээд мэрж болохуйц бүх зүйл рүү цацаж (үүний хамт 'Боль!', ''Болохгүй!' гэдгээ байнга хэлэх хэрэгтэй) 2-4 долоо хоног болоход нохой дахин очиж үнэртэхээс өөр үйлдэл хийхээ болино.
Гөлөг юм мэрж хазах нь гурван шалтгаантай: Шүдлэх, энергиэ шатаах болон хэт ядарсан үедээ мэрж, хазна.
-Шүдлэх: Хаздаг тоглоом хөргөгчинд хийж хүйтрүүлээд гөлгөндөө хазуулбал шүдэлж байгаа буйлных нь өвдөлтийг намжаадаг.
-Энерги шатаах: Буцалж байгаа их энергийг нь хөдөлгөөнөөр алга болгох хэрэгтэй. Энэ нь ямар ч хяналтгүйгээр сул тавиад дураар нь байлгана гэсэн үг биш. Хамтдаа алхах, хаздаг тоглоом хазуулах, юм шидэж тоглуулах гэх мэтээр зөв ядраах хэрэгтэй.
-Хэт ядраах: Шинэ эзэд гөлгөө үргэлж ноолж, эрхлүүлж хашлага, торондоо орж унтаж амрах цаг өгдөггүй. Гөлөг яг л нярай хүүхэд шиг маш олон цагаар унтах хэрэгтэй. Гөлөгтэйгээ хангалттай тоглож ядраасан бол заавал унтах цаг өгөөрэй.
Ядарч сульдсан гөлөг юм мэрж хазахаас гадна муухай ааш гаргаж эхэлдэг. Тиймээс гөлгөө стрессдүүлж ядраалгүй дараагийн бие засах, босч тоглох хүртэл нь амраaгаарай🙂
