25/09/2026
ခွေးချစ်သူတွေနဲ့ ရုပ်ရှင်ကြည့်ဝါသနာရှင်တွေအတွက် စိတ်ဝင်စားဖွယ် ခွေးဇာတ်ဆောင်တွေ အဓိကပါဝင်တဲ့ နာမည်ကြီး ရုပ်ရှင် ၁၀ ကားအကြောင်းကို ပြောပြပေးချင်ပါတယ်။
လူသားတွေထက်တောင် ပိုပြီး အသက်ဝင်တဲ့ သရုပ်ဆောင်စွမ်းရည်ပြသထားတဲ့ ဒီလိုဇာတ်ကားတွေက ငိုစရာကနေသည်းထိတ်ရင်ဖို horror ဇာတ်လမ်းတွေအထိ စုံလင်လှပါတယ်။
ရုပ်ရှင်တစ်ကားစီရဲ့ ထူးခြားချက်တွေကို ခွေးချစ်သူတွေနဲ့ ရုပ်ရှင်ကြည့်ဝါသနာရှင်တွေအတွက် တင်ပြပေးလိုက်ပါတယ်
၁။ Antarctica (၁၉၈၃)
၁၉၅၈ ခုနှစ်တုန်းက ဂျပန်ရဲ့ တောင်ဝင်ရိုးစွန်း သုတေသနစူးစမ်းရေးအဖွဲ့ ရာသီဥတုဆိုးရွားလို့ အရေးပေါ် ဆုတ်ခွာခဲ့ရချိန်မှာ ဆာကာလင် ဟတ်စကီး (Sakhalin huskies) ခွေး ၁၅ ကောင်ကို သံကြိုးနဲ့ချိတ်ပြီး စွန့်ပစ်ခဲ့ရတဲ့ ဖြစ်ရပ်မှန်ကို အခြေခံထားပါတယ်။
ခွေး ၈ ကောင်က သံကြိုးကနေ လွတ်မြောက်ပြီး ပြင်းထန်လွန်းတဲ့ ရာသီဥတုဒဏ်ကို ဘယ်လို ရုန်းကန်ရင်ဆိုင်ခဲ့ကြလဲဆိုတာ ရိုက်ကူးထားတဲ့ သဲထိတ်ရင်ဖိုဇာတ်ကား ဖြစ်ပါတယ်။ နာမည်ကြီး ဂရိတေးသံရှင် Vangelis ရဲ့ တေးသွားတွေနဲ့အတူ ဂျပန်မှာ အောင်မြင်မှု အကြီးအကျယ် ရရှိခဲ့ပါတယ်။
၂။ Cujo (၁၉၈၃)
နာမည်ကြီး စာရေးဆရာ စတီဗင်ကင်း (Stephen King) ရဲ့ ဝတ္ထုကို ပြန်လည်ရိုက်ကူးထားတဲ့ သည်းထိတ်ရင်ဖိုဇာတ်ကားပါ။ ခွေးရူးရောဂါစွဲကပ်ပြီး ရက်စက်ကြမ်းကြုတ်လာတဲ့ စိန့်ဘားနတ် (St Bernard) ခွေးကြီးတစ်ကောင်ရဲ့ ဘေးကနေ လွတ်မြောက်ဖို့ ကားပျက်ထဲမှာ သားအမိနှစ်ယောက် ပိတ်မိနေတဲ့အကြောင်းကို ရိုက်ကူးထားပါတယ်။ တကယ့်ခွေးတွေအပြင် စက်ရုပ်အရုပ်တွေနဲ့ ပေါင်းစပ်ရိုက်ကူးထားခြင်းဖြစ်လို့ နှစ်ပေါင်းများစွာကြာပေမဲ့နာမည်ကြီးနေဆဲပါပဲ။
၃။ Hachiko (၁၉၈၇)
သစ္စာတရားနဲ့ပတ်သက်ရင် ဂျပန်နိုင်ငံက အာကိတာ (Akita) ခွေးလေး ဟာချီကို (Hachiko) အကြောင်းကို မသိသူမရှိသလောက်ပါပဲ။ တိုကျိုမြို့ ရှီဘူယာဘူတာရုံနားမှာ သူ့ရဲ့သခင် ပါမောက္ခကြီးကို နေ့တိုင်းစောင့်ဆိုင်းတတ်ပြီး၊ သခင်ကွယ်လွန်အပြီး ဆယ်စုနှစ်တစ်ခုနီးပါး ဆက်လက်စောင့်ဆိုင်းခဲ့တဲ့ ရင်နင့်စရာ သစ္စာတရားကို ပုံဖော်ထားတဲ့ ရုပ်ရှင်လက်ရာတစ်ခုပါ။ အခုအထိ ရှီဘူယာဘူတာရုံအပြင်ဘက်မှာ သူ့ရဲ့ကြေးရုပ်ကို အမှတ်တရအနေနဲ့ တည်ဆောက်ထားပါတယ်။
၄။ Fluke (၁၉၉၅)
လူ့ဘဝကနေ ခွေးဘဝနဲ့ ပြန်လည်ဝင်စားလာတဲ့ ခွေးပေါက်စလေး "Fluke" ရဲ့ အကြောင်းကို ရိုက်ကူးထားတဲ့ မိသားစုဆန်ဆန် စွန့်စားခန်းဇာတ်ကားပါ။ သူ့ရဲ့ မူလမိသားစုဆီ ပြန်သွားပြီး ချစ်ရတဲ့ဇနီးနဲ့ သားလေးကို ရှာဖွေဖို့ ကြိုးစားပုံတွေကို ဟာသနှောပြီး ရိုက်ကူးထားပါတယ်။ မက်သရူ မိုဒင်း (Matthew Modine) နဲ့ ဆန်မြူဝယ်လ် ဂျက်ဆင် (Samuel L. Jackson) တို့က အဓိကဇာတ်ကောင်တွေရဲ့ အသံနဲ့ ပါဝင်အားဖြည့်ပေးထားပါတယ်။
၅။ White God (၂၀၁၄)
ဟန်ဂေရီနိုင်ငံက ထွက်ရှိခဲ့ပြီး ကန်းရုပ်ရှင်ပွဲတော်မှာ ဆုရရှိခဲ့တဲ့ ဇာတ်ကားပါ။ မျိုးစပ်ခွေးတွေကို အခွန်ကောက်မဲ့ကာလတစ်ခုမှာ အိမ်ရှင်ကစွန့်ပစ်လိုက်တဲ့ ဟေဂျန် (Hagen) ဆိုတဲ့ ခွေးလေးက လမ်းပေါ်မှာ ရုန်းကန်ရင်း လူတွေကို ပြန်လည်တော်လှန်တဲ့ ခွေးမျိုးစုံရဲ့ တော်လှန်ရေးအကြောင်းကို ထူးထူးဆန်းဆန်း တင်ဆက်ထားပါတယ်။
၆။ A Dog’s Purpose (၂၀၁၇)
ဘဝပေါင်းများစွာ ကူးပြောင်းပြီး မွေးဖွားလာတဲ့ ခွေးတစ်ကောင်ရဲ့ ဘဝခရီးလမ်းမှာ မူလပိုင်ရှင်လေး အီသန် (Ethan) ကို ပြန်လည်ရှာဖွေရင်း ခွေးဘဝရဲ့ တကယ့်ရည်ရွယ်ချက်က ဘာလဲဆိုတာ ရှာဖွေပုံကို ရိုက်ကူးထားပါတယ်။ ကြည့်ရှုသူတွေကို မျက်ရည်ကျစေတဲ့ စိတ်နှလုံးကို ထိရှစေမဲ့ ရုပ်ရှင်တစ်ကားပါပဲ။
၇။ Little Q (၂၀၁၉)
မျက်မမြင်လမ်းပြခွေးလေး "Little Q" နဲ့ စိတ်ဓာတ်ကျနေတဲ့ စားဖိုမှူးတစ်ဦးတို့ရဲ့ ခိုင်မာတဲ့မေတ္တာတရားကို ပုံဖော်ထားပါတယ်။ ဂျပန်ဇာတ်ကားဟောင်း Quill ကို ပြန်လည်ဆန်းသစ်ရိုက်ကူးထားခြင်းဖြစ်ပြီး မျက်မမြင်လမ်းပြခွေးတွေရဲ့ လေ့ကျင့်ရေးအကြောင်းအရာတွေကို အသေးစိတ်တင်ပြထားပါတယ်။
၈။ 777 Charlie (၂၀၂၂)
အိန္ဒိယကန်နာဒါဘာသာနဲ့ ထွက်ရှိခဲ့တဲ့ နာမည်ကြီး ရုပ်ရှင်ပါ။ ရက်စက်တဲ့သားဖောက်ခြံကနေ ထွက်ပြေးလာတဲ့ လာဘရာဒို ခွေးမလေးကို စိတ်လက်မပါဘဲ မွေးစားမိတဲ့ တစ်ကိုယ်တည်းသမား စက်ရုံလုပ်သားတစ်ဦး၊ အဲဒီနောက် ဟိမဝန္တာ တောင်တန်းတွေဆီ သူတို့နှစ်ဦးရဲ့ စွန့်စားခန်းခရီးစဉ်တွေကို တင်ဆက်ထားပြီး တိရစ္ဆာန်ညှဉ်းပန်းနှိပ်စက်မှုကို ဆန့်ကျင်တဲ့ အသိပညာလည်း ပေးထားပါတယ်။
၉။ Black Dog (၂၀၂၄)
၂၀၁၈ခုနစ် အိုလံပစ်ပွဲတော်မတိုင်မီ တရုတ်နိုင်ငံ ဂိုဘီသဲကန္တာရဘက်က မြို့ငယ်လေးတစ်ခုမှာ ထွက်ပြေးနေတဲ့ ခွေးဆိုးတစ်ကောင်ကို ဖမ်းဆီးဖို့ တာဝန်ပေးခံရတဲ့ အကျဉ်းသားဟောင်း လန်း (Lang) နဲ့ အဲဒီခွေးတို့ရဲ့ ထူးခြားတဲ့သံယောဇဉ်ကို ရိုက်ကူးထားပါတယ်။ သရုပ်ဆောင် အက်ဒီပင်း (Eddie Peng) က ရိုက်ကူးရေးပြီးဆုံးချိန်မှာ အဲဒီခွေးလေးကို မွေးစားခဲ့ပါတယ်။
၁၀။ Good Boy (၂၀၂၅)
ဒါရိုက်တာ ဘန်လီယွန်ဘတ် (Ben Leonberg) က သူ့ရဲ့ခွေးလေး အင်ဒီ (Indy)ကို ခေါင်းဆောင်အဖြစ် ပါဝင်ခိုင်းထားတဲ့ သည်းထိတ်ရင်ဖိုရုပ်ရှင်ပါ။ နယူးယောက်ကနေ တောတွင်းအိမ်လေးတစ်လုံးကို ပြောင်းလာကြပြီး ပိုင်ရှင်ဖြစ်သူ ကျန်းမာရေးချို့တဲ့လာချိန်မှာ အိမ်ထဲက ထူးဆန်းတဲ့ သဘာဝလွန် ဖြစ်ရပ်တွေကို ခွေးလေးအင်ဒီက ရင်ဆိုင်ကာကွယ်ပုံကို ရိုက်ကူးထားပါတယ်။ အဲဒီဇာတ်ကားနဲ့ အင်ဒီက Astra Film Awards မှာ သဲထိတ်ရင်ဖိုဇာတ်ကားတွေအတွက် "အကောင်းဆုံးသရုပ်ဆောင်ဆု" ကို ဆွတ်ခူးနိုင်ခဲ့ပါတယ်။
ဒီလိုရုပ်ရှင်တွေထဲက ကိုယ်ကြိုက်နှစ်သက်မဲ့ရုပ်ရှင်တွေကို အားလပ်ရက်မှာ ကြည့်ရှုဖို့ ရွေးချယ်နိုင်ပါတယ်။ အခုဆောင်းပါးထဲက မိတ်ဆွေတို့ ကြည့်ဖူးတဲ့ရုပ်ရှင်တွေရှိရင်လည်း ပြောပြပေးပါဦး။
Ruslan Myo
Ref; South China Morning Post
#ခွေးချစ်သူများ #ရုပ်ရှင်ညွှန်း #ရုပ်ရှင်သုံးသပ်ချက် #ခွေးဇာတ်ကားများ
If you like this content, please support us by sharing the original post instead of copying.
