25/09/2025
#ခွေးကလေးများနှင့်ခြင်ဆေးခွေအန္တရာယ်
မိတ်ဆွေဟာခွေးကလေးမွေးထားပြီး မိမိကလေးကို ခြင်ကိုက်မှာစိုးလို့ ခြင်ဆေးခွေ ထွန်းပေးတာမျိုးတွေ လျှပ်စစ်ခြင်ပြေးဆေးအသုံးပြုတာမျိုးတွေလုပ်နေမိနေပြီလား။ ဒါဆိုရင်အလျှင်အမြန် ဒီအမူအကျင့်ကိုပြင်ဆင်ရပါမယ်။
ခြင်ဆေးခွေ တွေဟာများသောအားဖြင့် ခွေးကလေးတွေ အတွက် အန္တရာယ်မကင်းပါဘူး။ ခြင်ဆေးခွေမှာ အင်းဆက်ပိုးမွှားတွေကို အာရုံကြော အဆိပ့်အတောက်ဖြစ်စေတဲ့ အင်းဆက်သတ်ဆေး တွေဖြစ်ကြတဲ့
Pyrethrin, allethrin,Meperfluthrin စတာတွေပါဝင်ပါတယ် ။ ထို့အပြင် မီးလောင်ရာမှ ထွက်လာတဲ့ မီးခိုးငွေ့နဲ့ အတူ ဒီလို အင်းဆက်သတ်ဆေးတွေကိုရှု အချိန်ကြာမြင့်စွာရှုရှိုက်မိတဲ့အခါ အဆုတ်၊ အသဲ၊ ကျောက်ကပ်နှင့် ဦးနှောက်တွေမှာ ထိခိုက်လာတတ်ပါတယ်။
တစ်ချို့ခွေးလေးတွေမှာ ခြင်ဆေးခွေထွန်းပေးရာမှတစ်ဆင့် ချက်ချင်းလက်ငင်းကြီး ထိခိုက်မှုကိုမပြသပေမယ့် ၊ အချိန်ကြာမြင့်လာတဲ့အခါမှာတော့ အဆုတ် အသည်းနှင့်ကျောက်ကပ်ပျက်စီးတဲ့ ရောဂါတွေနဲ့ အသက်ဆုံးရှူံးရတတ်ပါတယ်။ စာရေးသူရဲ့ ခွေးလူနာတစ်ဦးဆိုလျှင် သူပိုင်ရှင်က ခြင်ကိုက်မှာစိုးရိမ်ပြီး နေ့တိုင်ခြင်ဆေးခွေးထွန်းပေးရာမှတစ်ဆင့် ကနဦးမှာဘာလက်က္ခဏာမှ မပြပါပဲ လနှင့်ချည်ကြာလာတဲ့အခါ အသည်းနှင့်ကျောက်ကပ်ထိခိုက်ပျက်စီးပြီး အသက်ဆုံးရှူံးဖူးတာကိုလက်တွေ့မျက်မြင်ကြုံခဲ့ရဖူးပါတယ်။
ထို့အပြင် တစ်ချို့ ခွေးကလေးတွေမှာ ခြင်ဆေးခွေကိုစားပစ်တာ ကိုက်ဝါးတာမျိုးတွေလဲ လုပ်တတ်ကြပါတယ်။
ဒီလိုစားမိမယ်ဆိုရင်လဲ အဆိပ့်သင့်တဲ့ လက္ခဏာတွေ ပြလာတတ်ပါတယ်။ ထိုပြင် ခြင်ဆေးခွေဟာ အစာအိမ်နှင့်အူလမ်းကြောင်းကိုလဲထိခိုက်ပျက်စီးစေနိုင်ပါသေးတယ်။
ခွေးကလေးတွေ ခြင်ဆေးခွေကိုစားသုံးမိပါက
(၁) အဆက်မပြတ်သွားရည်ဆက်တိုက်ကြခြင်း
(၂) အန်ခြင်း
(၃) မှိုင်ကြသွားခြင်း၊ အားနည်းလာခြင်း
(၄) ဝမ်းပျက်ဝမ်းလျောဖြစ်ခြင်း
(၅) အစာမစားတော့ခြင်း
(၆) တက်ခြင်းတုန်ခြင်း
(၇) အသက်ရှူရခက်ခဲလာခြင်း
စတဲ့လက္ခဏာတွေပြတတ်ပါတယ်။ ဒီလိုလက္ခဏာတွေပြသရင်တော့
(၁) စိတ်ကိုငြိမ်ငြိမ်ထားပါ
(၂) မိမိခွေးကလေးပါးစပ်ကို ရေသန့်သန့်ဖြင့် ငါးမိနစ်ခန့်ဆေးချပါ။
(၃) မိမိသဘောဖြင့်မည်သည့်အရာမျှ (ရေ/ ဆေး/အစာ) ပါးစပ်ကနေမတိုက်ကျွေးပါနှင့် ။
တိရစ္ဆာန်ဆေးကု ဆရာဝန်ဆီ အလျှင်အမြန်သွားရောက်ပြသ ပြီး ကုသမှုခံယူရပါမယ် ။
#သဘာဝနည်းနဲ့ခြင်တွေကိုဘယ်လိုတားမလဲ?
(၁) ပန်းသီးရှာလကာရည်
ပန်းသရှာလကာရေတစ်ဆ ရေသန့် နှစ်ဆရောပြီး Spary ဘူးထဲထဲ့ကာ မိမိခွေးလေးကို ခြင်ပေါတဲ့ အချိန်တွေမှာ အမွေးပေါ်ဖျန်းပေးထားခြင်းဖြင့် ကာကွယ်နိုင်ပါတယ်။
(၂) တမာရွက်အဆီ
တမာရွက်အဆီကို မိမိခွေးလေးရဲ့ ခန္ဓာကိုယ် ၄ နေရာမှာ တစ်စက်စီချပြီး ပွတ်လိမ်းပေးခြင်းဖြင့် ခြင်မကိုက်အောင်ကာကွယ်နိုင်ပါတယ်။
(၃) သံပုရာဆီ
သံပုရာအဆီကို ရေနဲ့ရောပြီး Spary ဖြန်းပေးခြင်းအားဖြင့်ကာကွယ်နိုင်ပါတယ်။
(၄)ရေစီးရေလာကောင်းအောင်ပြုလုပ်ပါ။
ခြင်တွေက ရေစီးရေလာကောင်းနေတဲ့နေရာတွေမှာ မပေါက်ဖွားနိုင်ပါဘူး ။ ရေသေအိုင်၊ ရေစည် စတဲ့နေရာတွေမှာပဲပေါက်ဖွားတတ်တာမို့ ရေစီးရေလာကောင်းအောင်လုပ်ပေးပါ ၊ ရေကန် ၊ ရေစည်တွေကို ခြင်မဝင်နိုင်အောင် ဖုံးအုပ်ထားတာ ၊ ကလိုရင်းခတ်တာမျိုးတွေလုပ်ပေးနိုင်ပါတယ်။
(၅) ခြင်ထွက်များတဲ့အချိန်အပြင်ထွက်တာရှောင်ပါ
ညနေ နေဝင်ရီတရော ည နေ ၅:၃၀ မှ ၆ နာရီနဲ့ ၇ နာရီအချိန်တွေက ခြင်ထွက်တာအများဆုံးအချိနိမို့ မိမိခွေးကလေးနဲ့အတူ အပြင်ထွက်တာရှောင်ပါ။
(၆) တိရစ္တာန်လေးတွေ အတွက် သီးသန့်ထုတ်ထားတဲ့
ခြင်မကိုက်အောင်ကာကွယ်ပေးတဲ့ Spary လေးတွေ အသုံးပြုပါ။ ဒီလို တိရစ္ဆာန်သုံး ခြင်ပြေး Spary လေးတွေကို ခွေးစာကြောင်စာရောင်းတဲ့ ဆိုင်မှာမေးဝယ်ပါ။
(၇) တိရစ္ဆာန် ဆေးကုဆရာဝန်နှင့်တိုင်ပင်ပါ
ခြင်ကိုက်ခြင်းကတစ်ဆင့် နှလူံးသန်ကောင်ရောဂါကူးစက်နိုင်တာမို့ တိရစ္ဆာန်ဆေးကုဆရာဝန် နှင့် ကြိုတင်ကာကွယ်နိုင်ဖို့တိုင်ပင်ပါ။
Dr Saw Zayar Naing
B.V.Sc(Yzn)
