20/02/2023
Guppy ( ဒေါင်းငါး )
Million fish နှင့် Rainbowfish ဟုလည်း လူသိများသော Guppy (Poecilia reticulata) သည်ကမ္ဘာပေါ်တွင်လူမွေးများဆုံးသောအပူပိုင်းဒေသငါးမျိုးဖြစ်ပြီးရေချိုaquarium လောကတွင် ရေပန်းအစားဆုံးငါးမျိုးစိတ်တစ်ခုဖြစ်သည်။
Guppy အကြောင်းကိုအကျယ်တဝင့် အသိပညာပေး စာများ
ကို သက်ဆိုင်ရာ ပညာရှင်များမှ ဖော်ပြထားပြီး ဖြစ်သော်လည်း လူသိနည်းသောအကြောင်းအရာများကို
အကျဥ်းချုပ်ဖြည့်စွက်၍ ဖော်ပြပေးသွားမည်။
မာတိကာ
၁။ Guppies အချက်အလက်များနှင့် ခြုံငုံသုံးသပ်ချက်
၂။အသွင်အပြင်နှင့် အပြုအမူ
၃။ကန်အပြင်အဆင်နှင့် အခြားလိုအပ်ချက်များ
၄။အဖြစ်များသော ရောဂါများ
၅။ Tank Mates (မိတ်ဖက်ငါးများ)
၆။ အစားအသောက်နှင့်အစာကျွေးခြင်း။
၇။ သားဖောက်ခြင်း ( Breeding )
၈။Guppy Fish FAQs (လူမေးများသော အမေးအဖြေများ)
မာတိကာ
Robert John Lechmere Guppy (1836-1916) အမည်ရ ဗြိတိသျှ သဘာဝပညာရှင်တစ်ဦးသည်၁၈၆၆ခုနှစ်၌ ထရီနီဒက်တွင် guppy များကို ရှာဖွေတွေ့ရှိခဲ့ပြီး၎င်း၏အမည်ကို
ထည့်သွင်းခေါ်ဝေါ်ခဲ့ခြင်းဖြစ်သည်။Poeciliidae အနွယ်၀င် Guppies သည်တောင်အမေရိက အရှေ့မြောက်မှ ပေါက်ဖွားလာသော်လည်း ပတ်ဝန်းကျင် အများအပြားတွင် စတင်တွေ့ရှိခဲ့ပြီး ယခုအခါ ကမ္ဘာအနှံ့တွင် တွေ့ရှိလာရသည်။ ၎င်းတို့သည် အလွန်လိုက်လျောညီထွေရှိပြီး မတူညီသောပတ်ဝန်းကျင်နှင့် ဂေဟစနစ်အခြေအနေများတွင် ရှင်သန်ပေါက်မြောက်ကြသည်။guppyရိုင်းလေးများသည် ယေဘုယျအားဖြင့်ရေညှိများ နှင့် ရေနေအင်းဆက်သားလောင်းများအပါအဝင် အစားအစာအရင်းအမြစ် ရှိသောနေရာအမျိုးမျိုးတွင် ကျက်စားလေ့ရှိသည်။အချင်းချင်းစုဖွဲ့ ကူးခတ်သွားလာကြခြင်းအားဖြင့် ငါးကြီး များနှင့် ငှက်များရန်မှအထိုက်အလျောက် ကာကွယ်နိုင်ကြသည်။အန္တာတိကမှလွဲ၍ ကမ္ဘာ့တိုက်ကြီးတိုင်းရှိ guppies များကို မတူညီသောနိုင်ငံများစွာတွင်အလှမွေးငါးအဖြစ် မိတ်ဆက်ပေးခဲ့သည်။သို့ရာတွင် လူအများစုသည် ယင်း၏အစာအရင်းအမြစ်သည် ခြင်ပိုးလောက်လန်းများ ဖြစ်နေခြင်းကြောင့် ခြင် ပေါက်ပွားမှုကို ထိန်းချုပ်နိုင်ရန် သဘာ၀တွင်စတင် ဖြန်ကျက်ရှင်သန် စေခဲ့ကြသည်။ ငှက်ဖျားရောဂါပျံ့နှံ့မှုကို အတိုင်းတာ တစ်ခုထိ ထိန်းချုပ်နိုင်ရန် ခြင်ပေါက်ပွားနိုင်သောနေရာများတွင်ထားရှိနိုင်ရန်ရည်ရွယ်ခဲ့ကြရာမှ မူလရှင်သန်ရာအရပ်ကို မှားယွင်းအတည်ပြု ကြသည်ကိုလည်း တွေ့ရသည်။
Note...
(ခြင်စားငါး( mosquito fish)နှင့် ဒေါင်းငါး (Wild guppy) ကို အမှတ်မှားမှုများရှိသည်ကိုတွေ့ရသည်။ထို ငါး၂ မျိုး ၏ ကွာခြားပုံကိုအောက်တွင်ဆက်လက်ထည့်သွင်းဖြေရှင်းပြသွားမည်ဖြစ်သောကြောင့် ဆက်လက်ဖတ်ရှု စေလိုပါသည်။ )
၁။ Guppies အချက်အလက်များနှင့်
ခြုံငုံသုံးသပ်ချက်
* Aquarium fishအဖြစ်ရောက်ရှိလာပုံ
သဘာ၀ အတွင်းရှိ wild guppies များကို ကျွမ်းကျင်ငါးမွေးမြူသူများမှ အဆင့်ဆင့် မျိုးစိတ်မြင့်တင်ခြင်းအားဖြင့် အရောင် အသွေး စုံလင်လှသော guppies များကို ကမ္ဘာ့နေရာ အနှံ့အပြားတွင် အမည်ကွဲ များစွာဖြင့် ရောင်း၀ယ် မွေးမြူနိုင်ကြ ပြီ ဖြစ်သည်။အလှမွေးမျိုးစိတ်များသည် wild guppies များထက် အရွယ်အစားပိုမိုကြီးမားသကဲ့သို့ အရောင်အသွေးများ၊အတောင်အလက်များ၊စံသတ်မှတ်ချက်များ စသဖြင့် အဖက်ဖက်မှ သာလွန်စွာ ဆက်လက်ဖြစ်တည်ပေါ်ပေါက်လျက်ရှိနေကြဆဲပင်ဖြစ်သည်။ (မတူညီသော မျိုးစိတ်၂ ခု ကို Cross breeding လုပ်ခြင်းအားဖြင့် ရရှိလာသော မျိုးစိတ် ကို Hybrid ဟု ခေါ်သည်။ )ငါးမျိုးစပ်ခြင်းများတွင် selective breeding , inbreeding, linebreeding, and outcrossing ဟူ၍လည်း အသုံးပြုကြသည်။
( မျိုးစပ်ခြင်းသည် အလွန် ရှုပ်ထွေးများပြားလွန်းသဖြင့်သီးသန့် ခွဲ၍ post တစ်ခု အနေဖြင့်ထပ်မံဖော်ပြရန် ရည်ရွယ်ထားသည်။ )
* အရွယ်အစား နှင့် သက်တမ်း
အရွယ်ရောက်ပြီးသော ငါးများသည် ပျမ်းမျှအားဖြင့် နှစ်လက်မခန့်ရှည်သည်။ ငါးမများသည် ငါးထီးများထက် နှစ်ဆကြီးထွားသည်။ အထီးများသည် အရှည် ၁ ⅛ လက်မခန့် ကြီးထွားကြပြီး အမများသည် အရှည် ၂ ⅛ လက်မအထိ ကြီးထွားကြသည်။ယင်းတို့သည် တောသဘာဝ၌ ၂နှစ်အထိ သက်တမ်း အထိ ရှင်သန်နိုင်သည် ဟု သိရသည်။ ပြည့်စုံကောင်းမွန်သော aquarium tank များတွင် guppyများသည်သားရဲများနှင့်ထိတွေ့နိုင်ချေနည်းသောကြောင့်ပိုမိုအသက်ရှည်သည် ကိုလည်းတွေ့ရသည်။
* စျေးနှုန်းခန့်မှန်းတွက်ဆချက်များ
Guppies များ ကို စျေးကွက် အတွင်းတွင် ၃ ကောင်တစ်ဖွဲ့ ( ၁ ထီး ၂မ)အနေအထားဖြင့် တစ်ဖွဲ့လျှင် ပျှမ်းမျှ ၂၀၀၀ ကျပ် မှ ၃ သောင်း၀န်းကျင်အထိ ရောင်းချကြသည်။မျိုးစိတ်ဆန်းပြားမှု ရှားပါးမှု လှပမှု အပေါ် မတူညီသောစံအမျိုးမျိုးဖြင့်
စျေးနှုန်းများ ကွဲ ပြားသွားကြသည်။
၂။ အသွင်အပြင်နှင့် အပြုအမူ
အသွင်အပြင်
aquariumကန်အတွင်းရှိGuppiesများသည်ရန်လိုခြင်း(သို့) နယ်မြေလုယက်ခြင်း မရှိဘဲ တည်တည်ငြိမ်ငြိမ်ပေါ့ပေါ့ပါးပါးနေတတ်သော ငါးလေးများဖြစ်သည်။သေးငယ်သွယ်လျသော ခန္ဓာကိုယ်ကြောင့် ၎င်းတို့ကို မှတ်မိလွယ်သည်။ မတူညီသော guppies မျိုးစိတ်ခွဲများတွင်၎င်းတို့၏ သီးခြားအရောင်များ၊ အမှတ်အသားများနှင့် အမြီးအမျိုးအစားများရှိသည်။၎င်းတို့ကို အမြီးအမျိုးအစား၊ အရောင်နှင့် မျက်လုံးအရောင်အလိုက် အမျိုးအစားခွဲခြားနိုင်သည်။အသုံးများသော guppy tails အမျိုးအစားများမှာ fantails၊ flag tails၊ round tails၊ spire tails နှင့် veil tails တို့ဖြစ်သည်။ အချို့သော guppies များသည် ရှည်လျားသော အမြီးများရှိပြီး အချို့မှာ တိုတောင်းပြီး ပြားသော အမြီးများရှိသည်။guppies အများစုသည် အနီရောင်၊ လိမ္မော်ရောင်၊ အနက်ရောင်၊ အဝါရောင်၊ အစိမ်း၊ ပန်းရောင်၊ ခရမ်းရောင်၊ ငွေရောင်နှင့် အပြာရောင် စသဖြင့်အရောင်များရှိပြီး နှစ်ရောင်တန်း (သို့)သုံးရောင်တန်းများ၊အစက်အပြောက်များ နှင့် အစင်းကြောင်းများ၊ ဆူးတောင် အတိုအရှည်များမူတည်၍ မျိုးစိတ်အမည်များကိုပိုင်းခြားခေါ်ဝေါ်လေ့ရှိသည်။ အထီးနှင့်အမများကြား အကြီးမားဆုံးကွာခြားချက်မှာအရွယ်အစားဖြစ်သည်။ငါးမများသည်အရွယ်ရောက်သောအခါ ငါးထီးများထက် တစ်လက်မခန့် ပိုကြီးမားသော်လည်းငါးထီးများသည်ငါးမများထက်သွယ်လျပြီးအရောင်လှပကြသည်။စိတ်ဖိစီးလာသော ငါးများသည် အရောင်ဖျော့လာသည်။မျိုးပွားသောအခါတွင် ငါးမများသည် ပုံမှန်ထက် ဗိုက်လုံးဝိုင်းပြီးအရောင်ဖျော့လာတတ်သည်။မိတ်လိုက်ဖော် ရှာသောငါးထီးလေးများမှာမူ အရောင်အသွေးပိုမိုတောက်ပလာကြသည်။
အပြုအမူ
Guppies များသည် အုပ်စုလိုက် ဘေးကင်းစွာ ရေကူးခြင်းကို နှစ်သက်သည့် အေးချမ်းသောငါးများဖြစ်သည်။ ၎င်းတို့သည် လျင်မြန် တက်ကြွသော ရေကူးသမားများအဖြစ် အချင်းချင်း စူးစမ်းရှာဖွေကာ အချိန်အများစုကို ကုန်ဆုံးတတ်ကြသည်။ ငါးထီးများသည်ယင်းတို့၏အလှကို ငါးမအားထုတ်ဖော်ပြသခြင်းကို နှစ်သက်ကြသည်။Guppyများသည်ရန်လိုခြင်းအလွန် နည်းပါးလှသည်။ ကန်၏ အစိတ်အပိုင်းတိုင်းတွင် ကူးခတ်နေကြသော်လည်း ငါးများသည် ရေမျက်နှာပြင်ထိပ်တွင်သာ၎င်းတို့၏အချိန်အများစုကိုကုန်ဆုံးလိုကြသည်။Guppies များ သည်ရေမျက်နှာစာတွင်ရေကူးခြင်းကို နှစ်သက်သော်လည်း ငါးများသည် ရေကစားသည့်အခါ (သို့)ရန်ပြုခံရသည့်အခါများတွင် ဂူများ၊အပင်များကြားတွင်ပုန်းအောင်းနေနိုင်သည်။ Guppies များသည် မှောင်သောအခါတွင် အိပ်စက်ကြပြီး၎င်းတို့ကိုနေ့ခင်းဘက်အစာစားချိန်တွင် အတက်ကြွဆုံးအဖြစ် တွေမြင်နိုင်သည်။
၃။ ကန်အပြင်အဆင်နှင့်အခြားလိုအပ်ချက်များ
* ကန်အပြင်အဆင်
Guppies များသည် ပူနွေးသော ရေချိုပတ်ဝန်းကျင်တွင် ရှင်သန်ကြသည်။ယင်းတို့သည်တောရိုင်းသဘာ၀တွင်အမျိုးမျိုးသောအစာများကိုစားသုံးကြသူများဖြစ်သောကြောင့်အသားဓါတ်နှင့်အသီးအရွက်များအားမျှတစွာအလှည့်ကျ ကျွေးရန်လိုအပ်သည်။Java moss၊ flame moss နှင့် wisteria ကဲ့သို့သောအပင်များသည် guppies များအတွက် လွှမ်းခြုံပေးကာ နိုက်ထရိုဂျင်လည်ပတ်မှုကို အရှိန်မြှင့်ခြင်းဖြင့် ရေကို သန့်ရှင်းအောင် ပြုလုပ်ပေးသည်။ Guppies များသည် ကျောက်စရစ်ခဲများနှင့် ဂူများကြားတွင် ပုန်းအောင်းဆော့ကစားခြင်းကို နှစ်သက်ကြပြီး ဂူများသည် guppies များအတွက် စူးစမ်းစရာ အဖြစ် ရှိနိုင်သည်။သဘာ၀ မြစ်ကြမ်းပြင်အောက်ခြေနှင့် ကိုက်ညီရန် သဲ (သို့) ကျောက်ဆောင်အလွှာများကိုအသုံးပြုပါ။ ငါးများသည် ကန်အောက်ခြေတွင် အချိန်ကုန်ခဲသောကြောင့် guppies အတွက် မြေလွှာသည် အရေးမကြီးပေ။
* အခြားလိုအပ်ချက်များ
ရေအမျိုးအစား : ရေချို
စည်အရွယ်အစား : အရွယ်ရောက် ငါးတစ်ကောင် လျှင် အနည်းဆုံး 5 ဂါလံနှင့် ရေ 10 ဂါလံ ကြား
ရေအပူချိန် : 74-82ºF
မြေလွှာ : သဲ၊ ကျောက်ဆောင်၊အပင်များ
PH level : 6.8-7.6 pH
ရေသိပ်သည်းဆ : 12-18 dkH
ရေသန့်စင်စနစ် : မရှိမဖြစ်မလိုအပ်သော်လည်းကန် ရေအရည်အသွေးကိုထိန်းသိမ်းရန်အတွက်အသုံးပြုသင့်ပါသည်။
Bubbler : Oxygen စက်မဖြစ်မနေထည့်သွင်းရမည်။
အလင်းရောင် : အလင်းလိုအပ်ချက် မြင့်မားသော အပင်များ စိုက်ထားလျှင် အပင်များအတွက်သာ လိုအပ်သည်။out door ကန်များတွင် မလိုအပ်ပါ။အိပ်စက်ချိန်အတွက် မီးပိတ်ပေးရန် မဖြစ်မနေလိုအပ်ပါသည်။
ရေအပူပေးစက် : အပူချိန်အတက်အကျများကို ကာကွယ်ရန်နှင့် စံအပူချိန်(74 - 82°F)ကို ထိန်းသိမ်းပေးရမည်။ဖြစ်နိုင်မည်ဆိုလျှင် Guppiesများသည်အခြားငါးများထက် ပိုမိုမာကျောသော်လည်း ရောဂါ(disease)နှင့် စိတ်ဖိစီးမှု (stress) ဖြစ်နိုင်ချေများကိုလျှော့ချရန်တသမတ်တည်းရှိနေသောကန်အခြေအနေများကိုထိန်းသိမ်းထားရန်လိုအပ်သည်။
ရေလဲလျှင် ၃ပုံ ၁ ပုံ ခန့်သာ ပြောင်းရမည်။
၄။ အဖြစ်များသောရောဂါများ
A. ပရိုတိုဇွမ်း(protozoan)ရောဂါ
ပရိုတိုဇန်းရောဂါကိုဂက်ပီများကြားတွင် အဖြစ်များသောကြောင့် ရောဂါကို “ဂပ်ပီရောဂါ” ဟုပင်ခေါ်ကြသည်။ အဆိုပါရောဂါသည် Tetrahymena sp ဟုခေါ်သော ပရိုတိုဇိုးကပ်ပါးပိုးကြောင့် ဖြစ်ပွားခြင်းဖြစ်သည်။ရေအရည်အသွေး ညံ့ဖျင်းခြင်း သို့မဟုတ် ရေအပူချိန်လုံလောက်မှု မရှိသောအခါ ဖြစ်တတ်သည်။ပရိုတိုဇိုးအန်ရောဂါ၏ လက္ခဏာများမှာ အစာစားချင်စိတ် ဆုံးရှုံးခြင်း၊ အသက်ရှုကျပ်ခြင်း နှင့် အကျိအချွဲများ ပိုလျှံခြင်းတို့ ဖြစ်သည်။ ရေအခြေအနေများကို မြှင့်တင်ပေးပြီး ရေအပူချိန် 74-82ºF အကွာအဝေးအတွင်းထားရှိခြင်းဖြင့် ရောဂါကို ကုသနိုင်သည်။
B. Ich (မှိုစွဲခြင်း)
Ich သည် guppies အပါအဝင် ရေချိုအလှမွေးငါးအားလုံးကို ထိခိုက်စေသည့်ငါးရောဂါတစ်မျိုးဖြစ်သည်။ ich ပါသောငါးတစ်ကောင်သည် ၎င်း၏ခန္ဓာကိုယ်ပေါ်တွင် အဖြူရောင်အစက်အပြောက်များရှိနေမည်ဖြစ်ပြီး ကန်အတွင်းရှိကြမ်းတမ်းသောမျက်နှာပြင်များနှင့် ၎င်း၏ခန္ဓာကိုယ်ကိုပွတ်တိုက် နေမည်ဖြစ်သည်။Ich သည် Ichthyophthirius multifiliis ဟုခေါ်သော ကပ်ပါးပိုးကြောင့် ဖြစ်ပွားပြီး ရောဂါ၀င်နေသောငါးများကို သီးသန့်ခွဲထားကာ ရေအပူချိန်ကို နှစ်ဒီဂရီတိုးပေးခြင်းဖြင့် ကုသနိုင်သည်။ ငါးကန်ရေ၏ ငါးဂါလံတိုင်းတွင် ဆားတစ်ဇွန်းကို (၂၀ ဂလံလျှင် ၄ဇွန်း) အရည်ဖျော်ထည့် ပေးခြင်းသည်လည်း ယားယံခြင်းကို သက်သာစေပါသည်။
C. Fin Rot နှင့် Tail Rot
ရှည်လျားပြီး စီးဆင်းနေသော ဆူးတောင်များပါရှိသော guppyများသည် ဆူးတောင်ပုပ်ခြင်းနှင့် အမြီးပုပ်ခြင်းများ ဖြစ်နိုင်သည်။ ဤဘက်တီးရီးယားပိုးကူးစက်မှုသည် စိတ်ဖိစီးမှုများ၊ကန်ရှိငါးများ၏ တိုက်ခိုက်ခံရခြင်းများနှင့်ရေသတ်မှတ်ချက်များ မကိုက်ညီခြင်းကြောင့် ဖြစ်ပေါ်လာခြင်းဖြစ်သည်။
ဆူးတောင်ပုပ်၏ လက္ခဏာများမှာဆူးတောင် သို့ အမြီးများတွင် အရောင်ဖျော့သော သို့မဟုတ် နို့နီရောင်ဖြစ်ပြီး စုတ်ပြဲခြင်း၊ ကျိုးပဲ့ခြင်း၊တိုခြင်း တို့ ဖြစ်ပေါ်နေတတ်သည်။ကုသနည်း အနေဖြင့် ဗန်ဒါရွက်ရည် ဆား တို့ ပါ၀င်သော ရေတွင်
ရက်အတန်ကြာထားပေးရန်လိုအပ်သည်။အက်စစ်ဓာတ်မြင့်မား သော ရေသည် အနာဆွေးများကို ဖယ်ရှားပေးပြီး ငါး၏
Recover ပေါ်တွင်သာမူတည်သည်။နောက် တစ်နည်းမှာ
တက်ထရွာစိုက်ကလင်းဆေး ထည့်ထားသောရေတွင် Bubble အနည်းငယ်မျှ ဖွင့်ပေးခြင်းဖြင့်လည်း ကုသနိုင်သည်။ဆေးပမာဏကို ချိန်ဆရန် အတွေ့အကြုံ ရှိသူများထံတွင်တိုင်ပင်ပါ။ပျောက်ကင်းရန် အချိန် ၄ ရက် မှ ၆ ရက် အတွင်းလိုအပ်သည်။ကျော်လွန်နိုင်သွားပါက ထပ်မံဖြစ်ပွားနိုင်ချေနည်းသည်။
D. Anchor worms
Anchor worm သည် အမှန်တကယ်တွင် သန်ကောင်များမဟုတ်သော်လည်း ငါး၏အရေပြားထဲသို့ မြုပ်ဝင်သွားပြီး အရေပြားမှ ကပ်နေသော သန်ကောင်နှင့်တူသော အမြီးပါရှိသော crustacean copepod ကပ်ပါးပိုးဖြစ်သည်။ဖြစ်ပွားရခြင်းအကြောင်းသည် သန့်စင်သောရေမရှိခြင်း ၊အစာအကြွင်းအကျန် များကို မဖယ်ထုတ်မိခြင်း၊ ရေအပူချိန် ကျဆင်းလွန်းခြင်း အလင်းရောင်မရပဲ မှောင်လွန်းခြင်းများတွင်
Anchor worm များ ဖြစ်ပေါ် လာစေသည်။ အရွယ်မရောက်ခင် အချိန်ထိ ငါးကိုယ်တွင် ထိုးစိုက်ခြင်းမျိုးမပြုလုပ်ပဲ ငါးများနှင့်အတူကူးခပ်နေနိုင်သည်။အရွယ်ရောက် အဆင့်ရောက်ရှိသွားမှသာလျှင် ကိုယ်တွင် ထိုးစိုက်ကာ ကပ်ပါးသန် ကောင် အဖြစ်သို့ ပြောင်းလဲ သွားမည်ဖြစ်သည်။ထို အဆင့်သို့ရောက်ရန်အလွန်ကွာဝေးလွန်းလှသည်။ ရေသန့်စင်စနစ်မရှိပါက ငါးကန်ရေ ၃ ချိုး ၁ ချိုး ၃ရက် တစ်ကြိမ် ခန့် လဲပေးခြင်းမျိုးပြုလုပ်သင့်သည်။ဖြစ်ပွားသည်ကို တွေ့ရှိပါက ဆွဲနှုတ်ခြင်းမျိုး ပြုလုပ်ရန် မသင့်ပါ။အခြားငါးကြီးများတွင် ဆွဲနှုတ်သည့်ဒဏ်ကို ခံနိုင်သော်လည်း guppy ကဲ့သို့ သေးသွယ်သော ငါးများတွင် သေဆုံး နိုင်ချေများလွန်းသည်။ ကုသနည်း အနေဖြင့် Potassium permanganate ဆေးအား ရေ ၁ လီတာခန့်တွင် ၂၅ mg ခန့် ရော၍ ရောဂါဖြစ်နေသောငါးများအား နာရီ၀က်ခန့် စိမ်ပေးခြင်းဖြင့် anchor worm များသေဆုံးစေနိုင်သည်။ ဆေးဒဏ်သည် ကပ်ပါးပိုးနှင့်အတူ ရောဂါ ၀င် ငါးပါ ခံရမည်ဖြစ်သောကြောင့်ငါး၏ခံနိုင်အားအပေါ် စောင့်ကြည့်ပေးရန် လိုအပ်သည်။ကုသခြင်းသည် အရွယ်ရောက်ငါးများ အပေါ်တွင်သာ အလုပ်ဖြစ်နိုင်ချေများသည်။သားပေါက်များတွင် ဖြစ်ပွားပါကရှင်သန်နိုင်ချေအလွန်နည်းသည်။
၅။ Tankmates (မိတ်ဖက်ငါးများ)
Guppies သည် အခြားငါးမျိုးစိတ်အများစုနှင့် လိုက်ဖက်သောငါးများဖြစ်သည်။ သို့သော်လည်း guppy၏သေးငယ်သောအရွယ်အစားသည် ရန်လိုသောငါးများအတွက် ပစ်မှတ်ဖြစ်စေပြီး ငါးကြီးများအတွက် အစာအရင်းအမြစ်ဖြစ်စေနိုင်သည်။Guppy များသည် တစ် ကောင်နှင့်တစ် ကောင် စုဖွဲ့ရခြင်းကို နှစ်သက်ကြပြီး အနည်းဆုံး သုံးယောက် ရှိရန်လိုအပ်သည်။ထို့ကြောင့် အခြားငါးများကို မဝယ်မီ ကန် အတွင်း၌ လုံလောက်သောကန်အကျယ်နှင့် ငါးအရေအတွက်ရှိပြီးမှသာလျှင် အခြားငါးမျိုးစိတ်များအား ထည့်သွင်းရန် အကြံပြုလိုပါသည်။ Guppies သည် ကန်ထိပ်နားတွင် ကူးခတ်တတ်သောကြောင့် ငါးများအချင်းချင်း ထိ တွေ့မှု မဖြစ်စေရန် အလယ်နှင့် ကန်အောက်ခြေတွင် ကူးခတ်တတ်သော အဖော်များကို ရွေးချယ်သင့်သည်။
အဖော်များအနေဖြင့်
Cardinal tetras
Cory catfish
Harlequin rasboras
Mollies
Dwarf chain loaches
Rummy nose tetras
Kuhli loaches
Sparkling gouramis
Zebra danios တို့ကို ရွေးချယ်နိုင်သည်။
၆။ အစားအသောက်နှင့် အစာကျွေးခြင်း
တောရိုင်းများတွင်၊ guppies များသည် ငါး၏နေထိုင်ရာနေရာရှိ အစာရရှိနိုင်မှုအပေါ် မူတည်၍ ရေညှိများ၊ ကျောရိုးမဲ့များ၊ အင်းဆက်သားလောင်းများနှင့် သက်ရှိအမှုန်အမွှားများကိုစားသောက်ကြသည်။ထို့ကြောင့် ရေပိုးဖြူ၊ရေပိုးနီ၊အာတီမီးယား၊ရေတီ၊သွေးတီ၊ပရိုတင်းမြင့်မာသောငါးစာခြောက်များကို အသားဓါတ်အတွက်ကျွေးသင့်ပြီးစပီရိုလိုင်းနား ကဲ့သို့ ရေညှိများသခွားသီး၊ဂေါ်ဖီ၊ဟင်းနုနယ်ရွက်များကို ပြုတ်ကျွေးသင့်ပြီး အသီးအနှံများအနေဖြင့်ထောပတ်သီး၊ငှက်ပျော်သီး၊သြဇာသီးကဲ့သို့ အသီးပျော့များကို ရံဖန်ရံခါကျွေးနိုင်သည်။ ကြက်သွန်ဖြူ သည်ဆောင်းတွင်းမှိုလိုက်ခြင်းကို အတော်အသင့်ကာကွယ်နိုင်သော အစာဖြစ်သည်။ပြုတ်၍ဖြစ်စေ၊အစိမ်းကိုကြိတ်ထားသောအမှုန်ဖတ်များအဖြစ်ဖြစ်စေကန်အခြေနေပေါ်မူတည်၍ ကျွေးနိုင်သည်။ငါးများကိုနှစ်မိနစ်အတွင်းစားနိုင်သော ပမာဏ သာကျွေးသင့်ပြီး ငါးပေါက်လေးများအတွက်မူ တစ်နေ့လျှင် နှစ်ကြိမ် အစာကျွေးသည့်အချိန်ဇယားကို သတ်မှတ်ထားသင့်သည်။အရည်အသွေးကောင်းရေကိုထိန်းသိမ်းနိုင်ရန် အစားအစာအကြွင်းအကျန်များကို ဖယ်ရှားရန် မမေ့သင့်ပါ။
၆။ သားဖောက်ခြင်း (Breeding)
ကျန်းမာသန်စွမ်းသော အထီး ၁ ကောင်နှင့် အမ ၃ ကောင်ကို
၁၀ ဂါလံဆန့်သော ကန်တွင်ထားပါ။ငြင်သာသော ရေသန့်စက်နှင့် ရေပေါ်ရေအောက်ပင်အချို့ထားပါ ။ များမကြာမီ အချိန် အတွင်း အမများနှင့် အထီး သည် ရင်းနှီးလာပြီး မိတ်လိုက်ကြမည်ဖြစ်သည်။အမပမာဏ ၃ဆ များအောင် ထည့်ထားခြင်းသည် ငါးမများ stress သက်သာစေရန် ဖြစ်သည်။ ငါးမနည်းပါက ငါးမသည်ငါးထီးအား ပြန်လည် သေဆုံးသည်အထိ(ကြုံတောင့်ကြုံခဲ)တိုက်ခိုက်တတ်သည်။ရေအပူချိန် ကို ၇၉ F တွင်ထားရန်လိုအပ်သည်။ငါးမများအား အသားဓါတ်များသော အစာရှင်များ ကျွေးရန်လိုအပ်သည်။ ငါးမများဗိုက်အိုးရှိ အနက်ရောင်အကွက်သည်အရောင်ပိုမိုရင့်လာပါက ကိုယ်၀န် လွယ်ထားရပြီဟု သိနိုင်သည်။၂၆ရက် မှ ရက်၃၀ အတွင်းသားပေါက်လာမည်ဖြစ်သည်။ထို့ နောက် ငါးမများအား breeding tank များအတွင်း သီးခြားထည့်၍ ငါးပေါက်လေးများကို ပြန်စားမည့်ရန်မှ အပြည့် အဝကာကွယ်နိုင်သည်။ ထို၂၆-၃၀ ကာလတွင်း ငါးမအား အစာရှင်များကို ၃ ကြိမ်မှ ၅ ကြိမ်အတွင်း ကျွေးမွေးသင့်သည်။ Breeding tank မရှိပါက ကန်သည်Guppy ninja grass, Fanwort,hornwort ကဲ့သို့ ရိုးတံရှည် အပင်များဖြင့် ပြည့်ညပ်နေအောင်ထားပြီး ငါးမအား ရွေ့လျားရမလွယ်အောင်ထားသင့်သည်။ငါးမအနေဖြင့် ရွေ့လျားရ ခက်ပါက သားပေါက်များ ရှောင်တိမ်း ရလွယ်ကူ သောကြောင့်သားပေါက်တင်ကျန်နှုန်းကောင်းနိုင်သည်။သားပေါက်များအား ပြန်လည်စားသောက်ခြင်းမရှိသော မိခင်ငါးများတွေ့ရတတ်သော်လည်းပိုမိုသေချာစေရန် ဂရုတစိုက်လုပ်ဆောင်သင့်သည်။ သားပေါက်လေးများသည်အကောင် ၃၀ မှ ၆၀ အတွင်း ပေါက်ဖွားလာနိုင်သည်။သားပေါက်များ ကုန်စင်အောင် ပေါက်ပွားပြီးပါက ငါးမ ကို ဖယ် ၍ ငါးပေါက်လေးများအား အာတီမီးယားကဲ့သို့ အစာရှင် များကျွေးရန် အလွန်အရေးကြီးသည်။ ကောင်းမွန်စွာကူးခပ်သွားလာနိုင်သော အခြေအနေတွင် မူလ ကန် တွင် ရောနှောမွေးမြူနိုင်ပါသည်။
၈။Guppy Fish FAQs (လူမေးများသော အမေးအဖြေများ)
Q1.
Guppy တွေ က ဥကနေပေါက်ကြတာလား ?
Ans: LIVEBEARERS တွေ ဖြစ်လို့
အကောင်လိုက်ပေါက်ကြတာပါ။
Q2.
GUPPIES တွေဟာ အိပ်စက်တတ်ကြသလား ?
Ans:
နေ၀င်ရင် အိပ်ကြပြီး နေထွက်ရင်ပြန်နိုးလာကြပါတယ်၊အနည်းဆုံး မီးပိတ်ချိန် ၆ နာရီကနေ ၈နာရီအတွင်းရှိသင့်ပါတယ်။
Q3.
Guppy တွေဘယ်လိုအိပ်စက်သလဲ ?
Ans:
မီးများပိတ်ထားသည့်အခါ ငါးသည် ရေကူးခြင်းကို ရပ်သွားကာ မလှုပ်ရှားတော့ပေ။ Guppiesများသည် သင့်ကန်၏အောက်ခြေရှိ မြေအောက်အလွှာ၊ အပင်အရွက်များ၊ အလှဆင်ထား သောအရာများပေါ်တွင် သို့မဟုတ် ရေမျက်နှာပြင်တွင် အိပ်စက်အနားယူတတ်ကြပါသည်။
Q4.
Guppy တွေကို molly တွေနဲ့ မျိုးစပ်ပြီး hybrid ဖောက်လို့ ရနိုင်ပါသလား?
Ans:
Guppies နှင့် Mollies တို့သည် မှန်ကန်သောအခြေအနေတွင် ထိန်းသိမ်းထားမည်ဆိုပါက hybrid များကို အလွယ်တကူ ဖန်တီးနိုင်သည်။ hybrid အမျိုးအစားနှစ်မျိုးအတွက် အမည်နှစ်မျိုးရှိသည်။ Guppy အထီးနှင့် အမျိုးသမီး Molly မှ မျိုးစပ်ထားသော hybrid ကို Golly ဟုခေါ်ပြီး Molly အထီးနှင့် အမျိုးသမီး Guppy မျိုးစပ်ထား သော hybrid ကို Muppy ဟုခေါ်သည်။
နိဂုံး
အချုပ်အားဖြင့် ပြောရမည်ဆိုလျှင် သင်သည်အပျော်တမ်းမွေးမြူသူ ဖြစ်ပါက ယခု ဖော်ပြပါ စာတမ်းသည် သင့်နှင့် guppy များ အကြားနားလည်မှု အထိုက်အလျောက် ရရှိပြီး
မွေးမြူခြင်းတွင် အဆင်ပြေနိုင်ပြီ ဖြစ်သည်။သို့သော် guppies အထူးပြုမွေးမြူချင်သူ ဖြစ်ပါက မျိုးတန်းများမြင့်ခြင်း၊မျိုးသစ်များ ဖော်ဆောင်ခြင်း၊မျိုးအရည်အသွေးထိန်းထားခြင်း စသောအကြောင်းအမျိုးမျိုးကို မြန်မာနိုင်ငံရှိ စိတ်ထားပြည့်ဝသော Guppies specialist များထံမှသင်ယူ လေ့လာသင့်သည်။
________________________________________________
ကျန်းမာသန်စွမ်းသော Guppyလေးများကို ပိုင်ဆိုင်ကြစေရန်ရည်ရွယ်လျက်ကောင်းနိုးရာရာအချက်လက်များကို စုစည်းဘာသာပြန်ဆိုပေးလိုက်ရပါသည်။
Data - Via Internet
Photos collected from internet.
Translated by
Page link :
https://www.facebook.com/profile.php?id=100089438601605&mibextid=ZbWKwL
Scott Sai Aquarium .
ထပ်ဆင့်ကူးယူချင်သူများအနေဖြင့်
Page link ကို မဖြစ်မနေ ထည့်သွင်းပေးကြပါရန် ။
