22/05/2026
ယူရီးယားမြေဩဇာ ရည်ညွှန်းဈေး တစ်လအတွင်း ကျပ် ၆၀၀၀၀ ကျော် မြင့်တက်
ယခု မေလအတွက် ယူရီးယားမြေဩဇာ(အလုံးကြီး) ၅၀ ကီလိုတစ်အိတ်၏ ရန်ကုန်အထိုင် လက်ကားရည်ညွှန်းဈေးနှုန်းမှာ ယခင်ဧပြီလနှင့် နှိုင်းယှဉ်ပါက ကျပ် ၆၀၀၀၀ ကျော် မြင့်တက်လာကြောင်း မြန်မာနိုင်ငံ မြေဩဇာ၊ မျိုးစေ့နှင့် စိုက်ပျိုးရေးဆေးလုပ်ငန်းရှင်များအသင်း၏ ထုတ်ပြန်ချက်အရ သိရသည်။
ပြီးခဲ့သည့် ဧပြီလတွင် ယူရီးယားမြေဩဇာ(အလုံးကြီး) ၅၀ ကီလိုတစ်အိတ်ကို ကျပ် ၉၄,၀၀၀ သတ်မှတ်ထားခဲ့သော်လည်း အခု မေလတွင် တစ်အိတ်လျှင် ကျပ် ၁၅၇,၀၀၀ အထိ သတ်မှတ်လိုက်ခြင်းဖြစ်ပြီး တစ်လအတွင်း ကျပ် ၆၃,၀၀၀ မြင့်တက်လာခြင်း ဖြစ်သည်။
ထို့ပြင် DI Ammonium Phosphate အခြေခံ ၁၅ ပတ်လည် ၅၀ ကီလိုတစ်အိတ်ကို ကျပ် ၁၁၅,၀၀၀ ဖြင့်သာ ဆက်လက်သတ်မှတ်ထားသဖြင့် ယခင်လနှင့် နှိုင်းယှဉ်ပါက ဈေးနှုန်းပြောင်းလဲမှု မရှိကြောင်း သိရသည်။
Complex ၁၅ ပတ်လည် မြေဩဇာအတွက်မူ ယခုလတွင် ရည်ညွှန်းဈေးနှုန်း သတ်မှတ်ထားခြင်း မရှိကြောင်းလည်း အသင်း၏ ထုတ်ပြန်ချက်တွင် ဖော်ပြထားသည်။
အဆိုပါ ရည်ညွှန်းဈေးနှုန်းများကို ယူရီးယားမြေဩဇာ ဝယ်ယူဖြန့်ဖြူးရောင်းချရေး ဦးဆောင်ကော်မတီ၏ ကြီးကြပ်မှုဖြင့် ထုတ်ပြန်ခြင်းဖြစ်ပြီး မေလ ၁ ရက်မှ ၃၁ ရက်အထိ ရန်ကုန်အထိုင် လက်ကားဈေးနှုန်းအဖြစ် အသင်းဝင်ကုမ္ပဏီများအား ရောင်းချသွားရန် ညွှန်ကြားထားကြောင်း သိရသည်။
ထုတ်ပြန်ထားသည့် ဈေးနှုန်းများမှာ ရန်ကုန်အထိုင် လက်ငင်းငွေချေစနစ် လက်ကားဈေးနှုန်းများဖြစ်ပြီး ဒေသအလိုက် သယ်ယူပို့ဆောင်စရိတ်များအပေါ် မူတည်ကာ ဈေးနှုန်းကွာခြားနိုင်ကြောင်းလည်း ထုတ်ပြန်ချက်တွင် ဖော်ပြထားသည်။
