Cyno

04/02/2022

E puer Gedanken dozou, wéi a wou een en Hond richteg a legal a sengem Auto transportéiert. Eigentlech e banalt Thema, an trotzdem ginn hei nach ëmmer deels katastrophal a liewensgeféierlech Feeler gemaach.

25/01/2022

Spillen ass fir Muppen extrem wichteg. Ech erklären Iech firwat, wéi Spillverhalen funktionéiert a wéi Dir richteg mat Ärem Mupp spille kënnt.

15/01/2022

Wee kennt dat net? Et wëll ee säin Hond zeréckruffen, mee iirgendwéi klappt dat net. Entweder de Mupp schalt op Duechzuch a lauschtert guer net no oder e léisst sech nawell gudd Zäit um Wee fir zeréck.

An dëssem Video erklären ech Iech, wourun dat kéint leien, a wat een anescht maache kann, fir de Réckruff vum Hond ze verbesseren.

23/06/2021

Ech wollt mech dann och emol rem eng Kéier zu Wuert mellen. Klenge Walk and Talk ouni Script vum schéinen Iechternacher Séi.

01/05/2021

[Buchempfehlung]

Katzen würden Mäuse kaufen (Schwarzbuch Tierfutter) - Hans-Ulrich Grimm

Heyne Verlag

241 Säiten

Des Kéier mol eppes Aneres. Dëst Buch ass net fir schwaach Nerven. Den Auteur, dee jorelaang Investigativjournalismus iwwer modern Ernierung a Liewensmëttelproduktioun fir Mënsche bedreift, widmet sech an dësem Buch dem Thema vun der kommerzielle Produktioun vun Déierefudder. Seng Erkenntnisser sinn deelweis erschreckend, deelweis einfach nëmmen degueulasse. Trotzdeem sinn ech der Meenung, dass een sech als Déierebesëtzer mat dem Thema ausernee setze sollt. An dësem Buch steet alles wat een zum Thema wësse wëll (oder och net). An eppes sief verroden: déi grouss Marken, egal ob giel, blo-wäiss oder déi mauve fir Kazen, kommen alleguer net gutt ewech.

(Dëss Buchempfehlungen sinn meng eege Meenung, ech ginn net dofir bezuelt oder gesponsert an domat ass et och keng Reklamm.)

27/04/2021

Muppe brauche vill Rou iwwert den Dag, 16 bis 18 Stonnen, woubäi dat bei Welpen a Senioren och gäre mol bis zu 22 Stonne ka ginn. Déi Rou ass awer net nëmme rengen Déifschlof, mee och de sougenannte Liichtschlof, bei dem de Mupp zwar schléift, mee innerhalb vu Sekonnen rem voll asaatzbereed ass.

Wann e Mupp iwwer e längeren Zäitraum dëss Rou net kritt, da sinn oft Nervositéit an Hyperaktivitéit d'Folg, änlech wéi bei Kanner - "no midd kënnt topesch". Dofir soll ee grad bei Welpen oder immens aktiven Hënn drop oppassen, dass si genug Rou halen. Wa se dat vu sech aus net maachen, da muss ee se leider heiansdo zu hirem Gléck zwéngen, trainéiere fir am Kierwchen ze bleiwen oder eng Box kafen.

08/04/2021

Ass mäin Hond ze déck?

Änlech wéi bei de Mënschen neigt och d'Hondspopulatioun dozou, e puer Pond ze vill op de Rëppen mat ronderëm ze schleefen. Wéi kann ech awer elo iwwerpréiwen, ob mäi Mupp seng Bikinifigur schonn huet oder ob en awer vläicht e wéineg ofhuele sollt?


Iwwergewiicht ass ongesond, beim Hond wéi beim Mënsch. Bei den Zweebeener soll dat mir awer Wurscht sinn, jiddereen soll sech a sengem Kierper wuelfillen, do erlaben ech mir keen Uertdeel. Bei eise Muppen awer si mir als Propriétaire dofir responsabel, dass si bei beschter Gesondheet sinn a bleiwen, an do spillt Iwwergewiicht leider oft eng Roll. Wärend verschidde Leit et vläicht flott oder amüsant fannen, wann hire Mupp "méi gemittlech" oder en "Chonker" ass, sinn ech e staarke Verfechter dovun, penibel dorop opzepassen, dass e Mupp net ze déck gëtt.


Déi gesondheetlech Folgen vun Iwwergewiicht beim Hond si villfälteg: Problemer mat der Ootmung, Häerz- a Kreeslaferkrankungen, Diabetes, Arthrose a villes méi. Ech erspueren Iech elo ze vill medezinesch Detailer zum Thema. Iwwergewiicht entsteet doduerch, dass méi Kalorien opgeholl wéi verbraucht ginn, den Hond also e Kalorieniwwerschoss huet. Iwwerschësseg Energie gëtt an de Fettzelle gespäichert an als Reserve fir moer Zäiten ugeluecht. Do ass awer de sprangende Punkt: eis Muppe wäerten zimmlech sécher keng moer Zäiten erliewen. Et läit an der Natur vum Hond, fir alles Friessbares opzehuelen, well e jo ni weess, wéini en fir d'nächst eng Kanéngchen ze pake kritt. Leider weess dem Hond seng Natur awer net, dass de Mënsch zweemol den Dag eng voll Schossel Fudder dohistellt. Well vill Muppen also ni wierklech "sat" sinn, gëtt dann nach beim Dësch gebiedelt, hei nach e Wupp vum Teller, do nach e Kichelchen a well e jo sou léif kuckt, gëtt et Owes nach e Schwéngsouer virum schlofen.


Dat, gekoppelt mat ze wéineg Beweegung, féiert séier zum Luxusproblem Fettpolster. Ab wéini ass dat dann awer elo geféierlech? Am Schnëtt kann ee soen, dass 10% iwwer Idealgewiicht schonn als Iwwergewiicht unzegesinn ass, bei 20% schwätze mir vun enger Adipositas (Fettleiwegkeet). A wéi definéiert een d'Idealgewiicht vum Hond?


En Idealgewiicht ze definéieren ass per se schwiereg, well an d'Gewiicht net nëmmen d'Fettmass, mee och zB. d'Muskulatur mat afléisst, déi bekanntlech méi schwéier ass ewéi Fett. E schlanken a gutt bemuskelten Hond ass also gären mol genau sou schwéier, wéi e manner bemuskelten, mee ze décken Hond. Méi einfach ass et, sech un der Optik vum Hond ze orientéieren. Déi ideal Figur huet 3 wichteg Critèren:

1. D'Bauchlinn ass opgezunn an de Mupp huet eng kloer definéiert Taille.

2. Et kann een ouni vill Drock beim Heemelen all d'Rëppe spieren, bei Hënn mat kuerzem Fell sollt een déi lescht 2-3 Rëppe gesinn.

3. Mat moderatem Drock kann ee beim Heemelen d'Wierbelen an d'Hëftknache spieren, mee et soll een se kaum bis guer net gesinn.


Des Critèren variéieren natierlech mat der allgemenger Morphologie vum Hond, grad bei Bulldoggen oder Wandhënn zum Beispill. Passt awer och op, dass Äre Mupp net ze dënn gëtt, och dat ass nämlech net gesond.

Zum Ofschloss nach den einfachste Wee zur Bikinifigur beim Hond: vill Beweegung an eng ugepasste Quantitéit vun héichwäertegem Fudder, mee dozou méi an engem anere Post.

Weist mir Äre Mupp an de Kommentaren an ech soen Iech, wéi et ëm seng Figur steet ;)

05/04/2021

Fencheltéi, Kéis, Gebeesglieser an e Krümel. Wat dat wuel gëtt? 🐶

28/03/2021

[Buchempfehlung]

Mantrailing - A. Grunow & R. Langkau
Kosmos Verlag
191 Säiten

Fir bei den Themen vun der Muppenues an der Auslaaschtung ze bleiwen, wollt ech Iech e Buch zu enger vum Krümel senge Lieblingsbeschäftegunge fiirstellen: de Mantrailing. Mantrailing ass Sichaarbecht, bei där eng gesichte Persoun vum Hond unhand vu senger Gerochsspur ka verfollegt an fonnt ginn.
An dëssem Buch gëtt de Lieser vum absoluten Ufank, iwwer den Opbau, dem Liese vum eegene Mupp bis hin zu komplexe Sichkonditioune begleed a mat villen grapheschen Duerstellungen a Biller gudd encadréiert. Wen also mat sengem Mupp eng nei Erausfuerderung wëll bestreiden, ka sech mat dëssem Buch eng wierklech héichwärteg Informatiounsquell an d'Haus huelen.

(Dëss Buchempfehlungen sinn meng eege Meenung, ech ginn net dofir bezuelt oder gesponsert an domat ass et och keng Reklamm.)

24/03/2021

Ëmmer rëm héiert een, dass en Hond muss ausgelaascht ginn. Mee wat genau heescht dat eigentlech? A wat a wéivill dovun muss ech maachen, fir dass mäin Hond ausgelaascht ass?

Vill Muppe maachen dauerhaft Blödsinn doheem, zerstéiere Miwwelen a Schong, sinn extrem gestresst, bewaachen d'Haus wi wann zu all Moment d'Welt géif ënnergoen oder se féiere sech un der Léngt op wéi d'Aaxt am Bësch. Meeschtens läit dëse Problemer ee Faktor zugronn: Frustratioun. Frustratioun kann duech verschidde Faktoren entstoen, wéi zB. Langweil, Hypernervositéit oder Mëssverständnis duech de Besëtzer. D'Léisung ass oft simpel: den Hond aartgerecht auslaaschten!

Fir dee Mythos direkt aus dem Wee ze raumen: en Hond mat trëppele goen auszelaaschten ass méi oder wéineger onméiglech, op mannst fir all déi Hënn, wou ee wierklech iwwer dat Thema diskutéiere muss. Hënn si vun hirer Natur aus drop ausgeluecht, fir ze lafen. Duech hir speziell gefiedert Gangaart ermidden Hënn net beim Lafen. En Hond, dee sech fräi beweege kann, fällt séier an den Trab, dësst ass dem Hond seng natierlech Gangaart fir Strecken ze maachen, déi ouni Problemer am zweestellege Kilometerberäich den Dag leie kënnen. Un der Léngt trëppelen kann zwar ermiddend sinn, dësst gëllt awer meeschtens éischter fir de Besëtzer ;)

Natierlech brauchen Hënn Bewegung, fir hir Muskulatur ze stärken, sech ausrennen ze kënnen an "d'Zeitung ze liesen", mee wierklech ausgelaascht ass de Mupp duech reng Beweegung net. Generell ass déi Approche fir en Hond kierperlech midd ze maachen net de richtege Wee zur Auslaaschtung. Leider kommen och ëmmer rem Leit op d'Iddi, fir dann einfach eng Ronn mam Ball ze spillen, do leeft den Hond jo sou schéin an ass duerno och ausser Otem. De Problem heibäi ass, dass de Mupp beim Ball hetzen permanent am Juegdverhalen ass; e Verhalen wat den Hond éischter pusht, wéi calméiert. Wen et domat iwwerdreiwt, riskéiert séier, sech e Balljunkie ze schafen.

Auslaaschtung ass also net en "Middmaachen". Auslaaschtung ass zum engen den Hond einfach Hond si loossen; him Fräilaf erméiglechen, e mol buddele loossen oder sech am Bulli wenzelen, schwamme goen oder mat Aartgenossen spillen. Zum aneren ass Auslaaschtung eng aartgerecht Beschäftegung fir den Hond, déi och sengem Charakter a senge Fiirléiwten entsprécht (wat oft un d'Rass vum Hond gebonnen ass). Wann de Besoin u Beweegung schon ofgedeckt ass, dierf een hei gären op Kappaarbecht zeréckgräifen. Dës ass extrem ustrengend fir den Hond mee mécht vill Spaass. Ausserdem hu grad ängschtlech Hënn hei d'Méiglechkeet, fir aus sech erauszewuessen an zesumme mam Besëtzer Aufgaben ze léisen, wat hiirt Selbstbewosstsinn opbaut an d'Bindung stäerkt.

Wat d'Gestaltung vun der Kappaarbecht ubelaangt, kann ee wierklech seng Kreativitéit spille loossen, erlaabt ass, wat Hond a Besëtzer Spaass mécht. Eng gudd Méiglechkeet hei ass zum Beispill de klassesche Gehorsamstraining. Dobäi muss den Hond sech konzentréieren an e léiert och nach Saachen, déi een duerno am Alldag benotze kann. Och d'Bäibrénge vu klengen Tricks a Konschtstécker mécht vill Spaass, vun Trickdog an Dogdance kann ee sech inspiréiere loossen. Wann de Mupp gären mat der Nues schafft, kann een déi verschiddensten Zochte vu Nuesenaarbecht maachen, dozou wërten och nach e puer Posts kommen. Mantrailing, Fährten, Flächesich, Trümmersich, d'Lëscht vu Méiglechkeeten ass laang a facetteräich. (Kleng Warnung zum Thema Nuesenaarbecht: geheit dem Hond net einfach Fudder an eng Wiss fir en et sichen ze loossen! Mir liewe leider am Zäitalter vun de Gëftköderen, an dat Lescht wat een do fuedere wëll, ass dem Hond seng Hoffnung, dass iwwerall Fudder ze fannen ass.) Dësst ass natierlech nach laang net alles, ween Inspiratioun sicht, ka sech am Internet duech honnerte vu verschiddenen Hobbies googlen.

Elo bleiwt just nach d'Fro ze klären, wéivill Auslaaschtung dann genug ass. Och hei gëtt et keng pauschal Aussoh, well dat fir all Hond ënnerscheedlech ass. Wann een awer all Dag eng hallew bis eng ganz Stonn Qualitéitszäit a säin Hond investéiert, huet ee scho wierklech vill gemaach. A bei wem d'Zäit méi knapp ass, dee ka gären e bëssi manner Gassi goen, an dofir mam Hond eventuell ee méi aktiven Hobby ausprobéieren.

Wat maacht Dir sou mat Äre Muppen? Schreiwt mir an de Kommentarer :)

23/03/2021

Leider ass och hei zu Lëtzebuerg dee Problem wäit verbreed, dass Hondsbesëtzer sech géigesäiteg net onbedéngt mat vill Respekt begéinen, dass Hënn bei ongewollte Rencontren net un d'Léngt geholl ginn asw. Loosst eis zesummen eppes dogéint ënnerhuelen!
An dëssem Video vu mengem Ausbildungskolleg Stadtfelle gesitt Dir, wourems et geht. Ech fannen, dat ass eng schéin Bewegung an déi gehéiert och hei zu Lëtzebuerg verbreed. Fir méi Respekt ënner Hondsbesëtzer! Hëlleft all mat, andems Dir dee Post hei einfach deelt, an natierlech och selwer un där Bewegung deelhuelt. 🐶🟡

Der Gelbe Hund, die gelbe Schleife, Gulahund - das heute vorgestellte Prinzip hat viele Namen aber eine Sache gilt für alle gleichermaßen:Es ist eine tolle u...

21/03/2021

D'Nues vum Hond ass e faszinéierend Organ. Am Géigesaz zum Mënsch, dee mat senge 5 Millioune Richzellen éischter begrenzt Kapazitéiten am Richen huet, läit hei de Muppen hir absolut Kinneksdisziplin. Je no Rass hunn Hënn ëm di 220 Millioune Richzellen. Dobäi ass dem Hond seng Nues staark duerchbludd an huet performant Drüsen, déi se permanent fiicht halen, fir Gerochsmoleküler besser opléisen ze kënnen. E weidere, groussen Ënnerscheed zum Mënsch besteet doran, dass Hënn stereo riche kënnen, also mat béide Nueslächer onofhängeg vuneneen verschidde Geréch wouer huelen an differenzéieren. Beim bewosste Schnoffelen stréimt Loft mat bis zu 40km/h duerch d'Muppenues an formt Turbulenzen, déi d'Richleeschtung weider verbesseren. Dobäi kann de Mupp bis zu 300 kuerz Otemstéiss an der Minutt uwenden.
Och am Gehier vum Hond ass villes op Geréch ausgeluecht. Am sougenannten "Riechhirn", wat ca 10% vun der gesamter Gehierleeschtung ausmécht, gi Geréch veraarbecht an ofgespäichert, verschiddener e Muppeliewe laang.
Net direkt mat der Nues verbonnen, mee op d'Opnam vu Sexuallockstoffer spezialiséiert, hu Muppen e speziellt Organ, dat sougenannt "Jacobson'sches Organ". Schwéier Gerochspartikelen léist den Hond am Spaut op an transportéiert se duerch de Mondraum bis zu dësem Organ. De Mënsch huet kee Pendant dozou, dofir kënne mir eis just schwéier an dëse Beräich eraversetzen. Dëse Prozess ass iwwregens och verantwortlech fir dat klassescht Zännklapperen, wat Hënn am Kader vum Sexualverhale gäre mol weisen.

A wisou erzielen ech Iech dat alles? Ganz einfach: Hënn bidden e wansinnegt Potential duerch hir Nueseleeschtung a ginn net fir näischt vu Police, Douane a Rettungsdéngschter genotzt, hunn Beruffer wéi Trüffen opspieren, Gebaier op Schimmel ofsichen oder schaffen als Diabetikerwarnhënn. Och Dir kënnt mat Ärem Mupp Nuesenaarbescht maachen. Zum engen hu vill Hënn do wansinneg Spaass drun, an zum aneren kënnt Dir och a villerlee Hisiicht dovu profitéieren, mee zu dem Thema kënnt eng aner Kéier méi ;)