10/28/2026
පොළොන්නරුව ගල්ලෑල්ල කුසුම්ගල අලි පැටියා වෙනුවෙන්...🙏
කඩිනම් ආධාරක පටි ගිරිතලේ වනජීවී කාර්යාලයට
දින කිහිපයක් තිස්සේ නැගිට ගැනීමට නොහැකිව, වේදනාවෙන් බිම ඇදවැටී සිටින අසරණ අලි පැටවකු පිළිබඳව ඊයේ දිනයේදී අප වෙත තොරතුරු වාර්තා විය. සිරුර ඔසවා ප්‍රතිකාර කටයුතු සිදු කිරීම සඳහා ටොන් පහක බර එසවිය හැකි විශේෂ ආධාරක පටි (Belts) කඩිනමින් අවශ්‍යව ඇති බව දැනගත් වහාම, ඒ සඳහා මැදිහත් වීමට අප තීරණය කළෙමු.
ඒ අනුව, අද උදෑසනම එම අලි පැටියාගේ ප්‍රතිකාර කටයුතු සඳහා අත්‍යවශ්‍ය වූ ආධාරක පටි කඩිනමින් පිටත් කර යැවූ අතර, ඒවා ගිරිතලේ වනජීවී කාර්යාලය වෙත නිල වශයෙන් භාරදීමට කටයුතු සූදානම් කර ඇත. වනජීවී නිලධාරීන් සහ පශු වෛද්‍ය කණ්ඩායම විසින් සිදුකරනු ලබන දැඩි පරිශ්‍රමයට සහයෝගයක් ලබා දෙමින්, මෙම පුංචි පැටියාගේ ජීවිතය බේරාගැනීම අපගේ ප්‍රමුඛ අරමුණයි.
මිනිස් අප මෙන්ම වේදනාව හඳුනන මේ නිහඬ වනජීවීන් වෙනුවෙන් අවශ්‍ය මොහොතේ පිහිටවීම අප සැමගේ මානුෂීය යුතුකමකි. ප්‍රතිකාර ලබන මේ පුංචි අලි පැටියාට ඉක්මන් සුවය ලැබී, ඉතා කඩිනමින් යළිත් දෙපයින් නැගී සිට නිදහසේ සැරිසැරීමට හැකිවේවායි අපි මුළු හදවතින්ම ප්‍රාර්ථනා කරමු.
උපුටාගැනීම : voice of bathiya page ©
