Allirhundar.is

11/01/2026

Það er fátt skemmtilegra en hundaþjálfun í góðum hópi fólks og þessi hópur af fólk sko vá hvað þessi helgi var skemmtileg! Skítkalt, endalaust af hlátri og frábærum æfingum🌟

Fyrstu helgi af tveimur á leitarnámskeiðinu lokið og èg er algerlega orðlaus yfir þeim teymum sem komu ! Frábærir hundar sem eiga framtíðina fyrir sér í leit að fólki 🙂 Læt fylgja með nokkrar myndir 🐾

Meira á insta - johanna1103 📸

05/01/2026

Viðtökurnar við námskeiðinu voru það góðar að ég bætti við öðru leitarnámskeiði sem haldið verður helgina 30.- 31. janúar og 1. febrúar og seinni helgin á því námskeiði verður helgina 7-8 febrúar.

Einungis 1 laust pláss er eftir á því námskeiði ! Ef þú vilt skrá þig sendu tölvupóst á [email protected] - fyrstur kemur fyrstur fær ;)

05/01/2026

🐾Resource guarding og food aggression🐾

Mig langar að skrifa aðeins um fyrirbæri sem heitir resource guarding. Það er ekki til bein þýðing á íslensku en það sem þetta þýðir er að hundurinn vill verja það sem hann telur vera sitt. Þetta getur verið dót, staðir/svæði eða jafnvel einstaklingur. Resource guarding er flókið fyrirbæri og getur orðið að mjög alvarlegri hegðun hjá hundum séu eigendur ekki meðvitaðir um þetta. Nátengt þessu er annað fyrirbæri sem heitir „food aggression“ sem hægt væri að þýða sem „matar árásargirni“. Ekki besta þýðingin en látum hana duga. Þessi atriði eru meðfædd í hundum og eru afleiðing af þróun frá þeim tíma þegar hundar þurftu að verja sitt til þess að lifa af. Þetta er mis sterkt í hundum en þetta er í stærstum hluta allra hundategunda.

Það sem mikilvægast er að vita er að þekkja einkennin. Þetta byrjar oft sem hegðun líkt og að halla sér að eigandanum þegar einhver nálgast hann, þramm fram og til baka framhjá því sem hundurinn telur vera sitt, t.d herbergi eða matardallur, stífna þegar einhver nálgast, urra, glefsa og yfir í það að ráðast á það sem þeim þykir ógna því sem þeir eru að verja. Það er þó langoftast stigsmunur á því hvort þeir ráðist að fólki eða öðrum hundum, langoftast fara þeir í aðra hunda en ekki jafn algengt að þeir gangi jafn langt gagnvart mannfólki.

Hvað á að gera ?

Það sem hjálpar til við að hundurinn byrji ekki að láta undan þessum hvötum er að hann viti það frá upphafi hvað hann á að gera og má gera. Þetta snýst ekki um alfa og omega hundaþjálfun en að mörgu leyti um að við séum leiðtogar og að hundurinn viti að hann geti treyst okkur og að hjá okkur sé hann öruggur og hafi ekki þörf fyrir að verja eitt eða neitt. Þegar hundur er í jafnvægi og leitar til okkar þá er ólíklegt að hann sýni þessi einkenni. Hundar þurfa ramma og líður langbest þegar þeir vita að hverju þeir ganga. Þeir vilja að við séum skýr í tjáningu okkar við þá og því er það okkar að tileinka okkur skýr og einföld samskipti.

Ef hundur er farinn að sýna þá takta að verja það sem hann telur vera sitt þarf að byrja svolítið á byrjuninni. Leggja grunninn að daglegu lífi, hafa rútínu, finna þjálfun og verkefni við hæfi sem hundinum finnst skemmtilegt og leyfa honum að finna þann stað gagnvart umhverfinu að hann þurfi ekki að verja sig.

Á myndbandinu er ég að æfa það sem ég æfi alla hunda í, óháð hvort þeir séu með resource guarding eða ekki. Ég nota skipunina „bælið“ og geri bælið að besta stað í heiminum, þar fá þeir allskonar að naga og fá alltaf mjög góð verðlaun. Þegar þeir eru orðnir flinkir í þessari æfingu bæti ég við áreiti þar til þeir geta það sem sést hér. Fullt af öðrum hundum að borða mat og ef hundurinn er rólegur fær hann enn meiri verðlaun. Þarna lærir hann að ef hann sleppir því að verja matinn sinn fær hann mun meira fyrir sjálfan sig. Svo gildir þarna endurtekning og aftur endurtekning, smám saman lærir hann að bíða bara eftir mér og þá græðir hann meira 😉 Að þjálfa í kringum resource guarding er ekki skyndilausn frekar en annað í hundaþjálfun og mikilvægt er sem fyrr segir að þekkja einkennin og æfa hundinn í því sem hann á að gera og má gera – það er langbesta lausnin sama hvaða hund við erum að þjálfa eða verkefni við ætlum að leysa :)

27/12/2025

💥Gæludýraeigendur treysta á að almenningur fari eftir lögum um notkun flugelda 💥

Seinustu ár höfum við heyrt af atvikum þar sem flugeldar eru sprengdir upp utan leyfilegs tíma og þar af leiðandi bjuggust eigendur ekki við látunum og höfðu ekki tækifæri á að undirbúa dýrin. Eitt af þessum atvikum var þegar hundur var á löglegu lausagöngu svæði, flugeldar voru sprengdir nálægt, hundurinn fældist í burtu endaði á að hlaupa fyrir bíl og lifði það ekki af. 💔

Komum í veg fyrir þessi slys og fleiri með því að fylgja reglugerð um notkun flugelda 🙏

Við viljum hvetja alla sem sækja um leyfi fyrir flugeldasýningu utan leyfilegs tíma að auglýsa sýningarnar MJÖG VEL í hverfishópum viðeigandi hverfis sem og nágrennis. Einnig er sterkur leikur að auglýsa þær inná Hundasamfélaginu.

Deilið að vild ❤️

17/12/2025

Þau sem hafa komið til mín á námskeið eða í einkatíma hafa flest heyrt mig segja - það er ekki til neitt sem heitir "jákvæð styrking eingöngu".

Eitt af því fyrsta sem ég geri er að útskýra mikilvægi þess að skilja þær fjórar undirstöður sálfræðinnar sem nauðsynlegar eru til þess að þjálfa hunda.

Ef við byrjum á jákvæðri styrkingu. Orðið jákvætt í sálfræði þýðir ekki "eitthvað jákvætt eða gott" heldur er skilgreiningin, einhverju er bætt við sem ekki var fyrir. Styrking á hegðun þýðir að hún mun svo aukast í tíðni og ákefð. Það er því mikilvægt að við skoðum samskipti okkar við hundinn, því athygli eins og tal eða snerting getur verið jákvæð styrking fyrir hundinn. Við gætum því óafvitandi verið að auka slæma hegðun í tíðni og ákefð ef við erum að bæta einhverju við hegðunina sem er kannski ekki ákjósanleg. Svo er það auðvitað þannig líka að þegar við gefum verðlaun hvort sem það er leikfang eða nammi fyrir ákveðna hegðun þá erum við auðvitað að styrkja hegðunina líka 🙂

Þá er það jákvæða refsingin - heitasta kartaflan í hundaheiminum ! Má refsa hundum ? Mín reynsla er sú að þetta er misskilið hugtak sem veldur því að fólk hræðist að eiga samskipti við hundinn sinn sem gæti flokkast sem refsing. Í sálfræði flokkast refsing sem eitthvað sem veldur því að hegðun minnkar í tíðni og ákefð. Jákvæð refsing er því skilgreind þannig að við bætum einhverju við hegðun til að auka líkurnar á því að hegðun eigi sér ekki/síður stað í framtíðinni. Að jákvætt refsa hundi getur verið margvísleg. Að kalla hátt nei er jákvæð refsing, - við bætum háværu "nei" við hegðunina og þá eru minni líkur á að sú hegðun eigi sér stað í framtíðinni. Það er góð þumalputtaregla að gera aldrei meira en nóg til þess að stoppa hegðun, þegar hundurinn er hættur þá hættum við - allt umfram það er ofbeldi og á ekki að eiga sér stað. Heilbrigð skynsemi á svo heima hér líkt og annarsstaðar 😉

Neikvæð refsing - þetta er það hugtak sem er ef til vill flóknasta að tileinka sér en engu að síður er það mjög öflugt þjálfunartól til þess að leiðbeina hundi á réttari braut. Neikvæð refsing þýðir að við tökum eitthvað frá sem hundurinn vill. Neikvætt í sálfræði er það þegar eitthvað er tekið frá sem er eftirsóknarvert - líkt og undirrituð upplifði nokkrum sínum í uppeldi að ef ég tók ekki til í herberginu mínu fékk ég ekki að fara í hesthúsið. Þar er tekið af mér það sem mig langar - hesthúsið þar til æskileg hegðun á sér stað - taka til í herberginu. Þetta býr til ótrúlegan hvata ef að við þekkjum hundinn okkar nógu vel til þess að vita hvað honum líkar. Algengt dæmi sem tekið er í greinum er að hundur sem hagar sér illa á hundasvæði er settur inn í bíl og fær ekki að vera með að leika við hina hundana. Þarna kemur inn á það sem ég nefndi áðan, mikilvægt að þekkja hundinn. Það er nefninlega nokkuð algengt að hundar upplifi gríðarmikið óöryggi á hundasvæðum og búi sér til pláss og öryggi með því að haga sér illa. Sé það tilfellið og hann tekinn úr aðstæðunum erum við óvart að styrkja hegðunina og hún eykst í tíðni og ákefð !

Neikvæð styrking er svo mitt uppáhald. Neikvæð styrking er skilgreind þannig að við búum til áreiti og þegar rétt/betri hegðun kemur fram fer áreitið. Gott dæmi um þetta er þegar við erum að kenna taumgöngu. Ef hundurinn togar þá ef til vill stoppum við - þá kemur áreiti / þrýstingur frá taumnum/ólinni og þegar hundurinn bakkar eða labbar svo án þess að toga í tauminn fer áreitið og þá erum við að styrkja hegðunina - sem eykst svo í tíðni og ákefð ! Það má heimfæra þessa hegðun á ýmislegt, þegar við erum að búa til nýja færni í gegnum klikkerþjálfun svo dæmi sé tekið notum við stundum aðferðir eins og mótun og þá búum við til áreiti með því að ýta ofan á lendina á hundinum og ef hann sest sleppum við og bætum svo við umbun / verðlaunum sem er jákvæð styrking. Staðreyndin er nefninlega sú að neikvæð styrking og jákvæð styrking haldast oftar en ekki í hendur þegar við erum að þjálfa 🙂

Ég hvet öll til þess að skoða þessi hugtök og ef þú hefur áhuga á að læra meira og æfa meira - komdu í einkatíma og bæstu í nördahópinn okkar :D

09/12/2025

Mælum með 🐾

Jólaórói Björgunarsveitar Hafnarfjarðar 2025. Sá sjöundi í einstakri röð safngripa með smekklegri vísun í sögu og starf sveitarinnar. Íslensk hönnun og framleiðsla. Óróinn er einnig fáanlegur í jólatrjáasölu okkar í Hvalshúsinu. ATH takmarkað magn.

26/11/2025

🟥Ath ! uppbókað er á námskeiðið 🙏🏻 Ef þú hefur áhuga á að koma á svona námskeið sendu mér línu 🤗

📝Á námskeiðinu förum við yfir hvernig hundar læra, grunninn í þjálfunaraðferðum, leitarvinnu, þrepastig þjálfunar og hvernig við búum til skipanir. Samhliða því verður farið yfir mikilvægi umbunar og samspil eiganda og hunds og hvernig við náum fram samvinnu og trausti í verkefninu !

🗓️Námskeiðið er 2 helgar - kennt verður 9-11 janúar og 17-18 janúar.

🐶Námskeiðið er hugsað fyrir alla hunda - alveg sama hvaða tegund eða aldur ! Allirhundar eru velkomnir, líka þeir sem eiga erfitt með að vera í kringum aðra hunda

⛑️Námskeiðið er fyrir þá sem langar að fara í björgunarsveit og líka þá sem stefna ekki þangað

🌟Námskeiðið endar með verkefni sem verður útskýrt nánar fyrir þátttakendur

📍Námskeiðið verður haldið á Suðurlandi á milli Selfoss og Hellu.

⚡️Staðfestingargjald er 10.000 og er ekki endurgreitt hætti viðkomandi við.

✍️Skráning fer fram á tölvupósti - [email protected]

8️⃣ Aðeins pláss fyrir 8 !

13/11/2025

Takk Flokkur fólksins ! ❤ Nú mega gæludýr vera í fjölbýli - umburðarlyndið gagnvart gæludýrum eykst smátt og smátt 🥰

Ég velti fyrir mér hversvegna menning okkar er komin hingað.
Hversvegna er umburðarlyndi gagnvart einu dýri minna eða meira heldur en öðru. Kannski er það einfalt í útskýringu þegar maður hefur lesið meira en ég gerði í sögutímum í framhaldsskóla en það samanstóð af Eddukvæðum (sem ég skil heldur ekki) og að mig minnir eitthvað varðandi Skúla fógeta en kennarinn var svo stórkostlega leiðinleg að ég lagði það ekki á minnið og féll svo reyndar í kjölfarið ...

En það sem ég velti reglulega fyrir mér afhverju menningin okkar hefur skapað svo lítið umburðarlyndi fyrir umburðarlyndu, trygglyndu, þolinmóðu ferfættu vinum okkar, hundum. Þær kvaðir sem settar eru á hundana og þar með eigendur þeirra hefur í gegnum tíðina orðið samfélagslega samþykkt að þeim mörkum að hundaeigendur sjálfir fylgja áfram í meðvirkni. Fyrir ykkur sem ekki þekkið til skal ég útskýra afhverju það er ekki skrýtið, það er að segja þetta með meðvirknina. Þegar þú ákveður að fá þér hund breytistu ósjálfrátt í annars flokks þjóðfélagsþegn. Þú þarft fyrst að fá leyfi, leyfi frá yfirvöldum til að halda hund. Það er ekki sjálfgefið og í flestum sveitarfélögum er það bannað, svona eins og það er bannað að hafa kind í stofunni hjá þér ef þú býrð í þéttbýli. Nú ef þú vogar þér að fá þér hund búandi í þéttbýli skaltu ekki fá þér meira en tvo. Því það er sko bannað að fá þér fleiri. Fyrir þetta skaltu greiða í kringum 40.000 krónur á hverju einasta ári. Hvað færðu í staðinn ? Þú færð stálheiðarlega ormahreinsitöflu og tryggingu gagnvart þriðja aðila þegar (ekki ef) hundurinn þinn veldur öðrum skaða. Setjum þetta með ormalyfin í samhengi. Það væri hægt að kaupa ormalyf fyrir um það bil 150 hunda fyrir hundaleyfisgjöldin af 2 hundum (ég féll líka í stærðfræði og er of óþolinmóð til að reikna nákvæmt gjald, þið skiljið hvert ég er að fara).
Svo er það umburðarlyndi gagnvart skepnunni sjálfri.

Á einhverjum tímapunkti fórum við líka að gera þá kröfu að dýrið og einstaklingurinn hundurinn má ekki undir neinum kringumstæðum sýna okkur annað en að hafa skapgerð í að ganga einn hring með eiganda sínum í hverfinu og láta sér lynda við börn, ókunnuga, aðra hunda, ókunnuga hunda, öll hljóð og hundar mega heldur ekki sýna hræðslu eða bregðast við með þeim hætti sem þeim er eðlislægt sem jú, oftar en ekki er að bíta.

Það að hundur bíti er eitthvað sem gerist, hundar bíta, stundum bíta þeir fast, stundum bíta þeir laust, stundum bíta þeir afþví að þeir gleymdu sér í smá stund, stundum bíta þeir afþví að þeir vildu passa sig, afkvæmi sitt, verja eiganda, eða bitu vegna sársauka.

Þegar hundur bítur er ekki spurt afhverju, heldur eru lög og reglugerðir á þann hátt að hundurinn er réttlaus og eigandi hans þar með. Hundurinn beit og þá fara heykvíslarnar á loft. Hundurinn skal aflífaður. Í seinni tíð hefur þetta þó breyst örlítið og fólk getur mótmælt ákvörðun um aflífun en eftir situr að menningin, hefðin og reglurnar eru orðnar það sem þær eru í dag.

Hundar bíta, hestar geta slegið og hrekkt, kindur stanga, svín bíta, hænur gogga, kettir klóra, beljur hlaupa á eftir þér og reyna físískt að drepa þig ! En bara hundurinn og hans eigandi þurfa að svara fyrir með lífi sínu sem ákveðið er af yfirvöldum.

Það er eðlilegt að hafa umburðarlyndi fyrir öllum heimsins mögulegu og ómögulegum aðstæðum sem upp geta komið í mannanna samfélagi, hvort heldur sem er gagnvart ofnæmisvaldinum ösp sem plantað er algerlega án þess að greitt sé fyrir það eða ég spurð um kostnað við ofnæmislyf. Pústlausi patrol nágrannans sem mengar hreinu lökin á snúrunum hjá mér eða helvítis kvígunni sem var bara að bera í fyrsta skipti og hélt að hún ætti að drepa mig.... Umburðarlyndi kostar ekkert, deilum því að vild.

Læt fylgja mynd af þessum hesti .... Hann hefur handleggsbrotið mig, hann hefur bitið mig, hann gerði heiðarlega tilraun til að tábrjóta mig en enginn hefur gert kröfu á að gróðursetja hann.

Enda er hann bestur 😅

06/10/2025

Mig langar að deila aftur þessum pósti hér og nú óska ég eftir hugmyndum frá ykkur kæru hundavinir 🐶 Ég er að leita að hundi sem býr yfir þeim eiginleikum sem ég taldi upp í póstinum - tegund skiptir ekki máli :) Veist þú um eða ert sjálfur ræktandi sem lumar á hundi sem gæti hentað í það hlutverk að verða þjónustuhundur ? 🌟

Ég fæ reglulega fyrirspurnir um þjálfun þjónustuhunda og langaði mig að svara nokkrum algengum spurningum um fyrirkomulagið.

Svarið við spurningunni hvort að ég taki að mér þjálfun hunda til hvers kyns þjónustu er - Já.

Ég hef þjálfað hunda til þjónustu fyrir einhverfa, fatlaða og nýjasti hundurinn sem verður afhentur er hundur sem er þjálfaður fyrir einstakling sem er flogaveikur. Mér er það mjög ljúft og skylt að aðstoða fólk til þess að fá hund til þjónustu en það eru nokkur atriði sem þarf að hafa í huga.

Það geta ekki allir hundar orðið þjónustuhundar. Þeir þurfa að hafa eiginleika sem henta því verkefni sem þeir eiga að sinna. Þessir eiginleikar þurfa að vera meðfæddir og er því bara hægt að auka á þessa eiginleika með þjálfun en ekki smíða frá grunni.

Þessir eiginleikar eru til dæmis flokkshvöt, eða sú hvöt sem stýrir því hversu mikið hundurinn sækist í að vera með fólkinu sínu. Þeir þurfa líka að vera opnir, vinalegir gagnvart fólki og mjög taugasterkir.

Það sem við þurfum að veita hundum sem eru efni í þjónustuhund er mjög góð grunnvinna frá ræktanda, að hvolpurinn sé alinn upp inni hjá fjölskyldu - og já þetta er mjög mikilvægt atriði. Mikilvægasta mótunarskeið hunds er frá 6-16 vikna og ef hundur fær ekki örvun, umhverfisþjálfun og breiða, jákvæða upplifun af umhverfinu getum við gert mikinn skaða. Svo heldur þessi þjálfun áfram þar til hundurinn nær 12 - 18 mánaða aldri og hefur sína formlegu þjálfun í það verkefni sem hann er hugsaður.

Ég er með nokkrar fyrirspurnir um þjálfun á þjónustuhundum og því er ég alltaf að líta í kringum mig eftir efnilegum hundum. Ég er líka að líta eftir fjölskyldum sem gætu hugsað sér að verða fósturfjölskylda fyrir þjónustuhundaefni 🙂 Þá yrði hvolpurinn hjá þessari fjölskyldu þar til hann nær aldri í að hefja formlega þjálfun. Ef þú getur hugsað þér að ala upp hvolp máttu endilega senda mér tölvupóst á [email protected].

Myndin er af Eik sem verður afhent á næstu dögum og mun hefja sín störf sem þjónustuhundur.

22/04/2025

Ég fæ reglulega fyrirspurnir um þjálfun þjónustuhunda og langaði mig að svara nokkrum algengum spurningum um fyrirkomulagið.

Svarið við spurningunni hvort að ég taki að mér þjálfun hunda til hvers kyns þjónustu er - Já.

Ég hef þjálfað hunda til þjónustu fyrir einhverfa, fatlaða og nýjasti hundurinn sem verður afhentur er hundur sem er þjálfaður fyrir einstakling sem er flogaveikur. Mér er það mjög ljúft og skylt að aðstoða fólk til þess að fá hund til þjónustu en það eru nokkur atriði sem þarf að hafa í huga.

Það geta ekki allir hundar orðið þjónustuhundar. Þeir þurfa að hafa eiginleika sem henta því verkefni sem þeir eiga að sinna. Þessir eiginleikar þurfa að vera meðfæddir og er því bara hægt að auka á þessa eiginleika með þjálfun en ekki smíða frá grunni.

Þessir eiginleikar eru til dæmis flokkshvöt, eða sú hvöt sem stýrir því hversu mikið hundurinn sækist í að vera með fólkinu sínu. Þeir þurfa líka að vera opnir, vinalegir gagnvart fólki og mjög taugasterkir.

Það sem við þurfum að veita hundum sem eru efni í þjónustuhund er mjög góð grunnvinna frá ræktanda, að hvolpurinn sé alinn upp inni hjá fjölskyldu - og já þetta er mjög mikilvægt atriði. Mikilvægasta mótunarskeið hunds er frá 6-16 vikna og ef hundur fær ekki örvun, umhverfisþjálfun og breiða, jákvæða upplifun af umhverfinu getum við gert mikinn skaða. Svo heldur þessi þjálfun áfram þar til hundurinn nær 12 - 18 mánaða aldri og hefur sína formlegu þjálfun í það verkefni sem hann er hugsaður.

Ég er með nokkrar fyrirspurnir um þjálfun á þjónustuhundum og því er ég alltaf að líta í kringum mig eftir efnilegum hundum. Ég er líka að líta eftir fjölskyldum sem gætu hugsað sér að verða fósturfjölskylda fyrir þjónustuhundaefni 🙂 Þá yrði hvolpurinn hjá þessari fjölskyldu þar til hann nær aldri í að hefja formlega þjálfun. Ef þú getur hugsað þér að ala upp hvolp máttu endilega senda mér tölvupóst á [email protected].

Myndin er af Eik sem verður afhent á næstu dögum og mun hefja sín störf sem þjónustuhundur.