Dýralæknaþjónustan Lind

17/01/2026

Stundum þarf að nota hliðarhurðina 🤷🏼‍♀️ Þessi kvíga var með 360 gráðu legsnúning og var því ákveðið að taka kálfinn með keisara. Ungu kvígurnar fylgdust með í rólegheitum af útsynispallinum 🐮

24/10/2025

Minni á þessar upplýsingar fyrir hestaeigendur og ræktendur ☺️ Þeir sem hafa áhuga geta einnig lesið þessa grein sem ég skrifaði í góðri samvinnu við Systu hjá MAST og Söru á Keldum í vor: https://www.bbl.is/skodun/a-faglegum-notum/ormasykingar-i-hrossum-og-varnir-gegn-theim

Kæru hestamenn,
Nú fer að líða að því að þurfi að gefa þeim folöldum sem fæddust sumarið 2024 ormalyf! Hér fyrir neðan koma smá upplýsingar um hvaða orma við erum að meðhöndla, og hvaða lyf er best að nota skv nýjustu rannsóknum 🪱💉

Ég mæli með því að gefa Zerofen í fyrstu meðhöndlun í kringum 2ja-3ja mánaða aldurinn, en skammturinn er 7,5-10 mg/kg. Það þýðir að 150 kg folald þarf 12-15 ml, en eins og við vitum öll fer þó alltaf eitthvað til spillis, og hef ég því mælt með að gefa 20 ml á hvert folald.

Rannsóknir bæði hér heima sem og erlendis hafa sýnt fram á að virka efnið Ivermectin (sem td er í Noromectin eða Ivomec) hefur litla virkni á spóluorminn vegna lyfjaónæmis. Fullorðnir spóluormar eru til staðar í folöldum frá 2ja-3ja mánaða aldri, og geta verið hættulegir ef margir fullorðnir ormar eru til staðar. Fullorðnir ormar dreifa einnig eggjum á túnin, svo að gefa ormalyf á þessum tíma getur minnkað smitpressu fyrir folöld næsta árs. Folöldin mynda sjálf ónæmi gegn spóluormum í kringum 6-8 mánaða aldurinn, og eru þeir afar sjaldan til staðar í hrossum eldri en það.

Í kringum áramót eða þegar vanið er undan mæli ég svo með því að gefa annað hvort Nematel (pyrantel) eða ivermectin. Á þeim tíma eru spóluormarnir flestir farnir úr folöldunum, og litlir og stórir dreyrormar til staðar ásamt bandormum í sumum stóðum. Zerofen hefur skv rannsóknum ekki góða virkni á dreyrorma, og enga virkni á bandorma.

Ef einhverjar spurningar vakna er meira en velkomið að hafa samband hér á messenger eða í síma 866-8048 á opnunartíma 😀

23/09/2025

Útsýnið mitt í sumar er búið að vera sirka svona 🧑🏼‍⚕️👩🏼‍🔬 Sæðingatímabilið er að líða undir lok þetta árið, tilhlökkunin fyrir sumrinu 2026 kemur eflaust um leið og við aðstandendurnir erum búin að fara í kærkomið “sumarfrí” í haust 😅🤍 TAKK allir hryssueigendur sem hafa lagt traust sitt á okkur í sumar, og takk elsku Dalvar og Ellert fyrir að gera okkur vinnuna svona auðvelda 🤠🤍

03/06/2025

✨Sæðingasumarið 2025 er að hefjast ✨

Nú styttist í að allt verði klárt fyrir sæðingar sumarsins. Hér koma hagnýtar upplýsingar varðandi fyrirkomulagið hjá okkur í sumar ✨

Verð fyrir sæðingu og umönnun er 105 þúsund +vsk. Innifalið er sæðing tvö gangmál, allar sónarskoðanir sem því tengjast og umönnun í 30 daga, en eftir það bætist við daggjald 1000 kr +vsk á dag. Hormónameðferðir, legskolanir og sýnatökur eru ekki innifaldar í verðinu. Ef hryssa og/eða folald þurfa á frekari meðhöndlun að halda verður það gert í samráði við eiganda. Hryssur og folöld eru á ábyrgð eiganda á meðan dvöl stendur. Folöld þurfa að vera amk 7 daga gömul við komu, og vera bæði grunnskráð og örmerkt. Séu þau ekki örmerkt er sú þjónusta í boði á staðnum.

Æskilegt er að eigendur tilkynni komu með að minnsta kosti dags fyrirvara ef mögulegt er. Ef hryssur koma eftir kl 16 á daginn verða þær ekki sónarskoðaðar fyrr en næsta dag. Hvorki verður tekið á móti hryssum né þær afhentar á sunnudögum.

Saursýni verður tekið úr hverri hryssu og athugað hvort nauðsynlegt sé að gefa ormalyf áður en sleppt er í hólf, og er því ekki nauðsynlegt að gefa ormalyf fyrir komu. Sýnatakan er innifalin í verðinu, en ef þarf að gefa ormalyf er það á kostnað eiganda. Öllum folöldum sem ná 2ja mánaða aldri á meðan dvöl stendur verður gefið viðeigandi ormalyf sömuleiðis.

Við leggjum okkur fram við að bjóða upp á bestu mögulegu aðstöðu fyrir bæði hryssur og eigendur þegar komið er til okkar. Einnig höfum við frábæra aðstöðu fyrir stóðhesta sem hjá okkur verða í sumar í sæðingum.
Allar girðingar eru nýyfirfarnar, tvöfaldur strengur með rafmagni eða net með rafmagsstreng efst. Hólfin eru rúmgóð og grösug, og eftirlit með hryssum stöðugt. Rennandi lækur er í gegnum öll hólf og ætti því að fara vel um alla.
Við viljum hafa aðstöðuna okkar þannig að öllum líði vel að skilja sínar hryssur og folöld eftir hjá okkur, og finnist þau vera í öruggum höndum. Við höfum áratuga reynslu í stóðhestahaldi, uppeldi og ræktun.

Hlökkum til að sjá ykkur í sumar!
Frekari upplýsingar fást í skilaboðum hér á síðunni okkar eða í síma 695-8766 (Guðrún), 866-8048 (Aníta)

21/05/2025

Frábær samantekt frá kollegum sem vert er að minna á 🐴

09/05/2025

Lærdómsríkir dagar að baki í Danmörku, þar sem við Þorgerður hjá Dýralæknaþjónusta Þ.B sóttum námskeið hjá Eickemeyer um frjósemi og frjósemisvandamál í hrossum á Ansager Dyrehospital. Farið var yfir hvernig er best að greina og meðhöndla ýmis vandamál, t.d. sýkingar í legi, hvernig á að takast á við tvífyl og svo var fósturvísaflutningur kenndur.

Sónartækið mitt er svo á leiðinni til landsins, og allt að verða klárt fyrir bæði sæðingar á Efri-Mýrum og fylskoðanir í sumar, meðfram öðrum dýralæknastörfum🐴🤠

21/04/2025

Við mæðgur tókum stærstu og minnstu stóðmerarnar okkar í munnholsskoðun og röspun um helgina 🤍
Munnholsskoðanir á reiðhrossum og hrossum á tamningaaldri er eitthvað sem hefur verið gert árlega síðustu ár hér á bæ, en stóðmerarnar hafa fæstar verið skoðaðar reglulega. Þær sem ekki hafa verið skoðaðar eru í góðum holdum, mjólka vel og eru út á við heilbrigðar. Við höfum því verið að dunda okkur í að taka eitt og eitt holl, og erum nú búnar með 6/13 folaldsmerum.
Nokkrar þeirra voru þrátt fyrir góð hold með slæmar læsingar, sár í kinnum og alls kyns króka, sem hefðu getað endað í alvarlegum tannvandamálum seinna.
Mikilvægt er að láta skoða þennan hóp reglulega, eins og vissulega öll önnur hross 🐴

03/01/2025

Kæru viðskiptavinir, takk fyrir viðskiptin á árinu sem var að líða 🐴🐶🐮🐱

Við Magga dýralæknir fórum í Febrúar á námskeið í Bretlandi í sæðistöku og sæðingum hrossa, og gekk sumarið í sæðingum vonum framar þrátt fyrir haustveður nánast allt tímabilið.

Ég byrjaði á (annari) rannsókn í samvinnu við sníkjudýradeildina á Keldum um ormasmit í hrossum á Íslandi 🪱

Fyrstu aðgerðirnar á litlu dýralæknastofunni að Efti-Mýrum voru svo gerðar með haustinu. Heimsóknirnar til hunda og katta í Eyjafirði gengu vonum framar, enda er ég dugleg að kaupa mér vinsældir með nammi 🙈

Sár af ýmsum gerðum og stærðum voru meðhöndluð, og var einmitt eitt þeirra stærsta staka verkefnið í ár. Ég mun deila þeirri sögu og myndum af því á næstu dögum fyrir áhugasama ☺️

Ég fer inn í nýtt ár með allskyns nýja þekkingu og reynslu í bakpokanum, og hlakka til að takast á við fjölbreytt verkefni 2025 með ykkur 💪🏼

28/11/2024

🌟 MUNNHOLSSKOÐUN OG RÖSPUN 🌟

Er loksins komin með bæði höfuðstand og ljós á glennuna, og get tekið að mér handraspanir bæði í Eyjafirði og í Húnavatnssýslunum. Get einnig tekið úlfstennur séu þær til staðar 🐴

08/11/2024

Meira nammi takk 🥺
Patta finnst fátt leiðinlegra en að fara í bíl, en elskar að fá fólk í heimsókn 🐶 Hann fékk ofnæmissprautu í rólegheitum heima, og sýndi svo dýralækninum listir sínar 🥰

24/10/2024

Kæru hestamenn,
Nú fer að líða að því að þurfi að gefa þeim folöldum sem fæddust sumarið 2024 ormalyf! Hér fyrir neðan koma smá upplýsingar um hvaða orma við erum að meðhöndla, og hvaða lyf er best að nota skv nýjustu rannsóknum 🪱💉

Ég mæli með því að gefa Zerofen í fyrstu meðhöndlun í kringum 2ja-3ja mánaða aldurinn, en skammturinn er 7,5-10 mg/kg. Það þýðir að 150 kg folald þarf 12-15 ml, en eins og við vitum öll fer þó alltaf eitthvað til spillis, og hef ég því mælt með að gefa 20 ml á hvert folald.

Rannsóknir bæði hér heima sem og erlendis hafa sýnt fram á að virka efnið Ivermectin (sem td er í Noromectin eða Ivomec) hefur litla virkni á spóluorminn vegna lyfjaónæmis. Fullorðnir spóluormar eru til staðar í folöldum frá 2ja-3ja mánaða aldri, og geta verið hættulegir ef margir fullorðnir ormar eru til staðar. Fullorðnir ormar dreifa einnig eggjum á túnin, svo að gefa ormalyf á þessum tíma getur minnkað smitpressu fyrir folöld næsta árs. Folöldin mynda sjálf ónæmi gegn spóluormum í kringum 6-8 mánaða aldurinn, og eru þeir afar sjaldan til staðar í hrossum eldri en það.

Í kringum áramót eða þegar vanið er undan mæli ég svo með því að gefa annað hvort Nematel (pyrantel) eða ivermectin. Á þeim tíma eru spóluormarnir flestir farnir úr folöldunum, og litlir og stórir dreyrormar til staðar ásamt bandormum í sumum stóðum. Zerofen hefur skv rannsóknum ekki góða virkni á dreyrorma, og enga virkni á bandorma.

Ef einhverjar spurningar vakna er meira en velkomið að hafa samband hér á messenger eða í síma 866-8048 á opnunartíma 😀

09/10/2024

Mía nýja vinkona mín stóð sig með prýði í fyrstu bólusetningu og örmerkingu í dag 🐱
Hún fékk að sjálfsögðu nóg af Churu á meðan hún fékk sprautur og fannst þetta allt saman lítið mál 🤍