27/09/2021
*CRD അഥവാ കഫക്കെട്ട്...* .
കോഴികർഷകരെ പ്രത്യേകിച്ചും ബ്രോയ്ലർ കർഷകരെ വളരെയധികം ബുദ്ധിമുട്ടിമുട്ടിക്കുന്ന അസുഖങ്ങളിലൊന്നാണ് കോഴികളിലെ കഫക്കെട്ട് എന്ന CRD.(Chronic Respiratory Disease )
*ലക്ഷണങ്ങൾ* .
18-21 ദിവസം പ്രായമാകുമ്പോഴാണ് CRD യുടെ ലക്ഷണങ്ങൾ കണ്ടുതുടങ്ങുന്നത്, വലിയ ശബ്ദത്തിൽ ചുമക്കുക,തുമ്മൽ,തീറ്റ കൊത്തിക്കളയുക, തല കുടഞ്ഞുകൊണ്ടേയിരിക്കുക,തലവീക്കം എന്നിവയാണ് പ്രധാന ലക്ഷണങ്ങൾ.
CRD തുടങ്ങുമ്പോൾ തന്നെ ശ്രദ്ധയിൽ പെടണമെങ്കിൽ വൈകുന്നേരങ്ങളിൽ കോഴികളെ ശല്യപെടുത്താതെ അവയുടെ ശ്വാസനപ്രക്രിയ ശ്രദ്ധിച്ചാൽ, ശക്തിയായി തുമ്മുന്ന കോഴികളെ തിരിച്ചറിയാൻ സാധിക്കും. ശബ്ദത്തിൽ ചുമച്ചു തുടങ്ങുന്നത് ആദ്യ ദിവസങ്ങളിൽ
വൈകുന്നേരങ്ങളിൽ മാത്രമാണ് പ്രകടമാകുന്നത്.
തീറ്റപാത്രത്തിൽ നിന്നും തീറ്റ കൊത്തിക്കളയുന്നതാണ് ആദ്യ ലക്ഷണങ്ങളിൽ മറ്റൊന്ന്.
*കാരണങ്ങൾ* .
മൈകോപ്ലാസ്മ എന്ന ബാക്റ്റീരിയയാണ് CRD
ക്കു കാരണമാകുന്ന സൂക്ഷ്മണു.
പേരെന്റ്സ് കോഴികളിൽ നിന്നും കൊത്തുമുട്ടവഴി മൈകോപ്ലസ്മ ബാക്റ്റീരിയ കോഴിക്കുഞ്ഞുങ്ങളിലേക്കു പകരുന്നതാണ്.
ആയതിനാൽ കൃത്യമായ വാക്സിനേഷൻ ചെയ്ത പേരെന്റ്സ് ഫാമുകളിൽ നിന്നു മാത്രം കോഴിക്കുഞ്ഞുങ്ങളെ വാങ്ങിക്കാൻ കർഷകർ പ്രത്യേകം ശ്രദ്ധിക്കേണ്ടതാണ്.
കൂടാതെ മനുഷ്യരുടെയും ഉപകരണങ്ങളുടെയും സഞ്ചാരം വഴി ഒരു ഫാമിൽ നിന്ന് മറ്റു ഫാമുകളിലേക്ക് CRD പടരുന്നു.
കോഴിവസന്ത, IBD തുടങ്ങിയ അസുഖങ്ങളോട് കൂടി ചേർന്ന് CRD വരാറുണ്ടെങ്കിലും മിക്കപ്പോഴും ഈ.കോളി ബാക്റ്റീരിയയുടെ കൂടെ സങ്കര അണുബാധയായാണ് CRD കാണാറുള്ളത്.
ഈ.കോളി അസുഖത്തിൽ കാണുന്ന ലിവറിന്റെ മുകളിഭാഗത്തെ ജൽ പോലത്തെ വെള്ള ആവരണം CRD അണുബാധയോട് കൂടി മഞ്ഞ നിറമാകുന്നു.കൂടാതെ കഫക്കെട്ടും തുമ്മലും വർധിക്കും.
ചികിത്സ നൽകുമ്പോൾ ഈ.കോളിക്കു കൂടി ചികിത്സ നൽകേണ്ടത് അത്യാവശ്യമായി വരും.
ഷെഡ് വൃത്തിയാക്കുന്ന സമയത്ത് CRD യെ ഉത്തേജിപ്പിക്കാൻ കാരണമാകുന്ന പൊടിപടലങ്ങളും ചിലന്തിവലകളും കൃത്യമായി വൃത്തിയാക്കേണ്ടത് നിർബന്ധമാണ്.
ചകിരിച്ചോറിന് പകരം അറക്കപ്പൊടി ഉപയോഗിക്കുന്നവർ,പൊടിപടലം കുറവുള്ള അറക്കപ്പൊടി വാങ്ങിക്കാൻ പ്രത്യേകം ശ്രദ്ധിക്കണം , അല്ലാത്തപക്ഷം പൊടിപടലങ്ങൾ അന്നനാളത്തിൽ അസ്വസ്ഥത ഉണ്ടാക്കുകയും CRD യിലേക്ക് നയിക്കുകയും ചെയ്യും.
ഗുണമെന്മയില്ലാത്ത, കൃത്യമായ തണുപ്പിൽ സൂക്ഷിക്കാത്ത വാക്സിൻ നൽകുന്നത് CRD യെ ഉത്തേജിപ്പിക്കാൻ കാരണമാകും.വാക്സിൻ വൈറസിന്റെ പ്രതിപ്രവർത്തനം നടക്കുന്ന സ്ഥലങ്ങളിൽ പ്രധാനമാണ് ശ്വാസനാളം.
*പ്രതിരോധം മാർഗങ്ങൾ*
പ്രതിരോധത്തിനുള്ള മാർഗം ഒന്ന് പേരന്റ്സ് ഫാമുകളിലെ കൃത്യമായ വാക്സിനേഷൻ തന്നെയാണ്.
ബ്രോയ്ലർ ഫാം ലെവലിൽ കർഷകർ ചെയ്യേണ്ടത് 10 ദിവസത്തിലൊരിക്കൽ അണുനാശിനി സ്പ്രേ ചെയ്യുക പോലുള്ള കൃത്യമായ ജൈവസുരക്ഷാ മാനദണ്ഡങ്ങൾ നടപ്പിൽ വരുത്തുക എന്നു തന്നെയാണ്.
അണുനാശിനി സ്പ്രൈ ചെയ്യുമ്പോൾ വെള്ളത്തിന്റെ അളവും മരുന്നിന്റെ അളവും അധികമാവാതിരിക്കാൻ ശ്രദ്ധിക്കണം. ഇങ്ങനെ അധികമായാൽ അത് അന്നനാളത്തിൽ അസ്വസ്ഥത ഉണ്ടാക്കുകയും CRD യെ ഉത്തേജിപ്പിക്കുകയും ചെയ്യും.
ഇത് വിപരീത ഫലം ചെയ്യും. സ്പ്രേ പത്തു ദിവസത്തിലൊരിക്കൽ മാത്രം ചെയ്യുകയും രാത്രി മാത്രം വെളിച്ചം ഓഫ് ചെയ്ത് സ്പ്രൈ ചെയ്യുകയും വേണം.
അസുഖം വന്നതിനു ശേഷം കോഴികൾ പെട്ടെന്ന് മരണത്തിലേക്ക് നയിക്കുന്നതായി കാണാറില്ല,കുറെ ദിവസങ്ങൾ രോഗബാധിതരായി നിന്ന ശേഷം മരണപ്പെടുകയുമാണ് പതിവ്, അതിനാലാണ് ക്രോണിക് അസുഖം എന്ന് വിളിക്കുന്നത് .
*ചികിത്സ*
ആന്റിബയോട്ടിക്കുകൾ ഫലപ്രദമാണ്. കൂടാതെ 4 ദിവസം, രാത്രിയിൽ അണുനാശിനി സ്പ്രൈ ചെയ്ത് നൽകുക.സ്പ്രേ 4 ദിവസത്തേക്കാൾ കൂടുന്നത് വിപരീത ഫലം ചെയ്യും.
കൃത്യമായ വാക്സിനേഷൻ നടത്തിയ പേരെന്റ്സ് ഫാമുകളിൽ നിന്നു കോഴിക്കുഞ്ഞുങ്ങളെ വാങ്ങുകയും, ബ്രോയ്ലർ ഫാമിൽ ശക്തമായ ജൈവ സുരക്ഷ മാനദണ്ഡങ്ങളും, മറ്റു അസുഖങ്ങൾക്കുള്ള വാക്സിനേഷൻ നടപടികളും പ്രവർത്തികമാക്കിയാൽ CRD അസുഖം വരാതെ നമ്മുടെ കോഴികളെ സംരക്ഷിക്കാവുന്നതാണ്.
ഡോ :അബ്ദു റഊഫ് പി
