27/05/2026
ಕತ್ತೆ ಮೈ ಹೊರೆತಕ್ಕೆ ನವಿಲ ಮೈ ಮೆರೆತಕ್ಕೆ |
ಹೊತ್ತು ತರಲಾದೀತೆ ನವಿಲು ಭಾರಗಳ ||
ನೃತ್ತಕ್ಕೆ ಗೆಜ್ಜೆ ತೊಡುವುದೆ ಕತ್ತೆ? ಧರ್ಮಗಳ |
ಗೊತ್ತು ಗುಣಯುಕ್ತಿಯಿನೊ ಮರುಳ ಮುನಿಯ || ೧೭೬
ಹೊರೆತ = ಹೊರುವುದು
ಮೆರೆತ = ಕುಣಿತ
ನೃತ್ತ= ನೃತ್ಯ
ಧರ್ಮ = ಕರ್ತವ್ಯ
ಪ್ರಪಂಚ ವಿಶಾಲವಾಗಿದೆ ಮತ್ತು ಇಲ್ಲಿ ಎಲ್ಲ ಪ್ರಾಣಿಗಳಿಗೂ ತಮ್ಮದೇ ಕೆಲಸಗಳೂ, ಜವಾಬ್ದಾರಿಗಳೂ ಇವೆ. ಅವುಗಳ ಕೆಲಸವನ್ನು ಅವು ನಿರ್ವಹಿಸುವುದು ಧರ್ಮವೆನಿಸುತ್ತದೆ.
ಒಂದು ಸಮಾಜದ ಒಳಗೆ ಪರಸ್ಪರ ಸಹಕಾರಿಯಾಗುವಂತೆ ಬದುಕಬೇಕಾದರೆ ಪ್ರತಿಯೊಬ್ಬರೂ ತಮ್ಮ ಕಸುಬುಗಳನ್ನು ಸರಿಯಾಗಿ ನಿರ್ವಹಿಸಬೇಕು. ಕಸುಬುಗಳು ತಮ್ಮಿಚ್ಛೆಗೆ ಅನುಗುಣವಾಗಿ ಇರಬೇಕು. (ಕಸುಬುಗಳೆಂದಿಗೂ ಜಾತಿಸೂಚಕವಾಗಬಾರದು)
ಇಂದು ಎಲ್ಲ ಜಾತಿಯ ಜನರೂ ತಮ್ಮ ಮನಕೊಪ್ಪಿತವಾದ ಕಸುಬುಗಳಲ್ಲಿ ತೊಡಗಿದ್ದಾರೆ. ಇದು ಸಮಾಜದಲ್ಲಿ ಉತ್ತಮ ಬೆಳವಣಿಗೆಯಾಗಿದೆ.
ಅದನ್ನೇ ಇಲ್ಲಿ ಸಂಕೇತವಾಗಿ ವಿವರಿಸಲಾಗಿದೆ.
"ಮೈಮುರಿದು ದುಡಿದವಗೆ ಮನೋರಂಜನೆಯೂ ಬೇಕು. ಮನೋರಂಜನೆ ಪಡೆಯಲು ಮೈ ಬಗ್ಗಿಸಿ ದುಡಿಯಬೇಕು".
ಕತ್ತೆ ಭಾರವನ್ನು ಹೊರುವುದರಲ್ಲಿ ಪರಿಣತಿ ಹೊಂದಿದೆ. ಹಾಗೆಯೇ ನವಿಲು ತನ್ನ ಕುಣಿತಕ್ಕೆ ಪ್ರಸಿದ್ಧವಾಗಿದೆ. ಅವೆರಡನ್ನು ಪ್ರತ್ಯೇಕವಾಗಿಸಿ ನವಿಲನ್ನು ಹೊರು ಎಂದು, ಕತ್ತೆಯನ್ನು ಕುಣಿ ಎಂದೂ ಆದೇಶಿಸಿದರೆ ಸಾಧ್ಯವಾದೀತೆ. ಅವುಗಳ ಗುಣ ಧರ್ಮದ ರೀತಿಯಲ್ಲಿ ವರ್ತಿಸಬೇಕು. ಆಗಲೇ ಅದಕ್ಕೊಂದು ಸೊಗಸು.
ಜಗತ್ತು ವೈವಿಧ್ಯಗಳಿಂದ ಕೂಡಿರುವುದು ಈ ಕಾರಣದಿಂದಲೇ ಆಗಿದೆ.
ಇದಕ್ಕೆ ಹುಳಿಹಿಂಡುವ ಸಂಕರದ ಕಾರಣವೇ, ಅಥವಾ ಸಂಕರವನ್ನು ಮಾಡುವುದೇ ವೃತ್ತಿಯಾದರೆ ಜಗವು ವಿರೋಧಾಭಾಸಗಳಿಂದ ಮುಳುಗಿಹೋದೀತು.
