27/07/2025
大概95後嘅年輕龜友，應未趕上有翟道翟花地灣串連香港動物買賣嘅舊年代，當時輻射龜曾經係比你地老一屆以上龜友嘅快樂回憶 。以前好似特別流行改花名唔直呼其名，我哋喜歡叫佢放射星或更親切更普及嘅暱稱 「R仔」 ，果個年代離TurtlePark做首次入口合規龜還要至少早個十年。喺一個龜友交流去個叫論壇嘅地方，約見面用SMS，出街前睇睇中原地圖先，返去電腦前MSN傾計，你無法想像幾「落後」嘅年代，果陣好多事情還好自由，動物亦非常平宜，R遍地都係普遍兩千鬆就有交易，當然前提當時係夾喺我地生活嘅地方經歷過好幾年未明朗與大家還在慢慢走出霧霾之間嘅果年代大背境下。
最近流行返Y2K文化，而公司返R仔亦都使我回憶剛好果年初接觸龜嘅時光。以前莫講龜類理財投資還未開始，大家對龜類作為商品最熟悉可能較多停留在只有海天堂，爬蟲店還是相對好新潮，好多陸龜品種亦係正在進入人們眼簾未普及，買隻龜返來養，好多時係件儀式感好重嘅大事，要搵傢俬舖訂製龜箱，要買幾粒聽上去好新概念又A又B嘅好貴嘅燈泡，要去漁農處登記（較早期吧，論壇大大都會提醒）。當然果年代嘅R仔都冇可能做得到，明嘅都明。
直到第一次聽輻射龜TurtlePark做香港合法入口已經係2016年，一隻相當於當時小弟我嘅5個月薪金，相當震撼。
唔知係咪大眾都同我當時一樣感覺呢D咁嘅龜點樣頂住黑市個體嘅壓力賣，雖然黑市亦早已經唔再係對上十年以前嘅兩千幾可買到了，但兩者差距雖至未至於天同地，只能講依然足夠橫跨太平洋。特別喺此鴻溝立於果個有證意識更薄弱嘅時候，而事實就係貧窮限制左想像。
十年之後今日，合法R仔再一次回歸，到我加入呢間公司，今次我心諗嘅係： 大檸樂，輻射龜黑市價如今同我哋合法個體價差只係一條旺角道，咁陣間冇人買可以點兜呢，只能怪老闆返左來香港，本地婆婆重跑得快過佢唔需要佢扶過馬路。😮💨
