25/03/2026
狗寶寶開業40年終於遇到最無恥既客人👍🏼
今日最尾一個美容預約嘅狗狗係一隻上咗年紀嘅柴犬
按照慣例，放低狗仔時我哋會告知預計時間，美容即將完結時我哋就打過去通知主人接回。
點知聽電話嘅女士好奇怪地支吾以對，話要問個仔就收咗線。
雖然已經接近收舖時間，但我哋仍然耐心等候主人回覆電話，然而冇回電+15分鐘之後再打過去都俾人cut線。
20分鐘之後，終於收到男主人致電，佢聲稱架車喺深水埗爆咗軚，即使店員提議請屋企人搭的士過嚟接狗，佢仍然非常之敷衍，並且倉猝收線。
諷刺嘅係，收線後我地竟然收到一個匿名電話。內容係佢哋喺壽司郎等緊位，點知聽到一家四口同店員講既電話，即係話喺深水埗死咗火，收線之後仲要大聲談及本店，並且內容係話開舖就預咗要OT等等，總之不堪入耳。即使餐廳步行去舖頭只需要10分鐘仍然諗住食完先去再接狗仔，導致果位街坊都忍唔住要打過嚟同我哋講。
先唔提及店員屋企都有人等緊開飯，即使只係講隻狗仔，由於白內障導致既視覺缺失同埋上咗年紀，佢係一隻非常之敏感同埋緊張嘅狗仔，甚至為咗避免佢緊張抽筋，我哋係幫佢進行手腳呢啲敏感部位嘅美容時，甚至係會搵另一位店員抱起當BB咁安撫佢。請問客人你係如何可以將一個成為你屋企人起碼10年嘅寵物放喺一個陌生嘅地方，要佢一直咁不安咁樣等你哋排隊食壽司郎？我哋淨係見到佢望住個門口都覺得心痛，本店實在完全不能理解乜人格水平嘅人先會做出呢個行為？
至於最後店員直接打過去要求客人由壽司郎過嚟接狗，客人拒聽電話、扮訊號唔好Cut線、抌低錢就直接想走，甚至連一句對唔住都冇就調頭走嘅呢啲態度都實在唔會令人驚訝。
我地好感謝置樂呢一位街坊睇唔過眼打過嚟同我哋揭發呢件事情，我哋一開始甚至係覺得要客人屋企人搭的士過嚟已經一筆使費，冇諗過話要收任何OT附加費，估唔到事實真相令人大開眼界。我哋已經將該客人列入永久黑名單，並且將會考慮聯絡壽司郎索取寵物店客人專屬預約名額，以避免再有客人未能預計壽司郎等位時間而選擇唔接狗🙂↕️
