Vodka & I "فودكا وأنا "

15/03/2026

05/01/2026

استقبلنا سنة جديدة و كمان ٢٠ يوم هنحتفل بعيد ميلاد ڤودكا ال١٤ اذا ربنا ادانا عمر...الحقيقة بقالي بتاع ٤ شهور بقول اننا داخلين علي ال١٤ ماهو نعمة كبيرة وجودها معانا في المطلق و ان ربنا مديها عمر بعد ما كانت هتروح مننا شهر فبراير اللي فات. أنا كمان حابة أقضي معاها وقت أكتر عشان تفاصيلها بقت كتير و هي الحقيقة دمها خفيف و عشان بقت متعلقة أكتر بوجودي جنبها زي الناس الكبار أظن ...
كمان الصحة الجديدة دلوقتي معناها اننا بنتحرك و نفسنا مفتوحة و بنروح للدكتور كل شهر علي حاجات خفيفة كده و العلاج الطبيعي مرتين أو مرة في الشهر، لحد ١٠ سنين صحة حلوة يعني مبنشوفش الدكتور أكتر من مرتين في السنة واحدة تطعيم و التانيه حاجة خفيفة كده: عضة، وجع بطن، قرصة حشرة...
صحة جيدة معناها إن معندناش علاج غير أقراص عشان متسربش بعد ما تعمل بيبي.
صحة كويسة يعني بتنام اغلب اليوم، صحة كويسة يعني لما بتجري بتدلق علي وشها بس بتعرف تقوم أو بتمسك نفسها بعد ما أقومها. لكن الأهم إنها مبسوطة و مرتاحة و نفسها مفتوحة و بتعمل زفة كل مرة بنحط فيها أكل...
نشكر ربنا علي ١٤ سنة إلا ٢٠ يوم مع الوش السمح ده!
#قمر١٤ #الحب #مذكراتنا #نعمة #ممنونة #قلبي

24/12/2025

معلش بتأخر عليكم، بس الوقت بيجري و الدنيا مجنونة و بنفضل نقضيه في الشمس و الهوا و سنكحة في التيراسات و الشيرينجيتوهات (الاكشاك يعني) و البارات عشان الطفاسة...
كنت كتبت عن العلاج الطبيعي فارق معانا كتير، بقينا نمشي لحد ما ضوافرنا جابت دم تاني، من سنتين كنت هقريف لكن المرة دي كنت عارفة هعمل ايه و جزء مني كان مبسوط اننا رجعنا نمشي للدرجة دي...
كمان شهر بالظبط الحلوة هتكمل ١٤ سنة و أنا ممنونة لكل يوم حلو بيعدي علينا.
من موقعنا هذا بنقول العيشة مش سهلة لكن لذيذة، حب و انبسط و ارتاح و نام و اتسامح و حب و الدلع زي فودكا كده!

11/07/2025

الحركة بركة و العلاج الطبيعي نعمة من عند ربنا...من كام شهر ڤودكا كانت بتروح مني، و قامت من وعكتها و ردت فيها الروح لكن رجلها اللي ورا كانت تعبانة جدا و كنا عايشين علي كورتيزون واحدة واحدة اتحسنت و قللنا الجرعة كتير لكن كان فيه حاجات مبقيناش قادرين عليها: دخول العربية بقي قطمة وسط بالنسبة لي لأنها مش شايلة نفسها، منقدرش نطلع سلالم، نزول السلالم كعبلة، و التمشية للقرية اللي جنبنا بقي حاجة منقدرش نعملها كتير زي الاول. كمان بقي لازم نعمل زيارة شهرية للدكتور...
أنا قلت حقها كبرت و تعبت و وقت ندلعها المهم تكون مبسوطة، لكن مكانش عاجبني اننا معتمدين علي الكورتيزون. المهم سألت دكتورتنا علي حد بيعمل علاج طبيعي فقالتلي فكرة هايلة، محدش بيقترح الموضوع ده لإنه مكلف غالبا بس يستاهل الحقيقة...
ڤودكا رجعت شباب، يعني مش قوي بس رجعت بنت ١١ و نص بدل ١٣ و نص، بنطلع سلالم و ننزل بسهولة بقت بتثبت و تعافر و تطلع لوحدها العربية بزقة بسيطة، بتعمل ٢٠ دقيقة في المية و بنمشي للقرية اللي جنبنا، اللي هو ٢،٥ كيلو رايح جاي و ترجع مش مهدودة زي الأول و تاني يوم ننزل البيسين المحندق ده و نعمل ٢٠ دقيقة كمان عالمشاية و نطلع و ننزل من العربية من غير ماكسر ضهري...
أنا مبسوطة، تعبنا في الأول و طلعت روحي رايح جاي مرتين في الاسبوع بس النتيجة شبه سحرية و قدرنا نقلل الجرعة تاني و لو فضلنا حلوين للشهر الجاي بعد ما نقلل جلسات العلاج هنبطل كورتيزون...ادعولنا كده.
#مذكراتنا #بنعافر #بنتعافي #قردة #كلبةجولدن #عجزنا

15/03/2025

لزوم المرحلة عشان ميجيلناش اكتئاب من زهق اننا بنعمل نفس الخطوتين إللي بنمشيهم حوالين البيت، الحقيقة العربية دي أمتها طاقة حلوة و شجعتنى تمشي اكتر كتير و تروح حتت جديدة و ترجع لهوايتها في النبش علي الرملة و التدوير علي طرح البحر سمكا كان أم بتشنجان...
#مرقعة #مسنة #عجزنا #ذكرياتنا #لحظات #مذكراتنا #الحب #مشاوير

02/03/2025

الحياة بقت أبطأ شوية بالنسبة لڤودكي أو ڤودكيتا أو كوكو أو ڤدڤد يعني زي ما أي حد يحب ينده عليها...
محتاجين نريح كل نص دقيقة بس لما بنقوم بنخرج و نجري، صحيح بنجري أقل من ١٥ ثانية بس مش مهم، ليه ما نستمتعش بالريتم الهادي الرايق مادام مبسوطين.
فيه حاجات عملية ابتدينا نعملها عشان حياتنا تبقي أسهل، يعني جبنا هارنس مغطي البطن و الضهر عشان نعرف نساعد و نشيل بسهوله لو احتاجنا، كمان فيه حزامين عشان يمسكوها من عند الوراك عشان تبقي مسكة محكمة، كل مرحلة و ليها عدتها. الحقيقة متخيلتش إنه هيخفف تقلها بشكل كبير كده، صحيح أهم من الشغل تظبيط الشغل.
#مذكراتنا #حبي #مرقعة #عجزنا #سندونا

28/02/2025

إمبارح كان يوم عصيب، تاري قلق ڤودكا و تعبها مكانش بس بسبب التهاب الرئة، لكن كمان غضاريف العمود الفقري بقوا عاملين زجزاج بشكل ضاغط علي الاعصاب و مسبب عجز في الرجلين إللي ورا. إمبارح الصبح ده بان بشكل واضح و الحلوة بتفطر فجأة رجلها وقعت و عملناها علي روحنا، اتكسفت و نفسها اتصدت و وقعت علي الارض...
بالنسبة لي ده كان نذير بداية النهاية، روحنا لدكتورتها و عملت الأشعة و اتأكدنا إن دي المشكلة و مش بس مأثرة علي رجلها اللي ورا كمان اللي قدام بقول اضعف ، الحقيقة هي محاولتش تخبي لكن قولتلي بالطف شكل ممكن إنها هتحاول مرة كمان تديها حقن كورتيزون و ڤيتامينات بس لو فضلت كده هيبقي أحسن نريحها، الموضوع ده كان معذبني مش بس عشان الفراق صعب بس عشان قرار إني انهي حياة ڤودكا شبه مستحيل...
إتفقت معاها لو عايزة تمشي، تمشي لكن لو هتعافر هعافر معاها، مخيبتش، ابتدت تاكل و تشرب بنفس، عينها روقت و نورت، حبة حبة خدت خطوة، و بعدين ٥...كلن غنينا ميعاد دكتور عشان نأخد القرار لكن فاجأتنا الحلوة بعد ما شيلناها نزلناها في الشارع، انها جريت عالبحر، آه كنا مساعدينها و اه كان مجهود بس عافرت و في العيادة ادونا حقنة كمان ڤيتامين و كورتيزون و هنكمل علي الانتيبايوتك و الكورتيزون و نشوف، النهاردة ڤودكا عفتني من قرار مستحيل و كسبنا يوم جديد سوا، بكره منعرفش هتكمل قد إيه بس مش مهم المهم ان طول ما نفسها مفتوحة هنعمل كل اللي نقدر عليه عشان تبقي مرتاحة لحد ما ربنا يقرر إن كده كفاية...الفيديو ده بعد ما أكلت وجبتها المفضلة من ٥ دقايق.
#مذكراتها #العجز

24/02/2025

مرعبة فكرة العجز بالفتحة و العجز بالسكون، عجز ڤودكا و عجزي إني اغير الوضع. السبت كل شئ كان جميل، خدنا الشط كله مشي و لعبنا في الرملة و المية و بعدين خدنا مشاريبنا في التراس فوق الممشي الجديد و الناس عاكسونا و دلعونا و كل حاجة تمام. كلنا و شربنا و لعبنا و روحنا مباسيط!
بالليل الحلوة كانت متوترة و كان واضح إن فيه حاجة مضايقاها، كانت واخدة البيت رايح جاي و مش قادرة تقعد علي بعضها و بالليل مكانتش عارفة تنام فين، طلعنا ع السرير عشان اطبطب عليها ييجي ٤ مرات. قلت كلنا حاجة من الشارع مغصتنا لكن صحيت الصبح لقيت نقط دم عالباب و عالارض، يعني كحينا او عطسنا دم...و هنا ابتدت الفقرة الدرامية، أنا كنت شايفاها كويسة لكن مخضوضة من الدم، مش عارفة أعمل إيه معنديش عيادة طوارئ بثق فيها و مش بيركزوا قوي في حل المشكلة قد ما يتأكد إنه مفيش مصيبة. المهم رجعت بعد ما اطمنا ان مفيش نزيف بس كانت تعبانة و قولنا اثر الليلة و الالتهاب. و كنا مطمنين ان نفسها مفتوحة و مفجوعة لكن بالليل معرفتش تقوم و لا تمشي خطوتين حتي و دي كانت خضة، ده احنا الصبح كنا بنجري عالبحر إيه إللي حصل...
هي مش فاهمة و بتعافر و أنا مش عارفة أحلها إزاي. قلنا الصباح رباح يكون ميعاد مضاد الاتهاب جه يمكن التهاب الرئة علي وجع رجليها هدوا حيلها. الصبح مكانتش أحسن كتير، خدتلها ميعاد مع دكتورتنا و كنت خايفة متقدرش تقوم فكلمنا صاحبتنا اللي بترافقها دايما في غيابي عشان نشيل قصاد بعض لكن ڤودكا فاجأتنا و نزلت مشيت و أهي أحسن شوية، لسه مريضة و مش قادرة قوي بس تقريبا ده فس سنها بيحصل عادي و مفيش حاجة بتخلي الفكرة أسهل لكن أظن هتتعود. كل منايا من ربنا اننا نقدر نعيش كويسين و نستمتع و إن مكانش يبقي نفارق في هدوء و سلام و بشكره علي نعمة وجودها و الوقت إللي بنقضيها سوا...
#دراما #عجزنا #مرضنا #مذكراتها #ڤودكيتا #نعمة

26/01/2025

نقلنا في الصيف لبلدة صغيرة ساحلية، في الصيف كان ممنوع علينا البحر، قال إيه هنلوثه...مش مهم، احنا كمان مبنحبش البحر في الصيف بنتحر و جلدنا بيلتهب، انما الشتا غير، البحر طرحه كتير و احنا مدمنين روايح و كله علي بقنا...صحيح االحاجات المالحة بتخلينا نرجع شوية بس كنا مبسوطين بالتمشية ماهو احنا عايزين إيه تاني غير مية و هوا و وجه حسن عنده ١٣ سنة بحالهم...بعد اللعب لازم نقعد في تراسة،و ناكل وجبة فخيمة و نحلي و نفضل نتدلع و نتفسح و ناكل و نحلي طول اليوم، هو مش حلو زي كانوا فاهمين، يعني عضمة، سردينة، زبادي، كدهون...عموما كل يوم صحتنا حلوة فيه و عندنا طاقة بيكون عيد!
#النعمة #١٣ويوم #عجزنا #ذكرياتنا #ڤودكيتا #القمر #الحب #الصحبة #طفاسة

03/10/2024

عزلنا من كام شهر عالبحر، التغيير كان غلس شوية علي رجلين الستو هانم لأجل ما الأرض انشف و ده مش مساعد المخدات و لا الضوافر فبقينا نلبس شرابات في رجلينا الأربعة. الحقيقة الموضوع ده مسلي جدا حيث إنه بيخلي الناس كلها تضحك و شوية منهم بيفتحوا معانا حوارات و يقضوها دلع و طبطبة و احنا نعز الدلع و الطبطبة زي عينينا. كمان بقينا مش لاقيين حشيش ناكله فبقينا ندور في الزلط و ناكل في الطين بس كله يهون لأجل الهوا العليل و الجو اللذيذ...
#مذكراتنا #ڤودكيتا #كبرنا #عاهات #الأمورة #برنسيستنا #نعمة #بحرنا