15/01/2023
تربية طائر السمان
هو طائر صغير الحجم يستخدم فى إنتاج البيض واللحم لحمه خالى من الكولسترول ويمكن ان يساهم بشكل كبير فى حل مشاكل كثيره حيث ان هذا الطائر يمكن ان يعوضنا عن اللحوم ولا يحتاج إنشاء المشروع الى تكاليف عالية ولكن لاقل التكاليف .
يمتاز لحم طائر السمان بأنه طرى ناعم خالي من الكولسترول سهل الطهي مستساغ ويتميز بيضه بمزاق البيض البلدى المربى فى المنازل ليس به اى رائحة ونلاحظ ان نسبة الصفار مرتفعة .
الاهمية الاقتصادية
1 - دورة راس المال سريعة حيث دورة التربية 35 يوم وكمية العلف المستهلكة للطائر الواحد فى حدود350 : 450 جرام ويصل الوزن من 200:180 جرام فى نهاية دورة 35 يوم واقل .
2- قلة التكاليف المالية بالقياس بشروعات أخرى .
3- مصدر للبروتين الحيوانى الخالى من الكولسترول .
4- انتاجه عالى من البيض يصل الى 250 : 300 بيضة .
5- مدة التفريخ والفقس من 16 : 17 يوم .
6- يتحمل ظروف لا يتحملها اى طائر وعن تجربه .
7- طائر السمان النضج الجنسى مبكر اقل من 45 يوم .
انواع طائر السمان
يوجد نوع يسمى امريكى وياباني واسترالي وافضل الانواع من وجهة نظرى من حيث انتاج البيض واللحم هو السمان الياباني .
خطوات بداية المشروع والانتاج
الموقع والمكان
ببساطة كدة مش هتكلم عن الحاجات القياسية لا انا هتكلم لو حد عاوز يربى ويعمل مشروع صغير يعنى لو عندك مثلا مكان 50 متر مربع هتصمم عليها المشروع لان السمان المتر المربع بيكفى حوالى 50 طائر من عمر يوم حتى عمر التسويق اللى هو 35 يوم .
مصدر السمان
اى مصدر موثوق به ممكن نجيب كتاكيت ذو جودة عالية.
تجهيز العنبر أو مكان التربية
- رش جير على الارضية وبعد ذلك يتم فرش التبن ويفضل التبن مع السمان .
- يمكن تطهير الغرفة باستخدام ( 30 سم فورمالين +17.5 جرام برمنجنات بوتاسيوم + 50 سم ماء ) لمدة ساعة طبعا مع عدم وجود اى شئ من الادوات التى سوف تستخدم ( السقايات + العلفات ....الخ ) فى الغرفة .
الإستقبال :-
- نضع فى السقايات ماء وسكر يعنى كل سقاية حوالى معلقتين سكر او 10 جرام للتر ده فى اول 4 ساعات علشان نتلاشى ظهور السالمونيلا والايكولاى .
- من المهم فى اول 4 ساعات انك تدخل بنفسك وتعمل على تحريك السمان حتى يستهلك البروتين الموجود فى كيس المح .
- التحضين عموما على مضاد حيوى ثنائى الغرض معوى وتنفسى ( ايفتريل – انروسين .....الخ ) لمدة 3-4 ايام .
- بعد كده نحط فيتامين وانا بكلم عن تجربتى ياريت نوع كويس يوضع 1سم للسقاية اللى هى لتر .
- يتم وضع ظلط فى الساقاية يتم قلبها ووضع ظلط على الاجناب علشان السمان بيكون صغير وميغرقش .
تحضين السمان وتربيته
مرحلة التحضين
غرفة التحضين طبعا هنزودها بدفاية يدوية بتشتغل بالكهرباء ودى مش هتكلف 10 جنية صناعة يدوية + شعلة غاز + انبوبة كبيرة درجة حرارة التحضين لا تزيد عن 36 : 37 درجة وهتعرف ان السمان متاقلم مع درجة الحرارة او لا عن طريق الانتشار يعنى لو منتشر يبقى كويس لو متجمع على الدفاية يبقى درجة الحرارة قليلة
والعكس صحيح .
الاضاءة اول ثلاث ايام شغلها على طول لكن بعد كدة اخفض فيها لحد متوصل لـ 14 ساعة فى اليوم .
السمان هيفضل فى غرفة التحضين حتى عمر 15 يوم طبعا فى تربية ارضية وفى تربية فى بطاريات .
التربية الارضية تكاليفها اقل لكن مشاكلها كتير والتربية فى بطايات تكاليفها اعلى لكن مشاكلها اقل .
يوجد بطاريات للسمان عمر يوم حتى 15 يوم وبطاريات من عمر التسمين حتى البيع وبطاريات للبياض .
بعض مشاكل التحضين
1- ارتفاع نسبة النافق ينتج من عدم التحضين على مضاد حيوى قوى او مشاكل فى ماكينة التفريخ يعنى الماكينة تكون حاملة للامراض فتنتقل الامراض من الماكينة الى البيضة .
(لذلك لابد أن يكون المصدر موثوق منه)
2- اهمال المسئول عن المكان برفع النافق اول باول مما يؤدى الى نقر السمان فيه وانتشار الامراض .
3- ارتفاع درجة الحرارة او العكس مما يؤدى الى فقدان الشهية .
4- العلف غير الجيد يؤدى الى مشاكل لا حصر لها ومنها ضعف عام للطيور كساح وأوزان غير قياسية بنهاية الدورة .
5- عدم التطهير اول باول حيث ان الدورات سريعة مما يؤدى الى انتشار الامراض .
6- عدم تغيير المياة مما يؤدى الى ارتفاع درجة حرارتها وتؤثر على الطائر .
7- لابد من وضع سلك شبك واسع من عمر 5 ايام حتى 15 يوم لان طائر السمان له عادة سيئة وهى ( النكش ) مما يؤدى الى فقد فى العلف .
8- ادخال اعمار مختلفة .
