31/12/2025
نصايح مهمه لتغذية الخرفان محدش هيقولهالك...
تغذية الخرفان مش حكاية علف وبس دي منظومة لو اتظبطت صح بتطلع وزن ممتاز
ولو اتلغبطت تخسّرك حتى لو بتصرف كتير .
- البداية دايمًا من الاختيار يعني الخروف الصح بيبان من نشاطه ، صدره يكون واسع، شعره لامع، ومفيش إسهال أو خمول وكمان السن مهم يعني يكون لا صغير قوي ولا كبير قوي لأن الخروف التعبان مهما أكل علف العلف بيروح في الأرض.
- بعد كده نيجي للتغذية نفسها لأن العلف المركز لوحده عمره ما يكفي لازم دريس أو برسيم جاف قدام الخروف طول اليوم لأن الألياف بتحميه من النفاخ وبتظبط الهضم وبتخلي الجسم يستفيد من الطاقة و أي تسمين من غير ألياف بيبقى تسمين على ورق بس وفي الحقيقة هيحصل مشاكل كرش وخسارة.
- و أهم نقطة بقى هي الزيادة التدريجية للعلف يعني ما ينفعش تبدأ بكميات كبيرة مرة واحدة حاول أول كام يوم تقدم كمية بسيطة وبعدها تزود واحدة واحدة لحد ما توصل للكمية الكاملة خلال أسبوع أو عشرة أيام لأن الزيادة المفاجئة ممكن تعمل إسهال وفي حالات توصل لنفوق.
- كمان مهم تقسّم العلف على مرتين في اليوم صباحي وعصاري لأن الطريقة دي بتريح الكرش وبتحسن التحويل وبتقلل التخمر ومع كل ده،
- الميه تفضل أهم من العلف لازم ميه نضيفة متاحة طول اليوم لأن نقص الميه يقلل أكل الخروف حتى لو العلف ممتاز .
- وطبعا لازم تتابع الروث والكرش دايمًا لأن الروث المتماسك علامة خير و السائل إنذار والكرش المنتفخ يقولك في مشكلة ألياف وما تنساش الديدان والطفيليات ، لأنهم بياكلوا العلف بدل الخروف وكمان البروتين لازم يكون مظبوط مش عالي زيادة عشان ما تدفعش فلوس على الفاضي.
- وأخيرًا اهتم بالمكان والجو يعني أرضية ناشفة وتهوية كويسة ، وتابع وزن الخرفان كل فترة لأن الميزان ما بيكدبش ولو كل حاجة ماشية صح الزيادة اليومية هتكون واضحة ومربحة.
ومتنساش تدخل الجروب علشان تفيد و تستفيد
https://chat.whatsapp.com/IxwJ2l0uTFv3onMeyMZxXc
