28/03/2023
لو عندك قطة وبتفكر تشتري كلب بس خايف القطة متحبهوش، أو عندك كلب وقطة بس مش بيبطلوا خناق🙆.
فاحنا حبينا نقولك طرق نساعدهم بيها يتكيفوا مع بعض بحيث يكون بيتك مريح ومناسب ليهم♥️.
ركز معانا بقا عشان نقولك ايه هى الخطوات اللازمة لتقديم كلب مع القطة، أو العكس👀:
1️⃣ مبدئيا كده محتاجين مساحة واسعة عشان يكونوا بعاد عن بعض، أو غرفتين منفصلتين هنفصلهم عن بعض عشان نحسن سلوك الكلب لو كان عدوانى او كلب مش متدرب أو لسه صغير 🤝.
2️⃣ أفصلهم ٣او٤ أيام ومتتسرعش أنك تقدمهم لبعض او تعرفهم علي بعض عشان ميتخانقوش🙂.
3️⃣ ضرورى أنك تبدل الأوض بتاعتهم مع بعض، عشان تمزج روائحهم، ودى طريقة مهمه جدا لتعريف الحيوانات على بعضها، وممكن تلف منشفة علي الكلب وتاخدها تحطها تحت طبق الاكل بتاع القطة عشان تتعود علي ريحته🌚.
4️⃣ جرب تأكلهم عند نفس الباب من جهتين مختلفتين.
5️⃣ أستنى تكون القطة مرتاحة وجاهزة ومش خايفة وبعدين كدا يبقوا جاهزين يتعرفوا🤷.
6️⃣ أحمل القطة على دراعك، وخلي صاحبك او حد من عيلتك يجيب الكلب وتقربهم بالتدريج وتستنى ياخدوا علي بعض.
7️⃣ لازم تاخد بالك من أنك بتقدملهم نفس الإهتمام والحب عشان الحيوانات بتحس بالغيرة🙂.
✨بعدين تفصلهم تاني وتزود اللقاءات بينهم✨
8️⃣ بعد مايهدوا لبعض هتسيب الكلب من الطوق بتاعه وتسيب القطة تمشي في الأوضة،
وممكن تستخدم الفريونات من عند الدكتور البيطري عشان نساعدهم يهدوا ويسترخوا🐕🦺🐶.
كدا أنت عرفت ازاى تقدر تعرفهم على بعض، هنعرفك بقا دلوقتى ازاى تقدر تخليهم يتكيفوا أنهم يعيشوا مع بعض🤔.
1️⃣ لازم تبقى عارف أنك لما تمشي من البيت تفصلهم عن بعض.
2️⃣ لما الكلب يتصرف تصرف عدوانى مع القطة توفرله نشاط او تدريب يشغله عنها🐕🦺.
3️⃣ وبالتالى بردو لازم لما الكلب يتصرف تصرف إيجابي مع القطة تكافئه، ولما القطة تيجي الغرفة اللي فيها الكلب تكافئه بردو، عشان تربط وجود القطة بأنه أحد مسببات السعادة للكلب🤍.
4️⃣ وأخيرا طبيعى جدا مايكنوش على اتفاق طول الوقت، وهيجى وقت ويتخانقوا، فى الحالة دى ضرورى توفر للقطة🐶 مكان تهرب فيه من الكلب شجرة صغيرة مثلا أو بوابة صغيرة.
وفى النهاية لازم تبقى عارف أن اى مجهود هتبذله عشان حيواناتك الأليفة تكون متكيفة مع بعض، ده مش هيكون بس فى سبيل راحتهم ولكن هيكون المكان هادئ ومريح ليهم وليك❤️.
