04/04/2018
بسم الله الرحمن الرحيم
الحلقة الرابعة ..
وقفنا في الحلقة اللي فاتت عن بداية تجهيزنا للكتاكيت عشان التحصين...
صحينا الصبح رفعنا السقايات عشان نعطش الكتاكيت ونزلنا العلف ليهم وفحصنا الحرارة والتهوية والفرشة ولقينا بفضل الله كله تمام. وبعد ساعتين جبنا جردل مياه حوالي 10 لتر وفتحنا التحصينة تحت المياه.. ونزلنا المياه للكتاكيت.. والحمد لله... طلعنا تاني ليهم بعد ساعتين لقينا السقايات خلاص شبه فاضية فغيرنا المياه بمياه بيضا وزودنا العلف في الأطباق واستودعناهم الله ونزلنا...
في المساء كانوا خلصوا العلف والمياه فبدئنا ببرنامج الإظلام وقفلنا الإضاءة لمدة ساعة مع إستمرار الدفاية.. وبعدها شغلنا النور ونزلنا العلف والمياه المضاف إليها ه سيلينيوم.. والكتاكيت بدأت تاكل وتشرب بحيوية بفضل الله..
في اليوم الثامن
الحمد لله عدي علي خير ومكنش فيه أي مشكلة وبدون أي أدوية أو فيتامينات... فقررنا ننقل الكتاكيت لغرفة تانية ملاصقة أوسع وأكتر تهوية.. ويمكن دي أحد مشاكلها برضه لأنها كانت بحري فصعب تتحكم في الحرارة إلا لو استهلكت غاز أكتر للتدفئة.. بدئنا في تهيئة حرارة الغرفة بحيث تكون مشابهة لغرفة التحضين وقفلنا الشبابيك وجهزنا العلف والسقايات. وبدئنا ننقلهم كنت بمسك الكتاكيت واحطهم في القفص وزوجتي تنقلهم وطبعاً عملنا حصر للعدد لقينا إن النافق حتي اليوم العاشر حوالي 5 ودا رقم ممتاز لأن معظمهم مات بأسباب غير مرضية.. بالإضافة إننا بعنا حوالي 35 كتكوت عمر يوم للأهالي بالإضافة ل 250 كتكوت عمر يوم لأحد المربين التجار.. استودعناهم الله ونزلنا
في اليوم التاسع
صحينا الصبح لقينا بعض الإسهالات البنية الغامقة ولكن مفيش نافق أو أعراض تانية... فضبطنا الحرارة علي درجة 31 والرطوبة كانت مناسبة.. ونزلنا سقوة مضاد سموم صباحاً ومساءا والحمد لله الإسهال وقف تاني يوم..
النهاردة اليوم العاشر بإذن الله كان فيه شوية تيارات هوائية فجأة.. الكتاكيت اتجمعت علي بعضها والحرارة نزلت والحمد لله زودنا الدفاية عشان الحرارة وجبنا شكاير قفلنا بيها الشبابيك بإحكام أكتر.. ومنزلناش غير والكتاكيت منتشرة كويس ورجعت تاكل وتشرب طبيعي..
دعواتكم معانا باقي 4 أيام ونبدأ نبيع منهم 💟
إنتظرونا في الحلقة القادمة مع
مع تحيات /
عيادة The Chicken Vet البيطرية
محافظة المنوفية - مركز الشهداء
