أكيد الموضوع الأساس التدريب على رياضات الفروسية لكن الأهم عندنا الرجوع بالفروسية الى زمن الفروسية.
الفروسية مش مجرد رياضة الفروسية أسلوب حياه ، علاقة بينك وبين حصانك صديقك او زي ما بنقول صديق الروح.
الحياة معانا مش انك تيجي تتمرن وتمشي لا معانا انت بتتعرف علي حياة الفروسية والحصان زي أكله ، شربه ، نظافته ، رعايته الطبية ، الامراض اللي الفارس يقدر يعالجها ويتعرف عليها ولكن في الاصل لابد من وجود دكتور ، وبعد كده بيجي التدريب بكل مستوياته من اول ما بتدخل على حصانك الى ان تغادر الحصان لان رحلتك بين دخولك على حصانك والمغادره هي مش بس تدريب هي اسلوب حياه.
بنهتم بعامل السلامه سواء للفارس او للحصان ومن هنا اختارنا مكانا بعنايه فائقة تتيح للفارس والحصان التدريب في الجو والمناخ الأرضي المناسب يعنى عندنا قبل ما الفارس بيدخل المكان بيمر على نقطة الوقاية الصحية بيتم فيها قياس درجة الحرارة ورش الكحول على الأطراف ثم الدخول من بوابة التعقيم وده كإجراء احترازي من مرض الكورونا covid-19.
بعدها بندخل على إجراءات السلامة في ساحة التدريب بنعمل صيانه بمعدل نصف سنوي للارض واضافة مواد للارض تسهل على الحصان الحركه وتحافظ على اوتاره وجميع تمارين الحركه للحصان، واهتمينا جدااااا فيها بالاناره لان اكيد في اوقات بنتمرن بعد ضوء النهار ولازم الفارس والحصان يكون شايف ساحة التدريب ،وقبل ما بيدخل الفارس والحصان بندخل جرار صيانة الارض قبل كل تمرين لمساواة الارض وتجريفها ،ثم يتم رش ساحة التدريب بالمياه علشان انت وحصانك تقدروا مش بس تتمرنوا لا علشان تستمتعوا بالتدريب بدون اي غبار من حركة قدم الحصان على الارض،وبكده تكون الساحة جاهزة لدخول خيل التدريب اليها ،وأخيراً يقوم المدرب بالمرور على كل حصان للتأكد من حالته وربط جميع ادوات الركوب للحصان من شدة وشريحه وسرج واسرعات , ثم يتم تعقيم شدة الخيل بالكامل قبل صعود الفارس على الجواد.
دخول المتدربين على الخيل بيتم طبقا لتوزيعة الفرسان على كل جواد وبنراعي العدد يكون مش كبير علشان التدريب يكون مثمر وكل الفرسان تستفاد،وبنراعي ايضا ان يكون الفرسان في كل مجموعه في نفس المستوى وبكدا بنضمن تدريب ملائم لكل المستويات،يعني مبنحطش فارس قوي مع فارس مبتدئ وعندنا اجهزه للمبتدئين (Horse riding machine) بمقاسات تناسب كل الاعمار،بندرب عليها الفرسان قبل الصعود على الجواد.
كمان بنعمل ندوات تثقيفية لان الفارس مش مجرد متدرب الفروسية ثقافة وقراءة ومعلومات،وبنعمل امتحانات ومحضرات طبية وعلمية من خلال متخصصين،وبنخرج بخيلنا في اماكن مختلفه لان الفارس لازم يركب في اماكن مختلفه بطبيعة وجمهور مختلف علشان ياخد على جو البطولات وعندنا اماكن للمحاضارات مجهزه على اعلى مستوى من اجهزة الصوت وشاشات العرض اللي بنعرض فيها فديوهات للفرسان وبنشرح الاخطاء وبنشرح المميزات لكل فارس وهو راكب حصانه.
عشان الحصان صديق الروح بنتشارك اعياد ميلادنا سوى ،وبنظم بطولات ودية وبندخل بطولات جمهورية وبنحقق مراكز قوية ما كل اللي فات ماكنش شوية وبنلعب كل رياضات الفروسية من خلال مدربين متخصصين لكل لعبه ،وشهادات وميداليات ومفاجات كتير وكمان فرسنا بنعملهم عضوية الاتحاد المصري للفروسية علشان يقدر يدخل بطولات الجمهورية.
وكمان عندنا برامج تليفزيونية لفرسانا المميزين بيطلعوا يتكلموا فيها عن حياتهم مع الخيل وبطولاتهم وبندرب كتير من نجومنا الفنانين على ادوار الفروسية للمسلسلات والافلام وبنتصور مع الخيل واجمل صوره بتاخد جائزة.
