07/02/2026
🚨 إوعى تستلم كتكوت "أي كلام".. الفرز مش رفاهية، ده قرار مكسب أو خسارة! 🚨
يا جماعة الخير، "الكتكوت الضعيف، مفيش علف هينقذه ولا دكتور هيعالجه".. دي قاعدة لازم نحفظها. أول 5 دقايق وأنت بتستلم الكتكوت هما اللي بيرسموا شكل الدورة كلها، يا تطلع منصور يا تطلع... (ربنا يعوض عليك).
عشان كدة، وأنت بتستلم، عينك وسط راسك وركز في الحاجات دي 👇:
1️⃣ السُرّة (أهم حاجة): لازم تكون "ناشفة" ومقفولة تماماً.. لو لقيتها مبلولة، وارمة، أو محمرة.. سيب الكتكوت فوراً وماتاخدوش.
2️⃣ العيون: عين الكتكوت هي عنوان صحته.. لازم تكون بتلمع، واسعة ومفتحة، ومفيش أي إفرازات أو رغوة.
3️⃣ الرجلين والمفاصل: بص على المفاصل كويس، مفيش حمار ولا ورم، والكتكوت واقف صلب طوله وثابت في الأرض مش بيترعش.
4️⃣ المنقار: مستقيم ونضيف، مفيهوش اعوجاج ولا أي تشوهات تمنعه من الأكل.
5️⃣ اختبار الحيوية (اختبار القلبة) 🔄: اقلب الكتكوت على ضهره.. ✅ عدل نفسه وقام بسرعة؟ ده كتكوت "وحش" وتعتمد عليه. ❌ كسل واتأخر وهو بيقوم؟ ده هيتعبك طول الدورة ويجرّك لمشاكل، بلاش منه.
6️⃣ النظافة العامة: جسم الكتكوت نضيف، مفيش قشر بيض لازق فيه، ومفيش أي وساخة لازقة عند السرة أو المخرج.
7️⃣ ريش الجناح: يدوب لسه "بيشوّك" (بادئ ينبت).. لو لقيته مريش بزيادة ده معناه إنه بايت أو فاقس بدري وده مشكلة.
⚠️ الخلاصة يا هندسة: الكتكوت السوبر مش بييجي صدفة.. ده نتاج أمهات متغذية صح، تفريخ مظبوط، ووراثة محترمة. ابدأ صح، واختار كتكوتك بفرز دقيق، عشان العلف اللي بتدفعه يرمي معاك لحم مش يترمي في الأرض.
العياده البيطريه - د/انجي كميل بموشا
01277697052
01505087844
