23/08/2020
إزاي تنقي ماية ملوثة بكيس بلاستيك؟
في الصحراء إنت ممكن تفقد 2 لتر ماية في الساعة الواحدة، فممكن بدل متشيل ماية كتير معاك، تستخدم الماية الموجودة في الطبيعة، لكن سعات الماية دي بتكون ملوثة، في الطريقة دي هنتعلم ننقي الماية الملوثة.
هات كيس أو إزازة بلاستيك وأفتحه من فوق، ضيف أول طبقة فيه وتكون من أي حتة قماش واكبسها كويس، تاني طبقة تكون فحم مطحون عشان يمتص السموم اللي في الماية والعكر، بعد كده طبقة من الرمل لو موجود، فوقيه كمان طبقة من الحصى لو موجود، بعده كمان طبقة من الرمل، وبعده طبقة من الحصى، بعدها ضيف الماية الملوثة وهتلاقيها بتنزلك بلون وشكل وريحة أفضل من الأول.
ملحوظة:
- الطريقة دي للمساعدة على تنقية المياة وتصفيتها من العكر.
- أفضل طريقة لقتل الأمراض الموجودة في الماية هي بالغليان مدة لا تقل عن دقيقة واحدة.
- لو ملقتش رمل أو حصى ضيف طبقات أكتر من الفحم والقماش.
تحذير:
- الطريقة دي مش بتعقم من الأمراض بنسبة 100% لكنها أفضل من مفيش.
- متستخدمش تراب أو حصى جيري لأنه بيتحول لمادة كاوية بعد إضافة الماية علية.
