24/05/2026
السلام عليكم ورحمة الله وبركاته
كل عام وانتم بخير و تقبل الله منا ومنكم صالح الاعمال
توضيح بسيط لكن مهم جداً جداً
لكل الفرسان وملاك الخيل في اعتقاد عند البعض لما يكون الحصان مستريح بقاله فترة ده معناه ان الحصان عنده طاقة وقوة كبيرة مخزنها وعايز يفرغها للأسف الكلام ده غلط واعتقاد خاطئ وبيسبب للخيل مشاكل صحية ونفسية بتنعكس على سلوكة بشكل كبير جداً واحيانا ممكن توصلك انك تزهق من حصانك وتسعى انك تتخلص منه فى اقرب وقت بسبب سلوكه الجديد اللى انت كنت سبب فيه .
حصانك كان شغال وبيطلع بانتظام تلات مرات فى الاسبوع على الاقل سواء تدريب او فى الركوب الحر بتطلع تركب فى الجبل ، غبت عنه فترة اسبوع او عشر ايام او شهر او اكتر
مينفعش تيجي وتركب حصانك وتطلع به نفس الطلعة اللى كنت بتطلعها قبل م تغيب عنه حتى لو لقيته هو مستجيب لده هو جسمه سخن ومش هيحس بنفسه حاليا ده غير انك انت صاحب العقل المسؤل عن تنظيم تدريبه وطاقته ورفعها وتفريغها بانتظام و تدريجياً عشان ميتأثرش بمشاكل صحية او سلوكية
المشكلة السلوكية مش هتظهر معاك فى نفس اليوم
انت فى نفس اليوم هترجعوا من التدريب او الرحلة وكله تمام ، لحظات التمرد والانفجار هتظهر فى الطلعات اللى بعد كده اول مستوى هيسيبك تشد عليه وهيبدأ يحرن يعنى مفيش اي تقدم خطوة للامام للمكان اللى فى ذاكرته اللى كان سبب فى التعب ، حصانك جدع وشهم وربنا مسخرة ليك فرستك طيبة وجميلة وربنا مسخرها ليك وعايزة تعمل اللى انت عايزه وبتطلبه منها بس مش قادرة نتيجة سلوكك وفهمك الغلط ورد فعل للى انت بتعمله
خلي يبقى عندك قاعدة المساواة
★★مدة الراحة = مدة التسخين★★
التسخين هنا مش المقصود بيها التسخين العشر دقائق او الربع ساعة اللى بتعملها فى نفس الطلعة قبل الجري او قبل التمرين
لا التسخين هنا هي التدرج فى التدريب تاني على مدار ايام لرفع لياقة حصانك تاني عشان توصل للوقت والمسافة اللى كان بيعملها قبل فترة الراحة
يعني غبت اسبوع يبقى تاخد اسبوع غبت شهر يبقى تاخد شهر تدريب وتدرج فى رفع لياقته تاني
عشان ميعملش سلوكيات او يتصاب فى مفاصل او اوتار وانت تفضل في حيرة ده من ايه
كل افعاله ما هي إلا عبارة عن ردة فعل على طريقة ركوبك ومعاملتك لخيلك اللى ممكن تبتدي بالحرنة بعد كده برفض معدات الركوب اللجام والسرج بعد كده يمنعك انك تركب او لو ركبت يحاول يوقعك من على ضهرة كلها محاولات رفض للالم اللى هو عارف انه طالع يتعرض له اللى انت هتبتدي تتعامل معاها بحاجات غريبة
زى اللبب الثابت او تزود نوع قوة اللجام او تستخدم الكرباج فى الصغط عليه
لغاية لما يبوظ خالص وتشوفله بيعه وهو اصلا مفهوش حاجة
انت سبب المشكلة اولا فى وجودها وأخيراً فى حلها بطرق كلها غلط وعنف للاسف
حفظ الله الخيل ودمتم في امان الله...
