15/06/2025
نیوزی لینڈ کی ٹیم 1976 میں پاکستان کے دورے پر تھی, لاہور میں کھیلے گئے پہلے ٹیسٹ میں صادق محمد, ماجد خان اور مشتاق محمد 44 رنز پر پویلین لوٹ چکے تھے- ایسے میں میدان میں نوجوان جاوید میانداد داخل ہوتے ہیں, 55 کے سکور پر ظہیر عباس بھی آؤٹ ہو گئے- جاوید کو آصف اقبال کا ساتھ ملا تو وکٹیں گرنے کا سلسلہ رک گیا- اگلی وکٹ 336 رنز پر گری جب پہلا ٹیسٹ کھیلنے والا جاوید 163 رنز بنا کر پویلین واپس لوٹا, یہ ایک شاندار کیریئر کا بہترین آغاز تھا- اسی سیریز کے تیسرے ٹیسٹ میں ایک شاندار ڈبل سنچری نے دنیا کو بتا دیا کہ پاکستان کو ایک بہترین بیٹسمین مل چکا ہے-
اگلی چند سیریز میں جاوید سنچری نہ بنا پایا لیکن پھر انڈیا کے خلاف ایک ہی سیریز میں دو بنا ڈالیں, پاکستان کی طرف سے سنچریز اور رنز کا ریکارڈ بنایا, آسٹریلیشیا کپ 86 کا چھکا کون بھول سکتا ہے, پھر ویسٹ انڈیز کے خلاف ویسٹ انڈیز میں سیریز جس میں قسمت ساتھ دیتی تو پاکستان ویسٹ انڈیز میں پہلی بار سیریز جیت بھی سکتا تھا پر اس کے لئے تیس مزید سال انتظار کرنا پڑا- اس سیریز کے پہلے دو ٹیسٹ میں جاوید نے ایک غضبناک باؤلنگ اٹیک کے خلاف سنچریز بنائیں- 1992 ورلڈکپ میں نیوزی لینڈ کے خلاف اہم میچ میں رمیز کی سنچری, پھر سیمی فائنل میں انضمام کی معجزانہ اننگز اور پھر فائنل میں وسیم اکرم کا یادگار سپیل پر اس پورے ٹورنامنٹ میں جاوید کا کردار شاید سب سے اہم تھا- یہ جاوید کے بے شمار میں سے صرف چند گنے چنے کارنامے ہیں-
جاوید کی کپتانی کی اگر بات کی جائے تو 1980 میں آصف اقبال کے بعد کپتانی جاوید میانداد کے مل گئی لیکن چوتھی ہی سیریز جو سری لنکا کے خلاف کھیلی گئی میں سینئر کھلاڑیوں نے جاوید کی کپتانی کے خلاف بغاوت کر دی- 1992 میں عمران خان کے جانے کے بعد کپتانی جاوید کو ملی تو دو سیریز بعد ہی ایک بار پھر بغاوت ہو گئی- جاوید میانداد نے اس دوران عمران خان کی غیر موجودگی میں کئی بار کپتانی کی, کامیاب بھی رہا پر عمران کی واپسی پر کپتانی پھر عمران کو دے دی-
ویسٹ انڈیز کے خلاف ویسٹ انڈیز میں 1988 کی سیریز میں جاوید میانداد ہی تھے جو کالی آندھی کے سامنے ڈٹ گئے تھے- ورلڈکپ 92 سے پہلے پاکستان کی یادگار ترین فتح 1986 کے آسٹریلیشیا کپ میں تھی جہاں فائنل میں جاوید نے آخری گیند پر چھکا لگا کر روایتی حریف بھارت کے خلاف پاکستان کو ایک یادگار فتح دلا دی تھی-
اور اگر بات ہو 1992 ورلڈکپ کی تو وہاں بھی جاوید میانداد ہی تھے جو کبھی رمیز راجہ تو کبھی عامر سہیل، کبھی عمران خان اور سلیم ملک کے ساتھ مل کر اننگ کو آگے بڑھا رہے تھے- جاوید ہی تھے جو سیمی فائنل میں انضمام کی اننگ میں اسے مسلسل گائیڈ کر رہے تھے-
آج جاوید میانداد کی سالگرہ ہے, تو سر سالگرہ مبارک!
