31/10/2026
اللہ سے تجارت: 30 قرش سے بزنس کے عرش تک!
گھر میں غربت کا بسیرا تھا، اس لیے ذہین ہونے کے باوجود ان کی تعلیم چوتھی جماعت سے آگے نہ بڑھ سکی۔ کبھی کھیتوں میں مزدوری اور کبھی معمولی تنخواہ پر دکان میں کام کرتے۔ مگر صرف 30 قرش (مصری سکے) سے اپنے کاروبار کی بنیاد رکھی۔ حفظِ قرآن، دیانت و امانت، محنت اور اللہ سے تجارت کے جذبے نے انہیں کہاں سے کہاں پہنچا دیا کہ ان کے قائم کردہ کاروباری گروپ سے آج 45 ہزار سے زائد افراد وابستہ ہیں۔ یہ داستان ہے مصر کے معروف صنعت کار محمود العربی کی۔
محمود العربی 15 اپریل 1932ء کو مصر کے صوبے منوفیہ کے ایک انتہائی غریب کسان گھرانے میں پیدا ہوئے۔ والد دوسروں کی زمین ٹھیکے پر لے کر کاشت کرتے تھے۔ گھر کے حالات بہت ہی خراب تھے، اس لیے محمود چوتھی جماعت سے آگے تعلیم حاصل نہ کرسکے۔ البتہ بچپن ہی میں قرآن کریم حفظ کر لیا تھا۔ یہی دینی تربیت، کلام الٰہی کی برکت اور دیانت و امانت آگے چل کر ان کی شخصیت اور کاروباری معاملات کو اوج ثریا تک لے گئی۔
بچپن ہی سے خرید و فروخت کا شوق تھا۔ اپنی جمع پونجی کے 30 قرش سے غبارے، کھلونے اور عید کے موقع پر فروخت ہونے والی چھوٹی موٹی چیزیں خریدیں۔ عید پر گھر کے سامنے بیٹھ کر فروخت کیا تو دس قرش منافع ہوا اور سرمایہ 40 قرش ہوگیا۔ انہوں نے منافع خرچ کرنے کے بجائے دوبارہ کاروبار میں لگادیا۔ (30 قرش تقریباً ڈیڑھ روپے پاکستانی بنتے ہیں)
10 برس کی عمر میں بھائی کے ساتھ قاہرہ آگئے۔ پہلے ایک عطر سازی کی ورکشاپ میں کام کیا، مگر ایک ماہ بعد ملازمت چھوڑ دی۔ پھر ایک دکان پر کام ملا، جہاں ماہانہ تنخواہ صرف 120 قرش تھی۔ 7 برس وہاں کام کیا اور تجارت کے بنیادی گُر سیکھے۔ بعد میں تھوک کے کاروبار کی دکان پر ملازمت اختیار کی۔ یہاں تنخواہ بڑھتے بڑھتے 27 مصری پاؤنڈ (تقریباً 133 پاکستانی روپے) ماہانہ ہوگئی، لیکن اپنے کاروبار کا خواب دل میں زندہ رہا۔
قاہرہ میں ایک بڑی دکان تھی، جس کے 5 دروازے تھے اور نام ’’البرنسيس‘‘ تھا۔ محمود صاحب اسے دیکھ کر دعا کرتے: ’’اے اللہ! مجھے ایک لاکھ پاؤنڈ اور ایسی ہی دکان عطا فرما۔‘‘ ایک روز دکان کے مالک نے ان کی دعا سن کر مذاق اڑایا کہ یہ منہ اور مسور کی دال؟ تو محمود نے جواب دیا: ’’اللہ کے خزانوں کی کوئی حد ہے؟‘‘
بالآخر 1964ء میں اپنے دوست عنتر عبدالوہاب اور دو سرمایہ کاروں کے ساتھ مل کر 4 ہزار پاؤنڈ سے کاروبار شروع کیا۔ قاہرہ کے مشہور تجارتی علاقے موسکی میں ’’العربی‘‘ کے نام سے دکان کھولی۔ 15 اپریل 1964ء کو افتتاح ہوا۔ انہوں نے کم منافع پر زیادہ فروخت کا اصول اپنایا۔ اچھی ساکھ اور سابقہ تعلقات نے بھی کاروبار کو آگے بڑھانے میں مدد دی۔
کاروبار شروع ہونے کے چند روز بعد دوست عنتر شدید بیمار ہوگئے۔ دوسرے سرمایہ کار ساتھیوں نے انہیں کاروبار سے الگ کرنے کی کوشش کی، مگر محمود صاحب نے صاف انکار کردیا۔ عنتر کے انتقال کے بعد بھی ان کے 3 بچوں کے حقوق کا خیال رکھا اور تعلیم مکمل ہونے تک ان کی کفالت کی ذمہ داری نبھائی۔ یہ ان کی دیانت اور وفاداری کی نمایاں مثال تھی۔
دکان سے صنعتی سلطنت تک
محمود صاحب نے تجارت تک خود کو محدود نہیں رکھا، بلکہ صنعت کے میدان میں قدم رکھا۔ 1966ء میں رنگین پنسلیں بنانے کا کام شروع کیا۔ 1974ء میں جاپانی کمپنی توشیبا کے ساتھ معاہدہ کرکے مصر میں اس کی مصنوعات کی تقسیم کا اختیار حاصل کیا۔ 1975ء میں جاپان گئے اور وہاں کی جدید فیکٹریاں دیکھ کر مصر میں بھی صنعت قائم کرنے کا ارادہ کیا۔ بالآخر 1982ء میں بنہا کے قریب پہلا پنکھا سازی کا کارخانہ شروع ہوگیا۔ ابتدا میں وہاں صرف 50 کارکن تھے اور سالانہ 60 ہزار پنکھے تیار کیے جاتے تھے۔ بعد میں ریڈیو، ٹیپ ریکارڈر، بلینڈر، ٹیلی وژن، فریج، واشنگ مشین اور ایئرکنڈیشنر سمیت متعدد مصنوعات تیار ہونے لگیں۔
آج العربی گروپ صرف مصر کا ہی ایک بڑا کاروباری ادارہ نہیں، بلکہ پورے مشرقِ وسطیٰ، بلکہ براعظم افریقہ کے نمایاں صنعتی گروپوں میں شمار ہوتا ہے۔ گروپ کے تحت 16 کمپنیاں اور 39 کارخانے قائم ہیں، جو مصر کے چار صنعتی علاقوں میں کام کررہے ہیں۔ جبکہ 2026ء کی ایک تحقیقی رپورٹ میں گروپ کے ملازمین کی تعداد 45 ہزار سے زیادہ بتائی گئی ہے۔
گروپ کا کاروبار گھریلو برقی آلات اور الیکٹرانکس کی تیاری و فروخت، صنعتی و تجارتی ریفریجریشن، مصنوعات کی درآمد و تقسیم، آن لائن تجارت، فروخت کے بعد مرمت اور خدمات، نیز طبی شعبے تک پھیلا ہوا ہے۔ اس کی مصنوعات 60 سے زائد ممالک میں پہنچتی ہیں۔ مصر میں 3 ہزار سے زیادہ ڈیلرز، درجنوں فروخت مراکز اور 550 سے زائد سروس مراکز اس کے نیٹ ورک کا حصہ ہیں۔ توشیبا کے علاوہ شارپ، ہٹاچی، ٹی سی ایل، ہوور اور لا جرمانیا سمیت متعدد عالمی برانڈز کے ساتھ اس کی شراکت داری ہے۔ جنوری 2026ء میں گروپ نے عالمی کمپنیوں کے ساتھ تقریباً 50 کروڑ ڈالر کی نئی سرمایہ کاری اور شراکت داریوں کا اعلان کیا۔
دولت نہیں، اللہ کی رضا اور انسانوں کی خدمت!
محمود العربی کی زندگی کا سب سے قابلِ توجہ پہلو ان کا خدمتِ خلق کا جذبہ تھا۔ انہوں نے اپنے آبائی علاقے میں غریبوں، مریضوں اور ضرورت مندوں کی مدد کے لیے فلاحی ادارے قائم کیے۔ مساجد، تعلیمی اداروں اور حفظِ قرآن کے مراکز کی سرپرستی کی۔ یتیم اور ضرورت مند بچیوں کی شادیوں میں مدد کی اور غریب خاندانوں کی ضروریات پوری کرنے کا اہتمام کیا۔
ان کے کارخانوں کے قریب مزدوروں اور ڈرائیوروں کے لیے دن رات مفت کھانے کا انتظام ہے۔ کوئی بھوکا شخص آئے تو اسے کھانا دیا جاتا ہے۔ ملازمین کی فلاح کا بھی خاص خیال رکھا جاتا ہے۔ 10 برس ملازمت مکمل کرنے والے کارکن کو ان کے والد یا والدہ کے ساتھ عمرے پر بھیجنے کی روایت قائم ہے۔ یوں ان کے کاروبار کی ترقی سے ہزاروں خاندان مستفید ہو رہے ہیں۔
ان کا مشہور قول ہے: ’’غریب ہمارے شریک ہیں۔‘‘ ان کی سوچ یہ تھی کہ کامیابی صرف دولت جمع کرنے کا نام نہیں، بلکہ اللہ تعالیٰ انسان کو دوسروں کے لیے روزی اور آسانی کا ذریعہ بھی بنائے۔
محمود العربی 9 ستمبر 2021ء کو 89 برس کی عمر میں انتقال کر گئے۔ ان کے بعد بھی ان کا قائم کردہ کاروباری گروپ ترقی کے سفر پر گامزن ہے۔ حقیقت یہ ہے کہ محنت، دیانت اور امانت کے ساتھ دوسروں کے حقوق اور ضرورت مندوں کی مدد کو اہمیت دی جائے تو دولت محض ذاتی آسائش کا ذریعہ نہیں رہتی، بلکہ ہزاروں خاندانوں کے لیے رزق اور معاشرے کے لیے بھلائی کا وسیلہ بن جاتی ہے۔ پھر اللہ تعالیٰ اس میں ظاہری اضافے کے ساتھ برکت بھی عطا فرما دیتے ہیں۔
یہی ہے اللہ سے تجارت!
العربی گروپ کے موجودہ اثاثوں کی مجموعی مالیت OECD کی 2026ء کی رپورٹ میں 2 ارب ڈالر سے زیادہ بتایا گیا ہے۔ 30 قرش یعنی ڈیڑھ روپے سے شروع ہونے والا کاروبار اب 2 ارب ڈالر تک پہنچ چکا ہے۔ حالانکہ ان کے پاس واجبی سی بھی تعلیم نہیں تھی۔ یہ سب محنت، امانت و دیانت، خدمت خلق اور صدقہ و خیرات کی برکت اور کرشمہ ہے۔ اس لیے عرب دنیا میں محمود کو ’’محمود العربي.. رجل تاجر مع الله!‘‘ یعنی اللہ سے تجارت کرنے والا کا نام دیا جاتا ہے۔
اللہ جل شانہ کا وعدہ ہے:
’’کون ہے جو اللہ کو اچھا قرض دے، پھر اللہ اسے اس کے لیے کئی گنا بڑھا دے؟‘‘ (البقرہ: 245)
یہ بڑھا کر دینے کا وعدہ صرف آخرت کے لیے نہیں۔ آخرت میں تو ملے گا ہی ملے گا، اللہ جل شانہ دنیا میں بھی کئی گنا کرکے عطا فرما دیتے ہیں۔ صدقے سے مال میں اضافہ ہوتا ہے کمی نہیں۔ رسول اقدس صلی اللہ علیہ وسلم کا فرمان عالیشان ہے: ’’صدقہ مال میں کمی نہیں کرتا۔‘‘
