Comentários
狗: 我作為一隻生活在澳門的狗，原來出街去廁所都會犯法 😢😢😢
無養開狗的人可能會唔明。咁換個角度講，就好似逼你人類唔可以用有門有遮蔽的洗手間，規定你一定要出門去公開場合痾俾全世界睇咁，又或者只可以痾返落你自己瞓覺張床。
無論係生理需求定心理層面，對狗仔黎講都好大壓力架師父~只係狗狗個情況同我地相反姐，不妨多一點同理心。🐶
獸醫市場決定價格的因素眾多，良好的醫療並不是單純的一買一賣，不妨睇吓莊獸醫師的見解~
👉🏻點解牙媽話飲水喉水會肚屙？
因為澳門的自來水會儲存在大廈的水箱，而清潔不足的水箱就可以搵到梨形鞭毛蟲！
另外常見的地方是土壤，花盆，公園等！
P.s 草地係獸醫又愛又恨的地方，好想可以開心比狗狗狂奔，但係又蟲又跳虱又牛蜱😱
👉🏻春天要開始啦，牛蜱要猖狂了！聰明的主人一定已經準備好了吧？

昨晚的一場雨，立即變凍！
呢種暖下凍下的日子，人和動物都好易…
💬 打乞嗤
💬 流鼻水 / 涕 👈🏻 黃色或綠色黏稠狀
💬 眼仔有異常分泌物
如果有以上的問題，可能貓貓就有貓流感啦！
你又知唔知獸醫所講嘅貓流感，其實一般所指的是病毒性上呼吸道感染?
👉🏻 FCV  卡里西病毒
👉🏻 FHV 貓疱疹病毒
而有以上其中一種…. 就會終身帶病毒, 即是轉季時免疫力差又會有貓流感症狀😢

狗仔同貓咪每日最少都應該要有1~2次大便。如果有正常進食，但成日都會2日先有一次大便，可能就已經係早期便祕，同時可以留意下有無排便困難、大便好硬好乾身等便祕症狀。
超過5日以上無排便，就可能會有生命危險，糞便中的細菌持續在腸內發酵造成腸毒血症，或者糞石太硬可能會直腸撕裂、物理阻塞性的嘔吐、脫水、電解質失衡等症狀都會同時伴有。
請遇到便祕問題一定要帶至獸醫師處診治，同醫生一齊討論飼養環境和飲食的改善方法。情況嚴重時可能要留院、醫生協助排便、灌腸，吊針恢復脫水、電解質失衡等狀態，之後亦可能要服用軟便劑或者促進腸蠕動的藥物。
早期便祕時正確的飲食觀:
1.增加飲水量
2.增加食物中的纖維
3.增加運動，促進腸道蠕動
4.過胖的動物請減重
點解貓主子會亂痾尿、痾錯位置?
-----------------------------------------------
如果貓主子經常痾尿痾錯位置(不在貓砂中排泄)，各位主人們記得要控制好自己情緒，唔好立即發脾氣或指住貓咪黎罵。其實咁做對件事無明顯幫助，甚至可能會令貓咪因情緒壓力產生更多的下泌尿道症狀或行為問題。
作為主人我地要知道有邊啲常見原因會造成貓咪排泄行為異常，從而檢討有無可以改善嘅地方，同埋要知道咩情況要立即帶去睇獸醫。
-----------------------------------------------
貓咪會出現排尿行為異常，主要分為兩大原因:
1. 環境問題
2. 生理問題
-----------------------------------------------
環境問題:
1.貓砂盤係咪保持清潔?
(最好係一有排泄物就能夠立即清走，你諗下如果有人去完廁所3日都唔沖廁你仲想唔想入去...?)
2.幼年時期(4~5週齡)有無流浪過?
(其實唔係隻隻貓都一出世就識用貓砂，有啲貓起BB仔流浪學習時期習慣去街邊啲草地或樹邊小便，第日大個可能有時都會去下屋企地毯呀、盆栽呀依啲地方痾)
3.貓砂盆的數量足唔足夠?
(其實貓科醫學會建議貓砂盆的數量係要家中養貓的隻數再+1，即係養1隻貓至少要2個砂盆 ; 養2隻貓要有3個盆以此類推。貓天性係會分開多個地點掩埋排泄物，為咗避天敵及劃分地盤，所以得一個係唔夠㗎，俾多啲選擇人地啦!! 特別係多貓家庭，有時地位弱勢的貓係唔敢去帶有其他強勢貓氣味的砂盆㗎，逼於無奈只好自己周街搵位痾，陰公~)
4.貓砂盆擺放位置係咪啱佢心水?
(其實擺放位置都好講究，當你有2個盆時唔能夠並排放一齊，因為會被佢地視作係同一區域即係等於同一個廁所。而且排便的地方都唔好跟食物水碗擺放位置太近，佢地唔鐘意食同痾都同一個地方。一般選貓平時鐘意既隱瞞性好、不容易被搔擾的位置，周圍唔好太潮濕、唔好太開揚，佢地都想要私隱㗎~)
5.砂盆夠唔夠大?
(因為貓排泄前習慣會轉圈圈，去完又要有埋砂動作。所以貓砂盆尺寸上最好要有貓咪身長的1.5倍，咁先有足夠空間俾佢地舒適地做足全個動作流程)
6.砂盆種類及貓砂款式主子鍾意嗎?
(ER...各花入各眼，百貨應百客。唔同材質的盆、唔同種類的貓砂、外觀同觸感等等每隻貓都有自己的喜好，真係要試過先知佢鍾意邊款.....另外唔建議用有蓋封閉式貓砂盆，雖然唔會踢到周圍都係砂，但其實入面唔通風排泄物氣味會好重貓會討厭，而且容易滋生細菌)
7.有無分離焦慮症?
(只要你起屋企對住佢都唔會出錯，你一出街/返工佢就痾錯位。佢可能唔係專登激你，而係太愛你呀~ 想確定係咪真係患有分離焦慮症，最好搵獸醫師睇行為學門診，作出診斷先再定斷喔)
8.有無新家庭成員?環境嘈雜?有新貓入屋?地位改變? 心理壓力因素?
(多貓家庭，特別係公貓之間好易出現競爭意識造成情緒緊張，環境因素造成的壓力都會令佢地排尿唔自在，甚至造成貓下泌尿道症候群等生理問題)
-----------------------------------------------
生理問題: (即係真係病咗)
常見下泌尿道症候群(FLUTD)、膀胱結石、膀胱發炎、尿道閉塞等等。可能會出現的症狀包括尿頻、排尿困難(蹲好耐但痾得好少，或者蹲成分幾兩分鐘都未痾完，條尿柱好幼，痾痾下要行去第二個位繼續痾)、或者出現血尿、尿液顏色異常(橙色、粉紅色、墨綠色)、尿液帶有惡臭、痾尿時會痛苦大叫、或者超過12~24小時以上無排過尿，遇到以上情況請記得立即帶去睇獸醫檢查及評估係咪需要緊急導尿。
-----------------------------------------------
切記貓咪長時間痾唔出尿，
係急症!!!
係急症!!!!
係急症!!!!
嚴重時係會中尿毒症同產生高血鉀症導致心率不整，會危及生命。
-----------------------------------------------
#衛教 #寵物飼養 #貓 #澳門人 #澳門 #寵物衛教 #獸醫 #貓亂尿 #亂尿 #亂尿尿的貓 #下泌尿道症侯群 #行為學 #貓砂 #貓砂盤 #貓砂盆 #獸醫迷因 #梗圖 #貓梗圖
"毛孩常見嘅肚瀉原因有邊啲？ 點預防？ "
------------------------------------------------------------------
寵物常見的肚瀉(下痢)原因有好多種。
通常會以病程發展時間嚟簡單區分"急性下痢"及"慢性下痢"。
如果平時大便一直都正常乾身，係依一兩日內突然開始軟便或者痾水，而且痾得密咗好多，通常都係屬於急性下痢。如果係持續超過1、2個月以上，有時軟爛有時又成形偏軟的大便，大多為慢性下痢。
------------------------------------------------------------------
急性下痢原因 :
1. 食物種類改變 (平時食開乾糧突然改餵濕糧、鮮食，或者直接轉了糧的牌子及蛋白質種類中間沒有過渡、吃了大量新零食等，均會造成消化系統負擔、腸胃不適等症狀)
2. 環境轉換壓力 (剛帶回家新飼養的動物、經過長途運輸、轉換新環境等，大量壓力荷爾蒙釋放會影響神經性腸蠕動過速及全身性免疫系統功能下降)
3. 細菌感染 (食物變質或污染、濕糧或鮮食雪過落雪櫃之後無再完全地加熱殺菌、未經嚴格殺菌處理的自製風乾肉類零食、執垃圾或地面受細菌污染的食物等......大量的異常細菌進入腸道，會造成腸道內原有的菌叢突然失衡或者大改變，壞菌增生會產生好多有毒物質刺激腸道)
4. 病毒感染 (常見細小病毒感染、冠狀病毒感染，"未經施打疫苗的幼年動物" 及 "沒有年度補強疫苗的成年動物" 均有可能受病毒感染，唔好諗住得BB先要打預防針喔，記得睇住本針簿時候到要補強疫苗!)
5. 寄生蟲感染 (圓蟲類(蛔蟲)、鉤蟲類、線蟲、扁蟲類(絛蟲)、鞭蟲類、弓蟲、球蟲、梨形鞭毛蟲、旋毛蟲等等.....攝食未經煮熟肉類、繁殖環境污染、母體傳播、泥土污染等都會傳播寄生蟲卵。每3~6個月必須要定期服用體內杜蟲藥物)
6. 急性胰臟炎或者其他身體炎症性疾病等。
7. 不完全性阻塞的消化道異物 (年輕動物或有異食癖病史的動物。如確定誤吞骨頭，可能伴隨有嘔吐或血便、泥便等)
------------------------------------------------------------------
慢性下痢原因:
1. 食物過敏或食物不耐受 (食物中含有過敏源，未必只會出現搔癢、皮膚紅等症狀，慢性下痢都可能係其中一種症狀。經常食用過油、過多澱粉的食物，在貓甚至會出現間歇性嘔吐，通常改回以前正常時候的飲食，症狀就會漸漸解決)
2. 炎症性腸病 IBD (自身免疫系統錯誤攻擊自己的腸道，即係自己人打自己人。只有經過獸醫確診並使用免疫抑制劑藥物治療先會改善軟便問題，通常不可擅自停藥)
3. 慢性細菌感染(乾糧或零食包裝開封超過一個月以上，啲糧淋哂或變味有時主人都唔知，於是就日日食、日日痾....)
4. 未經發現的腸道寄生蟲，低度感染 (少部份腸道寄生蟲用一般杜蟲藥係殺唔到，而且大便有時正常有時唔正常。獸醫需要採集新鮮糞便樣本用顯微鏡檢查，可能需要收集好幾次糞便樣本先會確診，而且要根據寄生蟲種類使用專用的藥物療程)
5. 慢性胰臟炎 或 胰外分泌功能不全 (胰液中含有幫助消化的酵素，消化酵素不足會有過多的食物內澱粉、蛋白質及脂質無法完全吸收，會以軟便形式排出)
6. 貓傳染性腹膜炎病毒 FIP (不論乾性或濕性都可能會有消化道症狀，視病毒量多寡及臨床症狀嚴重程度，可能會持續出現慢性腸道發炎的狀態、消瘦)
7. 腸道營養素 (益生菌(Probiotics)、益菌生(Prebiotic)、葉酸缺乏、維他命B12缺乏、水溶性膳食纖維不足等)。
8. 腸躁症、腫瘤病變(癌症)或其他全身性/系統性疾病都可能會有慢性下痢及消瘦現象。
------------------------------------------------------------------
以上都係臨床上比較常見的下痢原因。由此可見肚痾唔係一個病名，而係一種"症狀"。動物會根據不同的病因而表現出相同的症狀，每一次的肚痾都可以係唔同原因造成，應每次都看作獨立個別事件尋找真正原因。
所以肚痾可以係好簡單 (即使唔係複雜原因造成，但嚴重時脫水都可能會危及生命)，亦都可以係好嚴重的疾病，最好經過獸醫師完整問診，再判斷是否需要作進一步檢查(驗血、病毒快篩、糞檢、X光或超音波檢查消化道影像等)。
飼主切勿按個人經驗自行給藥 或 使用未經獸醫許可的成藥。如成年動物肚痾時未有伴隨嘔吐出現，可先暫時停餵該餐的食物，再給予少量飲用水補充水份，防止脫水，及後立即帶至獸醫處診治。
如是3個月齡以內的幼年動物出現連續腹瀉最好立即掛急診，因幼年動物必須每數小時進食一次，否則體內水份、電解質及葡萄糖容易不足而出現休克現象甚至死亡。
就診前記錄每次下痢的發生時間及頻率，最近有轉換的飲食及食物來源。拍照記錄糞便的形態、顏色。於就診時更可以帶同2小時內的新鮮糞便樣本予獸醫作檢查之用。
------------------------------------------------------------------
最後總結一下日常預防毛孩肚瀉嘅方法:
1. 唔好突然改變飲食種類，包含突然完全轉糧牌子
2. 唔好餵骨頭、容易造成消化道的刺激或傷害的食物
3. 唔好用小型物品當做玩具，避免誤吞異物
4. 唔好餵人類的餐桌食物，容易過油難消化
5. 散步時注意避免狗舔舐地面或任何東西都放入嘴裡的壞習慣，如有需要則佩戴嘴套避免
6. 定期體內杜蟲及施打預防針，可以防範病毒及寄生蟲感染問題
7. 適當提供腸道益生菌、水溶性纖維，增進腸道健康。
8. 乾糧最好一個月內吃完，唔好貪平買太大包
9. 濕糧罐頭 或 自製鮮食最好不要隔餐食用
------------------------------------------------------------------
#寵物 #寵物衛教 #澳門 #澳門人 #獸醫 #肚痾 #下痢 #益生菌 #益菌生 #食物過敏 #細菌 #病毒 #寄生蟲 #狗 #貓 #寵物飼養 #衛教 #胰臟炎
" 點解醫生話佢肥，但我仲係覺得佢好瘦喎? "
----------------------------------------------------------------
好多寵物主人都覺得自己隻寵物肥啲會可愛啲，我地獸醫門診一般見到過肥或過瘦體態的動物都只能夠提供適當飲食建議 及 對潛在健康影響作出警告。畢竟依個真係飼主個人喜好同選擇問題。
但有種情況就係明明寵物已經肥，但主人都唔覺得肥，甚至仲覺得佢好瘦、想餵多啲。(例如好多貓主人成日都想自己隻貓發腮，造成過度屯積體脂肪)依種雙方認知差距就係普遍寵物飼主同獸醫之間對於貓狗的肥瘦定義觀念不一，無一個劃一的標準。
其實世界小動物獸醫師會 (WSAVA) 己經一早發佈咗一套 體態評分(BCS) 俾全世界的獸醫師及狗貓寵物飼主做一個簡單又客觀的評分準則。多數寵物的 BCS 目標值，理想為達到 4 - 5 分 ( 9 分制 )。BCS超過6分的動物，引發疾病的風險會提高。(例如代謝性疾病、肛門腺堵塞、貓科糖尿病、貓科下泌尿道綜合症、狗的骨關節炎症、心血管及呼吸系統疾病等) 同時亦有研究顯示患有退化性關節炎而出現跛行、疼痛等病患，每減少6~8%體重都會對減輕臨床症狀有大大幫助。
由此可見作為一個盡責的寵物飼主，為自己的寵物控制一個良好的體態同營養健康係息息相關。所以大家都要記住依個評分表格，到睇醫生時都唔怕同個醫生雞同鴨講丫嘛。
-------------------------------------------------------------------
ps. 睇完哂就留言話俾我地知你屋企隻寶貝依家BCS幾分啦(希望有圖有真相~) 如果有其他想知道嘅寵物醫療知識或者疑問都歡迎喺下面留言，可能下一期主題就會為你解答。
#寵物 #寵物醫療 #澳門 #獸醫 #減肥門診 #寵物衛教
" 點解獸醫診所開藥成日要等咁耐? "😅
可能各位主人都試過帶自己屋企毛寶貝到各間動物醫院/診所就診。除左候診、診症及等待驗血結果比較花時間之外，其中一個可能等最耐的步驟就係 " 等出藥😪 "。
好多主人都唔明白點解狗仔、貓咪執幾粒藥💊要等咁耐??? 係咪診所姑娘手腳慢呢??? 定係醫生佢地睇完症漏咗開藥俾我呀(漏左單)??? 其實大部份都唔係出於以上原因，而係毛寶貝開藥的成個過程都幾特殊，今日就同大家講解一下獸醫調劑處方的成個過程點解要咁耐~
首先大家要清楚嘅係大部份動物常用處方藥物其實都係現有的人用藥物，只有3成左右先係專為動物使用而設的藥物(當然唔係全部人用藥都可以俾寵物用，大家唔好未經獸醫指示就私自亂餵 ! !❌❌❌)，而一般藥廠生產的每一粒藥丸、膠囊的單位藥物份量，通常都係適用於一個成年人一次的建議使用劑量。而狗仔🐶同貓仔🐱對於每一種藥物都有唔同的建議使用劑量，使用多少藥量則由動物自身體重及參考體脂含量換算。所以即使係同一動物不同年齡層階段及體重，每次所需的藥量都會唔同，無得隨便拎起個藥樽一粒粒咁簡單快速地就執完藥。
換句話講其實每一次，唔同品種不同個體的動物來開藥，程序上都必須先稱動物體重、再由獸醫開立處方，選擇用藥及劑量(每公斤體重使用多少毫克藥量)、再根據每種不同藥物執出需要的總藥量，再按每次藥量均分做一包藥粉或將幾隻藥塞入同一粒膠囊內，最後寫上藥袋先會完成。
有時執藥會用到1.88粒A藥丸、2.35粒B藥丸、有時又會係0.33粒C膠囊.....按體重換算藥量就會乜野奇怪數字都有可能出現!!!🙃所以獸醫師或姑娘好多時要先將一粒藥丸研磨成細粉，再平均稱重分成幾等份，先會獲得自己想要的準確份量(小數點後2位)，仲要每開多一種藥物成份都可能要重覆依個步驟一次咁做。
最後就將研磨好的藥粉總量泡成藥水。如果客人有要求開膠囊或者患病動物係貓咪只能食膠囊唔食得藥粉嘅，就必須花費更多的時間平均分成十幾份 ( 假設開一星期藥，每日食兩次，就要平均分成14份藥 )。所以最後總花費時間同步驟其實一啲都唔少，依個就係點解簡單幾粒藥要整咁耐嘅原因 ! ! 我明白每個主人都想睇完症就快啲拎藥返屋企、俾自己生病的毛寶貝盡快食藥及休息，但希望下次唔好再一直催促姑娘啲藥點解要等咁耐啦 (幫緊你，幫緊你 ...😌)，因為催完都唔會快啲，分藥必須要務求精準並唔係貪快。
所幸，現在漸漸有國外的藥廠陸續為寵物市場推出細劑形的藥丸，亦有開始研發專門的動物用藥(唔使同人類爭藥用)。未來會有更多可以在一定體重範圍內直接一粒吞服的唔同藥物上市，可以加快出藥速度及提高藥物一致性，不過目前進口至澳門市場仍然選擇較少及比較困難，期望將來澳門動物用藥的環境會愈來愈友善。😃
點解動物有肚屙,嘔吐就會想驗胰臟炎？
因為胰臟炎病癥為:
- 嘔吐
- 肚屙 ( 爛便，水便，啫哩狀便，血便等)
- 腹痛
- 食欲不振
- 精神差
而且研究顯示，急性胰臟炎死亡率可以有27到40%. 當然都要睇翻動物本身的健康狀況以及胰臟炎嘅嚴重程度.
所以獸醫們都希望先排除最嚴重的病再安心醫治腸胃炎. 而獸醫最擔心的，是延誤醫治胰臟炎而出現併發症.
人類都有胰臟炎，可是沒有狗狗一樣常見，而且人類的胰臟炎非常的痛，一般直接送去醫院治療了...
下篇介紹胰臟炎驗血 cpl test , 請期待一下吧!
（彎彎的線係為了吸引你眼球👀，一定唔係我唔識用procreate)
kakato好味道
今日係獸醫護士日，身為獸醫的我十分感謝背後獸醫助理係背後的默默付出。助理真係唔易做，尤其澳門助理並沒有接收專業訓練，不像國外助理一樣，看着他們一步一步進步，所花費的精力絕對不少。
遇到一個好獸醫難，遇到一個好獸醫護士/助理更難。平時主人的一句唔該/多謝/麻煩哂已經係對助理好大的支持😬
