18/01/2026
صباح الفل
عارفك زهقان ومخنوق ومتضايق والدنيا مش أحسن حاجة والله ،،
بس انت عارف إيه اللي معكر صفو حياتنا جميعا ؟
هقولك كلمة واحدة بس ،، #الــــــــرضـــــــا
قال ابن القيم رحمه الله ،، الرضا باب الله الأعظم ، وجنة الدنيا ، ومستراح العابدين ، وقرة عيون المشتاقين ، ومن ملأ قلبه من الرضا بالقدر ؛ ملأ الله صدره غنىً وأمناً ، وفرَّغ قلبه لمحبته ، والإنابة إليه ، والتوكل عليه ، ومن فاته حظُّه من الرضا امتلأ قلبه بضد ذلك ، واشتغل عما فيه سعادته وفلاحه
عارف ياحبيبي لو بصيت حواليك بس ف الدائرة اللي انت فيها ،، هتلاقي ناس كتير والله العظيم ما طايلين واحد على عشرة من اللي انت فيه ومش عاجبك ،،
إرضى ياحبيبي وإحمد ربنا وعيش يومك وتقرب لربك وأوعى تقول فلان عنده وانا معنديش
الموضوع مش شطارة خلي بالك ،، والرزق فلسفته غريبة ،، وملوش علاقة بتشغيل الدماغ وإن كانت من إحدى أسبابه ،، لكن مش هي كل حاجة ،،
عليك بتقوى الله إن كنت غافلاً ،، يأتيك بالأرزاق من حيث لا تدري
فكيف تخاف الفقر والله رازقٌ ،، فقد رزق الطير والحوت في البحرِ
ومن ظن أن الرزق يأتي بقوة ما أكل العصفور شيئًا مع النسرِ
قوم بقى ياعم وشوف مصالحك وقول يارب
وتلاقي الرزق تحت رجلك وقدام عينك وفي كل مكان حواليك
صباحك ورد ياطيب وادعيلنا دعوة حلوة من قلبك وربنا يجبر بخاطرك
