22/06/2024
نعمل إيه لو السلحفاة باضت ؟
- أول حاجة عشان البيض يفقس بنجاح لازم يتوفر له 3 حاجات مهمة :
1 - التربة :
تربة متوسطة لا هي ثقيلة ولا هي خفيفة ( خليط من البيتموس أو التربة الزراعية مع الرمل بنسبة 2: 1 ) ، و السلاحف دائما بتختار إن الأرض اللي هتحط فيها البيض تكون مائلة ميل بسيط عشان متحتفظش بالمياه ، ويكون المكان بتوصله الشمس (مكان مضئ لكن مش شمس مباشرة ) ، و الأرض لازم تكون صالحة للحفر وبتعمل الحفرة بتاعتها شبه الجرس المقلوب يعنى واسعة من فوق و ضيقة من تحت و عشان التربة كويسة فالحفرة مش هتنهار قبل ما تحط بيضها فيها ، وعادة وقت وضع البيض بيكون من الظهر حتى قبل المغرب بقليل ، ومهم جدا توفير المكان اللى السلحفاة هتحط بيضها فيه عشان ميحصلش ربط بيض للسلحفة ، و السلحفاة المصري بتحفر حفرة عمقها حوالى 10 - 15سم فقط وتضع فيها بيضة طولها 3.2 سم وعرضها 2.3 سم في المتوسط ووزنها يتراوح بين 7 - 9 جرام ، وغالبا بتحط بيضة واحدة كل مرة و لغاية ما تحط من 4 : 5 بيضات على مدار أسبوع أو 10 أيام وممكن تتبعهم بدفعة تانية بعد حوالى 3 شهور . ومدة تحضين البيض بتكون من 85 إلى 110 يوم
أما السلحفاة اليونانية فهي بتحفر حفرة أعمق من 15 الى 20 سم و بتبيض من 1 : 12 بيضة كحد أٌقصى فى الموسم و البيض بيفقس بعد فترة من 65 إلى 85 يوم و البيضة حجمها أكبر من حجم البيضة الخاصة بالسلحفاة المصرية .
2 - درجة الحرارة :
درجة حرارة من 30 درجة إلى 31.5 درجة و لازم نعرف حاجة مهمة أن بيض السلاحف بيخضع لقاعدة مهمة جدًا ESD وهي Environmental S*x Determination
يعنى تحديد الجنس بيئياً .يعنى إيه ؟
يعنى نوع الجنين بيتم تحديده طبقًا لدرجة الحرارة المحيطة بالبيضة فدرجات الحرارة المنخفضة ( أقل من 30 ) أثناء التحضين تنتج ذكور ودرجات الحرارة المرتفعة ( أكثر من 31.5 ) أثناء التحضين تنتج إناث ، وعشان كدة إبقاء درجة الحرارة بين 30 : 31.5 دة بينتج أنواع مختلفة من الذكور و الإناث ، عشان كدة لازم يكون عندك ترمومتر و سخان لتعلية درجات الحرارة إذا كان التحضين فى الشتاء و هذا يحدث نادراً لأن غالبا التحضين بيبقى فى الصيف .
بس فى بلاد تانية حتى فى الصيف درجة الحرارة بتكون أقل من 25 درجة مئوية .
و كمان لازم نعرف حاجة مهمة جداً ، كل ما كانت درجة الحرارة منخفضة فتطور البيضة بيكون بطئ جداً و تاخد وقت أطول عشان تفقس وممكن تفشل فى الفقس أساسًا والجنين يموت ، ولو درجة الحرارة عالية ممكن تحصل تشوهات في الجنين .
3 - درجة الرطوبة :
والرطوبة مهمة لبيض السلاحف لكن درجة الأهمية بتختلف حسب نوع السلحفاة ، السلحفاة اليوناني و المصري اللى يهمونا لأنهم هما اللي موجودين عندنا فدرجة الرطوبة المناسبة لهم هي من 70% إلى 80 % وعشان كدة لازم يكون عندك مقياس للرطوبة ، ودلوقتى موجود مقياس للحرارة والرطوبة الاتنين مع بعض .
طريقة التعامل مع البيض :
- لو هتسيب البيض يفقس طبيعي في بيئته يبقى ملكش دعوة بالبيض خالص لا تحركه و لا تقلبه ، سيبه مطرح ما السلحفاة دفنته وحافظ على درجة حرارة ورطوبة المكان وخلاص والأفضل لو تحط شبك حوالين المكان لمنع وصول أي حيوان ليه.
- أما لو عايز تعمل تحضين صناعي ، فإما إنك تشتري حضانة بيض ولازم تكون مخصصة للزواحف و دي بتظبط كل حاجة للبيض كل اللي عليك إنك تنقل البيض بالراحة وتحطه في نفس الوضع اللي كان عليه فى الحفرة وبتحافظ على الوضع دة بإنك بتعمل علامة بالقلم الرصاص بحرص شديد على البيضة من فوق عشان لما تنقل البيضة تفضل العلامة دي فوق برضه .
( والأفضل إنك تلبس جوانتي في التعامل مع البيض )
أو لو مفيش حضانة جاهزة ممكن أنت تعمل حضانة بإنك تجيب بوكس بلاستيك بغطاء وتحط فية الرمل بالبيتموس و ترش فيه مية بالبخاخة كل يومين مرة ومش كتير ، وترص فيه البيض وتغطيه بطبقة رقيقة من خليط التربة ومش لازم تدفنه تحت خالص و برضة مش لازم نص البيضة يبقى فوق ( هو ممكن ) وتحط الصندوق فى مكان بتوصله الشمس وتروح منه يعنى مش شمس ثابتة طول النهار ، وتعمل خروم صغيرة فى البوكس عشان الهوا ، وحط الترمومتر ومقياس الرطوبة ، ولو محتاج رطوبة أعلى ممكن تحط طبق بلاستيك فية سفنجة مبلولة جوة صندوق التحضين.
منقول للافادة
