18/01/2023
بروتوكول تطعيم القطط :
يبدأ من عمر شهرين . و تبداولو ب CRP. و هو فاكسا مختلط ضد 3 أمراض :
الكاليسيفيروز : ( الفم يخمج و تسقط الأسنان و رائحة كريهة . و تقرحات )
الكوريزا : مرض تنفسي . و يقيس حتى العين. و هو السبب الرئيسي في القطط الصغيرة لي نلقاوهم و عينيهم خامجين .
التيفوس : مرض يصيب الجهاز الهضمي . و يدير اسهال كبير . قاتل خاصة عند القطط الصغيرة . .
قلنا CRP يبدأ بعمر شهرين . و بعدها ب 3 الى 4 اسابيع دير الرابال تاعو .
و تولي تدير CRP مرة كل عام .
لقاح ضد السعار ( ضد مرض الكلب ) يبدا بعمر 3 اشهر. و الرابال تاعو مرة كل عام .
+من المستحسن انك تجرع لقطك دواء مضاد للديدان الداخلية قبل كل لقاح وكأقصى تقدير قبل اللقاح ب 15يوم....اضافة الى مضاد للبراغيت.
+من الواجب ان يكون القط سليما من اي مرض او جروح وهدا يأكده الطبيب البيطري وهو المسؤول على تشخيص حالة القط المراد تلقيحه.
السؤال المطروح :
1/ في حالة عندك قط كبير و لا تعلم اذا فاكسيني او لا ؟؟
2/ في حالة عندك قط و عندك بزاف مادرتلوش الفاكسا ؟؟
الجواب : تستعمل نفس بروتوكول القطط الصغيرة . و الرابال كيف كيف . و من بعدها تولي مرة كل عام .
و سؤال آخر :
قطي عمره 7 سنوات . لازمو الفاكسا ولا طفرت ؟؟
الجواب : نعم لازمو الفاكسا . و القط يدير الفاكسا مهما كان عمره .
سؤال آخر مطروح بقوة:
قطي مايخرجش من الدار ومايخالطش ؟ لاداعي باه نفاكسيه ؟
الجواب:
القط لازم يأخد اللقاح بإستعمال نفس البروثوكول المدكور خاصة لقاح السعار، بل ان القطط المنزلية من المفروض يكون الحرص على تلقيحها اكثر من غيرها لانها عايشة مع العائلة و لأن ادخال هده الفيروسات في الأقدام وغيرها من الطرق يبقى محتمل ووارد.
